Hoogheemraadschap Rijnland OAR 11, 12, 13 : 1253 - 1564
	View: Register OAR 11 Pages 50 - 59

 

Go to Folio's ...
13	20	30	40	50	60	70

 

Location, Folio
OAR11, 50r-a
type : Keur	date : 1444-02-24	record : # 180
[058] Item so hebben die heemr. mit horen dijcgrave gekoert op sulke hantvesten als die heemr. van die graeflicheit van Hollant hebben, waert dat yemant visschede enich vanden sluse in Sparendamme ten wair tot horen wtganc, die soude verbueren die hoechtst boete. Ende wairt dat die gheene die op Sparendamme wonen ende der ambochten sluysen ende wert bewaren dat sij dat den dijcgrave ende hemr. dat niet an en brochten, die soude verbueren also dicke alsinen dair off bevinden of betugen conde x lb. [In another hand: 'anno xliiii'.]

 

Location, Folio
OAR11, 50r-b
type : Consent	date : 1444-02-24	record : # 181
[081] Item so begeerden die van Riedwijck ende Nyewerkerck datmen hem verdragen woude van horen penninck gelde twe hondert morgen om dat si groot verlies hebben van horen lande van die meeren, dair hebben die heemr op antwoirde also sise altijt willich vonden in des lants saken, so hebben si him wt goedertierenheit op dese tijt dat penninck gelt van twe hondert morgen verdragen ende niet van rechts werren noch in enige providicien [penindicien] van onsen nacomelingen in toe comende tijden.

 

Location, Folio
OAR11, 50r-c-50v
type : Consent	date : 1444-03-04	record : # 182
[013] Upten vierden dach in mairte anno xliiii. Item doe waren vergadert tot Leyden Poelgeest, Alcmade, Boechorst, Zwieten ende Paedze om der saken welke vander Zijl brugge te doen maken ende anders dat hier na volget. Item so hebben die voirs. heemr. geconsenteert dat die scout van Leyderdorp openbair sel kondigen in die kercke dat hi omme gaen sal op die zijlen ende hoelen gelegen vander Does brugge totten ambocht van Coudekerck toe ende den inganc ende wtganc vanden water te bewaren [50v] tot des lants oirbair, ende dat beschouwen mit twe heemr. off merr op die boete van ii sc., ende elke heemr. vi d.

 

Location, Folio
OAR11, 50v-a
type : Consent	date : 1444-03-04	record : # 183
[014] Item des gelijcx is geconsenteert den scout van Coudekerck te bescouwen van Claes van Leewen totter kercken toe van Coudekerck, ende dit is beyde durende totten heemr. wederseggen.

 

Location, Folio
OAR11, 50v-b
type : Vonnis	date : 1442-12-20	record : # 184
[020] Item ic Heynric van der Hoe de ambochts bewairre van des ambochts wegen van Coudekerck doe condt allen luden want een kade gelegen was buten den ambocht van Coudekerck up Claes Heymans wetering die bij goet duncken heren Gerijt van Poelgeest onse ambochts heer ende Jan Jacopzoon onsen scout mitten meesten deel vanden bueren bij goetduncken vanden hogen heemr. van Rijnlant, overmits dattet meer oirbair wair een nyewe kade te hebben om des wille dat sij den ambocht voirs. luttel scade dede, vercoft hebben Jan Danel z. tot behoef den Gnephoeck [Oudshoorn] ende die nyewe kade, die nu gemaect is streckende twisken den Lagen Waertschen dijck ende ofwegen, beter ende oirbairliker is dan die oude kade voirs. So bekenne ic dair om dat ic van des ambochts wegen voirs. wael voldaen ende betaelt bin vanden kade voirs., ende wes gelt dat vanden voirs. kade gecomen is, dats te weten vijve ende dertic wilhelmusse scilde, dat heb ic voirt verleyt inden oirbair vanden gravinge vanden nyewe kade voirs. gelijck als ic dat te rekeninge begrocht hebbe voir den lantgenoten des ambochts voirs. Ende om dat dit wair is, so heb ic Heynric voirs. van des ambochts wegen van Coudekerck voirs. gebeden Jan Jacop z. onsen scout dat hi desen brief bezegelen wil. Ende ic Jan scout voirs., om bede wil van Heynric van des ambochts wegen voirs. ende bi beveel vanden hogen heemr., so heb ic desen brief bezegelt mit minnen zegele, int jair ons heren duysent vierhondert twee ende veertich.

 

Location, Folio
OAR11, 50v-c-51r
type : Besteding	date : 1444-03-04	record : # 185
[010] [In the left margin: 'bestedinge vanden zijlbrugge.'] Item opten dach voirs. hadden die heemr. bi hem ontboden Willem vander Meer om des willen dat die sluyse tot Zijl also quaet was gelijck dat die heemr. bij tymmerlude hadden doen besien dat mense van node moste doen vernyen, ende des overdroech Willem vander Meer mitten heemr. dat hij die Zijl brugge soude doen maken tusscken dit ende mid meye naest comende ende geloefde dat alsoe te doen nader ordinacie hier na gescreven. Item hebben die voirsc. heemr. up die sluyse ende Zijl brugge gekoirt ende hoir koer dair up geleyt up die hoechtste boete datmen die maken sel indie manieren hier na gescreven. [51r] Eerst sullen wesen seven nyewe binde die stijlen dair of een roede voet dick boven den water ende vanden graven ende nederwairt. Item sullen die sloven wesen dertien duum dicke inden middel. Item dat decsel [deckes?] sal wesen ii-1/2 duum dick. Item die sluyse sal wijt wesen xvi-1/2 voet drivens waters ende die breete dair of xvii voet. Item ddie hoechte van die brugge sal wesen als die nu is, dat is uten gronde xvi-1/2 voet. Item die cledinge an beyde zijden die plancken i-1/2 duum dick. Item die gordinge an beyden zijden ende boven an beyden zijden een voet breet ende een halve voet dick. Item an die oost zijde wtgeplaet [wtgeplact?] xxi voet die palen dair of sullen dick wesen x duum vier voet vanden groten ende. Item die sloven dair op een voet dick in die middel mit deventers plancken gecleet. Item an die oostzijde leggende vier intangen x dumen dick. Item an elker zijde van dese platinge sullen wesen tien palen in geheit [ingehect?]. Item an die westzijde tot des lants sluysken toe geplatet dat sal wesen an elke zijde vi palen ende iii intangen. Item dat hout sal wesen also groot als die oostzijde is ende dat geplancket gelijck die ander zijde. Item die brugge sel binnen gecleet wesen an beyden zijde mit goede plancken i-1/2 duum dick vi voet uten dagelixen water upwart. Item dese brugge sal wail geheit wesen gelijck als die oude brugge geweest heeft. Item ende al dit hout sal wesen van goeden vierkanten deventersen hout.

 

Location, Folio
OAR11, 51v -a-52v
type : Besteding	date : 1444-03-17	record : # 186
[011] Bestedinge vander Alphenre sluyse up Sparendamme. Item opten seventienden dach van mairte so waren vergadert tot Sparendamme die heemr. van Rijnlant als her Gerijt van Poelgeest, her Willem van Alcmade, Jan vander Boechorst, Florijs Paedzen ende IJsbrant van Scoten om die bestedinge van de Alphenze sluyse mit die van Leyderdorp, Warmond, Hillegom ende Groensvoirt. Anno xiiii c ende xliiii. Item so is die sluyse voirs. besteet in manieren ende van wairden hier na gescreven. Item so sullen dair in wesen xlviii gebinde enen over dat anderde gecarbeelt. Item dat door gebint mitten tween vlogel binden die sullen dick wesen voets kant vier kant. Item die gordinge die sullen wesen x dumen breet ende v dick. Item die balcken sullen wesen x-1/2 duum dick. Item die stilen sullen wesen x dumen vier kant. Item die quespen sullen wesen viii duum dick. Item dat clooster hout sullen wesen xii dumen breet ende vi-1/2 dick. Item die sluyse sal wesen xii-1/2 voet wijt. Item die hoecht sal wesen x voet. Item die stilen ende raemt dair die doir of gemaect is die sullen breet wesen x dumen ende v dick. Item die plancken dair si mede gestopt sullen wesen i-1/2 duum dick. Item alle dat werck sal wesen leydsche voet ende die voet xii dumen. Item die scoren beneden in die sluyse die selre wesen drie, die een sel leggen midden tegens die doir stijl gelegert up die quespen, die ander twee an die zijden strekende an dat doir bint ende gelegert an die stilen, ende die plancken boven, beneden ende bezijden nae dat scampelioen. Item dat bint dat voir over die sluyse geheyt sel wesen die balck dair of sal wesen voets kant, die stijlen sullen wesen xi dumen die sullen geheit wesen also lanc ende also diep alsinense in cregen mach. [52r] Item alle hout werc sal wesen van goeden kanthout ende deventers hout wercbair sonder spijn ende sonder rotolm [reetolm?]. Item onder die nyen boom sullen wesen x slick houten ende die sullen dick wesen vii dumen. Item die nyen boom gelegeert op den ouden boom. Item die ghenen die dese sluyse an nemen sullen te maken die sullen dat oude hout leveren opten dam duten der ambochten coste. Item so wie dese sluyse an nemet te maken, die sel borge setten voir die sluyse dair den heemr. ende den lande die die sluys toe behoirt an genuecht, ende dese voirs. sluyse selmen leveren te vollen gemaect tot sinte Lambrechts dage van hout, van yser ende van airde als hi nu is. Item so willen die heemr. dese sluyse besteden bij ponden xv nye placken voir i lb. of payment hoirre wairde. Item vanden ijserwerck. Item dair die gordinge mede gespikert sullen wesen die sullen wesen drie wten pont ende des selmen spikeren up elke ende mit tween spikeren ende anders een. Item dat yser dair sij mede gedect sel wesen vi wten pont. Item in dat decks sullen wesen in elke planck twe spikeren op elc bint. Item op die zijde plancken twe spikeren an elke stijl gespikert mit twe dubbelde middelnagel. Item op dat doirbint gespikert elke planck mit v dubbel middelnagel ende die plancken wel gemosset. Item die bodem sel gespikert wesen mit middelnagel. Item die dage van bettalinge sullen wesen den eersten dach achte dagen voir meyen dach, den anderden dach sal wesen tot sinte Jans dage te midzomer, den derden dach sel wesen als die sluyse gemaict is ende op gelevert te vollen prijse vanden heemr. [52v] Item so sullen die gene die die sluyse an nemen den heemr. geven voir hun ende horen dienren ritsoen als van outs gewoenlic is, dat is te weten xii nobel ende i nobel te wincoop. Item worde die sluyse niet gemaict tot den voirnoemden dage nader bestedinge vanden heemr. hier voir gescreven, dat wouden si corigieren tot hors selfs goetduncken. Item dese sluyse heeft an genomen te maken Dirc Florijs z. van Oyen om ses hondert lb. ende lix, borge Jan van Noorde.

 

Location, Folio
OAR11, 52v-a
type : Keur	date : 1444-05-05	record : # 187
[072] Item op die meye scouwe anno xliii waren tot Sparendam die heemr. van Rijnlant als heer Gerijt van Poelgeest, heer Willem van Alcmade, Jan vander Boechorst, Boudijn van Zweten, ende IJsbrant van Scoten, ende dair worden doe gedaen die saken hier na gescreven. Item op die scouwe so koorden die heemr. mit horen dijcgrave so wie enich vanden ambocht bewairers of enige werclude des lants het waren tymmerlude, dijckers of anders yet misdede mit woorden in horen dienste doende ende dat betuget wair mit twe goeden mannen of meer, die soude verbueren x lb. Anno xliiii.

 

Location, Folio
OAR11, 52v-b
type : Keur	date : 1444-05-05	record : # 188
[070] Item wairt dat yement misdede mitten werken als mitter hant an den wercluden, dienres ende ambocht bewairers voirs. in horen dienste doende, die soude verbueren die hogeste boete die die heemr. wisen mogen, ende voirt tot correxien van onsen genadigen heer ende sinen rade als een die des heren geleyde hadde gebroken na wtwijsinge der hantvesten die dair of sijn. Anno xliiii.

 

Location, Folio
OAR11, 52v-c
type : Keur	date : 1444-05-05	record : # 189
[074] Item so wie enich vanden ondersaten binnen den mercken van Rijnlant geseten toghe tot anderen recht dan voir den dijcgrave ende heemr. van Rijnlant datter dijckaedzen ende heemraetscip an roerde, die soude verbueren x lb. Anno xliiii.

 

Location, Folio
OAR11, 52v-d
type : Keur	date : 1444-05-05	record : # 190
[075] Item so wes men inden hantvesten vanden heemraitscip niet en heeft noch in horen koren, dat salmen berechten naden rechten van Rijnlant, dats te weten die beste reden dat beste recht, ter tijt toe datter eenre koren up gemaict worden. Anno xliiii.

 

Location, Folio
OAR11, 53r-a
type : Keur	date : 1444-05-05	record : # 191
[059] Item op die selve tijt so hebben die dijcgrave ende heemr. gekoirt dat men den Scijnkeldijc sal maken nader hoechte datten dijck van Coudekerc is over al den Scijnkeldijk langes also dat hi gemaect is tusschen dit ende sinte Bertelmees dage naest comende [25 August] op een boet van derdendeel van x lb., ende die salmen scouwen mit eenre scouwe. Anno xliiii.

 

Location, Folio
OAR11, 53r-b
type : Consent	date : 1444-05-05	record : # 192
[015] Item so ist geconsenteert den scout van Coudekerck dat hi scouwen mach die Nye weteringe ende sluyse gelegen inden ambocht van Coudekerck inden Lagen Wairt op een boet van ii sc., durende tot des heemr. wederseggen.

 

Location, Folio
OAR11, 53r-c
type : Scheiding	date : 1444-10-06	record : # 193
[010] Item op die Bamis scouwe hebben geweest heer Gerijt van Poelgeest, heer Willem van Alcmade, Jan vander Boechorst, ende IJsbrant van Scoten. Item van dat sceel dat geweest is vanden dijck bij Costverloren die nu is te vollen gemaect ende men sal dair enen pael steken ter Halver sluyse dair die laetste sluyse [Sloof says of 1432] lach van Costverloren, ende die salmen voirt maken an wtwisinge der breiven die dair of sijn buten des lants coste tot ewigen dagen.

 

Location, Folio
OAR11, 53r-d
type : Consent	date : 1444-10-10	record : # 194
[088] Item opten tienden dach van october anno xiiii c xliiii so hebben geconsenteert ende gemachticht die hoge heemr. van Rijnlant den scout ende heemr. vanden ambochte van Leyderdorp alsulke punten hier an gescreven. Item datmen die Nye weteringe scouwen sal alsinen andere weteringe doer. Item datmen die kade die sluysen ende hecken dicht hout. Item datmen die kade ende den afterwech verhuer ende datmen dat gelt geve den genen die dair toe gerecht sijn ende hoir lant of gedolven is elke nader grote van sijne lande bij goet duncken ende redelicheit des scouten ende heemr. voirs. Item datmen die ambocht bewarers van jair te jare kiesen ende setten sal biden scout, heemr. ende meeste rijcdom vanden ambocht aldair ende altoes enen vanden ouden ambocht bewairers dat naeste jaer wt dair an te bliven ende den ambocht ende lantgenoten altijt goede rekeninge te doen alst behoirt ende gewoenlic is. Item die dat voirs. staet hebben die hoge heemr. van Rijnlant [added in the bottom margin: 'als heren Gerijt van Poelgeest, heren Gerijt van Zijl, heer Willem van Alcmade, Jan vander Boechorst ende Boudijn van Zwieten'] upten dach ende int jaer voirs. geordineert ende geconsenteert te houden up sulke boeten als inden ambocht voirs. recht ende gewoenlic is, durende tot horen wederseggen.

 

Location, Folio
OAR11, 53v-a
type : Verklaring	date : 1445-02-23	record : # 195
Petri ad cathedram anno xlv. Item die scouwe en was niet gehouden om des will want die van Hairlem up die tijt inder onleed waren van horen gescillen die sij onderlinge hadden.

 

Location, Folio
OAR11, 53v-b
type : Consent	date : 1445-04-05	record : # 196
[016] Item upten vijften dach in aprille waren vergadert tot Leyden heer Gerijt van Poelgeest, heer Willem van Alcmade, Jan vander Boechorst ende Boudijn van Zwieten ende deden doe alsulke punten als hier na gescreven staen. Item so wort geconsenteert Jacop van Rijswijck dat hi mochte doen maken twee steenen hoofde in Voirscotenre weteringe jegen sijn zaet die hi aldair leggende heeft an die brugge die hi dair gesteken heeft, durende totter heemr. wederseggen.

 

Location, Folio
OAR11, 53v-c-54r
type : Besteding	date : 1445-04-05	record : # 197
[012] [In the left margin: 'Bestedinge van dat cleyn Zijl brugkijn.'] Item updie selve tijt [i.e., vijften dach in Aprille] wort besteet te maken dat cleijn sluijsken bij der Zijlbrugge wanttet niet langer en docht te leggen ende dair waren bij veel van die ambochts bewarers van Rijnlant dierre mede sculdich in sijn te gelden ende des is die sluyse besteet te maken in sulker manieren als hier nagescreven staet. Item eerst sullen in die voirs. sluyse wesen viii gebinde die balken sullen wesen voets kant ende xiiii voeten lanc. Item die stijlen dair toe sullen wesen xx voeten lanc ende voets kant totten dagelijcx water toe ende dair na vervolgende ende dese sluyse sal i-1/2 voet hoger leggen dan die ander lach. Item vanden groter sluyse totter cleynre sluyse toe sal onse deel weesen an elke zijde vii stijlen xvi voeten lanc ende x dumen dick ende twe sloven dair op voets kant in die middelwairt. Item dair sullen in wesen drie gordinge, twee boven ende een beneden ende sullen wesen x dumen dick inden middelwairt. Item die vlogelbalcken an byden zijden ter steden wairt sullen wesen vijf voeten lang totter tween vligelkijn toe. Item dair toe sullen wesen twee vlogelkijn, an elke zijde een, ende die sullen wesen vi voeten lanc ende in elken vlogelkijn sullen wesen drie stijlen ende dat wel geplant. Item die zijdel plancken sullen wesen twee dumen dick. Item dat dechs op die sluyse sal wesen iii dumen dick. [54r-a] Item ende al dit hout sal wesen van goeden deventerscen hout wercbair sonder spint ende root olm Ende so wie vanden tymmerluden dit an neemt te maken, die sal dair toe leveren hout ende ykser na sijn toebehoren ende daer toe dat aerdwerck dair of ter bester oirbair na dattet toetter sluyse dienen mach, ende dese brugge sal aldus up gelevert worden tot wtgaende meye ten prijse vanden hemrade. Ende dat oude hout vanden ouder sluyse sullen die werclude leveren upten dijck op horen cost. Ende worde die sluyse niet gemaect ende up gelevert totter tijt voirs., dat soude staen totter heemr correxie. Ende inder manieren voirs. heeft Dirc Wouters an genomen dese sluyse te maken om c xiiii pont, xv stuvers voir i pont, ende des sal hi hebben die een helfte dair of als die sluyse gemaect is ende up gelevert ende die ander helft binnen eenre maent dair na.

 

Location, Folio
OAR11, 54r-b-54v
type : Scheiding	date : 1445-04-20	record : # 198
[014] Item xx dage in aprille, so sijn vergadert geweest tot Leyden die hoge heemr. van Rijnlant als heer Gerijt van Poelgeest, heer Willem van Alcmade, Jan vander Boechorst, ende Boudijn van Zwieten om der saken willen van Woerden die hier na gescreven staet. Item so sijn gecomen voir den hogen heemr. van Rijnlant die bailiu ende dijcgrave vanden lande van Woirden an die een zijde ende die hoge heemr vanden lande van Woirden an de ander zijde ende hebben hun angebracht dat sij gescil hebben omme eenre dingtael wille die tusschen him lude gesciet is roerende van wtgeleyden gelde dat die dijcgrave upten lande van Woirden alse hi hem vermat wtgeleit soude hebben bij wisinge der heemrade ende eyschede dair of na wtwisinge der heemr vonnesse die si dair of gewijst soude hebben twee scatte an gelde of vierscatte an pande mit ander veel dingplechtiger woirden dair toe dienende na wtwisinge der scriften die si dair of den heemr. over gelevert hebben. Item dair die heemr vanden lande van Woirden weder tegens geantwoirt hebben in scriften die deens deels contrarye is der anspraeke des bailiuwes voirs. na wtwijsinge der scriften die si oick dair jegens over gegeven hebben ende hebben dair van begeert raet van die heemr. van Rijnlant. [54v] Item hier up hebben him die heemr. van Rijnlant biraden ende hebben him geseit want dat die saken voir him also gecomen waren dat sij na horen rechten ende verstande aldus doen souden als hier na gescr. staet. Item inden eersten also kenlic is na horen scriften ende overgeven ende oick bijder wtsprake te hove gepassert ende gewijst is dat Jan Speyert gebraken een somme gelts van twehondert een ende dertich quade gulden die van des lands wegen van Woerden tot sinen huse verteert waren ende Coopman Pauwels een somme van hondert ende negen gullden an houte tot sinen huse gehaelt die in des lants oirbair gecomen sijn die den selven Jan Speyert ende Coopman Pauwels aen den selven lande gebraken. Item so en weten die heemr. van Rijnlant niet anders noch him bet te raden dan dat die bailiu vanden lande van Woirden also hi dat gelt wt geleyt heft ende den voirs. Jan Speyert ende Coopman Pauwels vernuecht heeft als hij mit horen quijtancien liet bliken sculdich is dat voirs. gelt eerst en scat weder te hebben ende also verre als die bailiu voirs. bewijsen mach mitten ouden heemr. die dat gewijst hebben dat hij dat gelt wt leggen soude ende weder in winnen naden dijck rechte ende dat hi dat voirt vervolcht heeft mitten dijc rechte als dat behoirt, so souden si dat horen dijcgrave twe scat an gelde of vier scate an pande toe wisen altijt behouden sulker wtsprake als bi mijns genadichs heren rade te hove gepasseert is.

 

Location, Folio
OAR11, 54v-a
type : Scheiding	date : 1445-04-20	record : # 199
[015] Item enen anderen raet roerende Jan Jacop z. Item so die heemr. van des lande van Woirden van die saken van Jan Jacop z. vervolchden, so hebben die heemr. van Rijnlant hoir goetduncken geseit. Also Jan Jacop z. op hem genomen heeft veel luden die hoir werc wel gemaect hadde ende him toe geseit dat si dair mede quijt ende vri wesen souden dat tegens ende contrarie die oude rechten ende gewoonten des lands van Woirden is. Ende die bailiu van Woirden dair om sijn wtgeleide gelt of gewijst is dat hi dair omme niet sculdich en is dat sijn also te verliesen, mer datmen dat wisen sal op Jan Jacop z. ten wair of hi dat met beteren rechte weren mochte.

 

Location, Folio
OAR11, 54v-b-55r
type : Keur	date : 1445-05-04	record : # 200
[078] Item so hebben geweest op die meye scouwe anno xlv heer Gerijt van Poelgeest, heer Willem van Alcmade, Jan vander Boechorst ende IJsbrant van Scoten. [55r] Item so hebben die heemr. voirs. mit horen dijcgrave Florijs van Alcmade Hugen zoon gekoert dat elc ambachts bewairres van tween die sij jairlix kiesen den enen dair an laten sullen [in another hand: 'op een boete van x lb. anno xlv.'].

 

Location, Folio
OAR11, 55r-a
type : Keur	date : 1445-05-04	record : # 201
[116] Item so hebben si noch gekuert dat alle man sijn kaden dicht houde ende also make dat si dicht sijn altijt tot sinte Pieters dage ad cathedram [22 februari] op een boete van een derdendeel van x lb. [in another hand: 'anno xlv.']

 

Location, Folio
OAR11, 55r-b
type : Keur	date : 1445-05-04	record : # 202
[117] Item so hebben si noch gekuert dat die van Noirtich, Noirtigherhout ende Voirhout hoir doeren dicht sullen doen houden in Zassenemmer beeck ende in Klinkenberge als dat water ingaet, vanden eersten dach van aprille tot mid meye toe ende van sinte Baven dage [1 oktober] tot sinte Martijns misse [11 november] toe op een boete een derdendeel van x lb. also dicke als dat bevonden worde. Anno xlv.

 

Location, Folio
OAR11, 55r-c
type : Consent	date : 1445-05-04	record : # 203
[082] Item so hadden die van Coudekerck een eynde cadijcx anden afterdijck inden ambocht van Leyderdorp dat si vercoft hebben Dirc vander Does bij consente vanden hogen heemr., behouden altijt dat die van Coudekerck bliven sullen verbonden den ambochte van Leyderdorp dat ende kade na hoirre kuer te houden ende te maken als van outs geweest heeft, ende des so sullen si weder sulke voirwairde nemen van Dirc vander Does dat dat ambocht van Coudekerck dair van tot ewigen dagen sonder scade blive.

 

Location, Folio
OAR11, 55r-d
type : Consent	date : 1445-05-04	record : # 204
[017] Item so wort doe geconsenteert die van Catwijck ende van Oestgeest, Riedwijc ende Nyerkerc te scouwen als die van Zoeterwoude geconsenteert wort int jair van xxxv, ende dat salmen vinden int blat van xxiii.

 

Location, Folio
OAR11, 55r-e
type : Keur	date : 1445-06-29	record : # 205
[017] Item hebben geweest op sinte Jans scouwe heer Gerijt van Poelgeest, heer Gerijt van Zijl, heer Willem van Alcmade, Jan vander Boechorst, Boudijn van Zweten, ende IJbrant van Scoten. Item op een kuer die gesciet is bijden heemr., gescreven int register int blat van xvi, roerende datmen die wallen sal op halen, sconmaken ende baggeren inden watergangen mitten kroesten, etc., so hebben die heemr. hier vorder op verclaert datmen dat also vervolghen soude. Ende waert dat die scouten ende heemr. elcx inden open [horen?] dat also niet en voldeden, so souden si elcx verbueren een derdendeel van x lb.

 

Location, Folio
OAR11, 55v-a
type : Verklaring	date : 1445-10-05	record : # 206
Item so wort die scouwe opten hogen dijc niet gehouden om dat onleeden wille van Aemsterdam.

 

Location, Folio
OAR11, 55v-b
type : Consent	date : 1445-10-05	record : # 207
[018] Item anno xlv op die Bamis scouwe hebben geweest heer Gerijt van Poelgeest, Jan vander Boechorst, Boudijn van Zwieten ende IJsbrant van Scoten. Item so hebben die heemr geconsenteert die van Zoeterwoude ende die van Benthusen een quakelbrugge te maken in hoir ambocht ghelijc die van outs plach te wesen, durende tot des heemr. wederseggen.

 

Location, Folio
OAR11, 55v-c
type : Consent	date : 1445-10-05	record : # 208
[019] Item so hebben die heemr. geconsenteert die vanden Scoot dat si mit vier bueren scouwen mogen dat si mit viven pleghen te doen, want si niet meer lude inwonende hebben, totter tijt toe dat si meer lude hebben.

 

Location, Folio
OAR11, 55v-d
type : Consent	date : 1445-10-05	record : # 209
[020] Item so hebben die hiemr. geconsenteert die broeders inden Wairdt buten Leijden een brugge te maken over den nijen Rijn behoudelic dat sij die hoefden also setten sullen dat men den Rijn dair mede niet en sal nauwen.

 

Location, Folio
OAR11, 55v-e
type : Brief	date : 1445-10-05	record : # 210
Item so heer Jan Allert z. cureyt van Sparenwoude op dese tijt in allen punten voldaen ende vernuecht is, so wort den dijckbrief die hi sprekende hadde opten kercken lande van Sparenwoude gecanseleert, doot ende te niet ghedaen.

 

Location, Folio
OAR11, 55v-g
type : Consent	date : 1446-02-22	record : # 211
[021] Petri ad cathedram anno xlvi. Item waren vergadert tot Hairlem op die scouwe heren Gerijt van Poelgeest, heren Willem van Alcmade, Jan vander Boechorst, IJsbrant van Scoten ende Simon Verderic. Item op die tijt hebn die heemraet geconsenteert dat die scout mitten heemrade vander Scoot scouwen sullen dat sullen sij doen roepen op eenre sonnendach in drie die naeste kerken sonder meer wete dair off te doen also die lantgenoten wijt geseten sijn, dit sel gedueren toter hoech hiemraet wederseggen.

 

Location, Folio
OAR11, 56r-a
type : Keur	date : 1446-02-22	record : # 212
[149] Item die hiemraet voirsc. hebn oec op die tijt [petri ad cathedram] geboden ende geordineert datmen die oude kueren die op dat ambocht van Lederdorp gemaect sijn houden sal op die boete van tien pont, ten waer off dat yemant werde mit beteren rechte.

 

Location, Folio
OAR11, 56r-b
type : Keur	date : 1446-02-22	record : # 213
Item op die selve tijt [petri ad cathedram] so heefft Jan van Haerlem aengenomen die platinge affter sijn hws te vollen mit aerde om den Koelik tusscen den speuye ende Jan van Hairlem hws buten des lants cost, behoudelic dat hijt sal mogen betonnen sonder betymmeren, ende dat sal gedueren totter heemrader wederseggen.

 

Location, Folio
OAR11, 56r-c
type : Besteding	date : 1446-02-27	record : # 214
[013] Item op die sonnendage na sinte Mathijs dach waren vergadert tot Lieden Poelgeest, Alcmaide, Zweten ende Symon Vrederic ende hebn besteet die Goutsluyze tot Alphen als hierna bescreven staet. Inden eersten so selmen die sluyze vierkant vercleden ende verdecken, ende dair sullen in wesen vier nye balken ende nye stijl, ende dat decksill sal wesen drie dumen dick, ende die zijdcledinge sel wesen anderhalff dum dick, ende an elken zijde een gordinge die sal wesen voets breet ende enen halven voete dick ende ingelaten ter oirbair, ende dat sel wesen wel gespikert mit spikeren die dair to dienen. Item so sullen wesen totter voirsc. sluyze twe vlogelen an die Goutsche zijde ende in elken vlogel sullen wesen viii stijlen ende elc stijl sal wesen viii dwm dick sess voet vanden groten eynde nederwert ende dese stijlen sullen wesen xviii voet voet lang ende die sloeven dair op sullen wesen negen dwm dich in die middelweert ende xviii voet lang ende langer off oirbair wair ende dat geplanct mit goeden plancken anderhalff dwm dick, ende in elken vluegel sullen wesen drie intangen tien voet lang ende viii dumen dick. Item an die ander zijde sullen wesen twe vluegelen dair sullen in wesen xi stijl, dat is te weten an die oostzijde sess stijlen ende an die ander zijde vijff stijlen, ende die stijlen sullen dick ende lang wesen gelijck als hier voer vanden ander zijde wesen sal ende voirsc. staet ende die sloeven des gelijcx ende dair sullen wesen iiii intangen aen elke zijde twe ende dat geplanct ende gespikert gelijc alst an die ander zijde wesen sal ende voirsc. staet ter meester oirbair. Item die geen die dit aen nemen sal, die sal leveren hout, ijser ende airde mit alle dat ander dat dair toebehoirt, mer sal hem die heemrade doen wijsen wair men die aerde nemen sal op des gheens cost daet aen nemen sal, ende dat te betalen bij scattinge vanden heemrade, ende so wie dat aen neemt te maken, die sel hebn al datter off valt van hout ende van ijser sonder yemnants toeseggen. Ende hij sel oec geven enen engelschen nobel van rentsoen. Ende dese sluyse mit horen toebehoren als voirsc. is salmen gemaect te vollen op leveren opten meydach naestcomende. Item van deser bestedinge salmen tgelt geven die een helfft binnen sess weken ende die ander helfft binnen sess weken dair na bij ponden xv stuvers voir tpont gerekent. Item alle dat hout dat totter voirsc. sluys wesen sall sel wesen goit deventers hout sonder spijnt off roet olm binnen der maet voirsc. Item dese voirsc. sluyse heefft angenomen Clais Hermans z. in allen manieren als die voirsc. voirwairden begrepen hebn om hondert vii pont payments voirsc.

 

Location, Folio
OAR11, 56v-b
type : Consent	date : 1446-05-03	record : # 215
[022] Item op die mey scouwe waren Poelgeest, Alcmaide, Zijl, Boechorst, Zweten ende Scoten ende hebn gekuert ende gedaen als hier na bescreven staet. Item so is geconsenteert den luden wt den Kage bij horen vervolch dat sij sullen mogen scouwen gelijcken die vanden ambocht van Alcmaide consenteert is, duerende tot des heemraids wederzeggen.

 

Location, Folio
OAR11, 56v-c
type : Consent	date : 1446-05-03	record : # 216
[023] Item die van heren Jacobs woude is geconsenteert dat sij totten minsten coste tot des lants oirbair scouwen mogen als dat nutste wesen sall.

 

Location, Folio
OAR11, 56v-d
type : Keur	date : 1446-05-03	record : # 217
[132] Item so hebn die dijckgrave ende heemrade voirsc. gekuert dat nyemant geen opslach maken en sal op den Scinckeldijck op een boete van tien pont.

 

Location, Folio
OAR11, 56v-e
type : Keur	date : 1446-05-03	record : # 218
[133] Item noch gekuert datmen die zijl die leit int eynde vanden Scinckeldijck dicht houden sal, also datter geen water op Rijnlant en loept, op een boete van tien pont.

 

Location, Folio
OAR11, 56v-f
type : Consent	date : 1446-06-28	record : # 219
[024] Item op die Does scouwe waren vergadert alle die heemrade ende worden gedaen al sulken punten als hier na gescreven staen. Item wort op die tijt die van Hazerswoude geconsenteert dat sij een sluystgijn wt breken souden dat gelegen was bijder oost kade anden Rijndijck inden selven ambbocht, overmits dattet den ambocht voirsc. niet nut en was.

 

Location, Folio
OAR11, 57r-a
type : Scheiding	date : 1446-06-28	record : # 220
Item van sulke gesceel als Willem Bartoen vander lantgenoten wegen wtstaende hadden jegen Aelbert Nagel als scout van Voirhout roerende vanden ambochts bewaerres van Voirhout, dair off hebn die hiemraders geordineert dat die ambocht bewairres die Aelbert Nagel gecoren heeft tot deser tijt dit jair ambocht bewairres bliven sullen ter eren mijns genadigen heer mitssulke breive als Aelbert Nagel voirsc. dair off getoent heefft behoudelic dat die scout voirt an geen ambocht bewairres kiesen en sall ten sij bijden lantsgenoten als ander ambochten doen in Rijnlant na wtwijsinge der kueren ende rechten die dair off sijn.

 

Location, Folio
OAR11, 57r-b
type : Rechtsdag	date : 1446-06-28	record : # 221
Item op den selven dach so sijn gehoert getugenisse om te weten wie dat die Goutsluyze sculdich waer te maken mit recht, te weten, eerst in Randenburch Willam Hermans z. ende Jan Pieters soon, in Groensvoirde Clais Fyen soon, in Snidelwijck Jan Ludlophs soon, Jan Clais z. ende Ever Airnts z., ende hebn getuucht bij horen ede gelijk hier na volcht die sij hoechlic dair toe deden voir den heemrade in jegenwoirdicheit veel goider luden van Alphen ende seiden dat sij een hantveste gesien hadden inhoudende als die copie die sij overleverden ende hier na bescreven stait wtwijst, mer wair die principael hantvest gebleven was en wisten sij niet. Copia 'Wij grave Florens van Hollant maken kont allen den genen die desen brieff sullen sien off horen lesen dat wij onsen getruwen luden die wonachticht sijn inden ambocht van Alphen, in Randenborch, des heren ambocht van Brederoeden, in Snijdelwjck, heren Dirx ambocht van Sassemen, in Groensvoerde, in Scilant der abdissen gerechte ende in Suywijck Splinters gerechte wt den wairde gegeven hebn aldus gedaen rechte ende aldus gedaen vriheit dat sij die doer die leget ter Goude inder sluyze op den Rijn wt doen mogen ende affnemen altois in dier manier dat sij mit enen waterkere off mit enen somer dijck tyegen dat somerwater bewaren tlant dat leyget bij beide zijden vander Goede. Ende die waterkeer sal gaen van den Rijn up ende strecken also verre als die vier paer hiemraders goitduncken ende den lande oirbair is. Voirt gebieden wij dat die vier scouten van desen voirgenoemden ambochten op die Goude comen mit horen gezworen den waterkeer te deilen eer ment anevaet elken rechter tsijn ontfaen margen margens gelijck aldaert ten rechte hebn sal, ende elken rechter tsijn te bescouwen mit sinen hiemraders. Voirt willen wij dat die geene die dese brugge te voren makeden voirt ane maken ende bescouwen ende anders nyemant. In oirkonde van deser vriheit ende des rechts so hebn wij desen breiff bezegelt mit onsen zegele ende geg. inden Hage inden jare ons heren m cc ende lxxxiiii des manendages na sinte Matheeus dach.'

 

Location, Folio
OAR11, 57r-c
type : Schouwdag	date : 1446-08-24	record : # 222
Item so waren vergadert op sint Bertolomeeus scouwe Poelgeest, Boechorst, Scoten, Symon Vrederic ende scouden den Hogen dijck.

 

Location, Folio
OAR11, 57r-d
type : Vonnis	date : 1446-10-04	record : # 223
[034] Item waren vergadert op die Bamis scouwe Poelgeest, Alcmaide, Boechorst, Scoten ende Symon Vrederic ende deden sulke punten als hier na bescreven staen. Inden eersten alsoo die dijckgrave Wernbout Jans z. toesprack van boeten mits een gebot dat hij gedaen hadde op den heemrade, so hebn die voirsc. heermade een vonnisse dair off gewijst in manieren als hier na gescreven staet. [57v-a] Item also Wernbout Jans z. een gebot gedaen heefft vander stede huus van Leiden openbair mitter clocke als van een bevolen scout dat geen poorter van Leiden den hogen heemraet enich morgengelt geven souden ten wair dat sij eerst hoir rekeninge gedaen hadden bij twe mijns genadichs heren rade ende bijder stede van Haerlem ende van Leyden, ende hoe wel dat Wermbout voirsc. seit dat hijt gedaen heefft wt beveel ende scriven vanden hove ende hij niet en bewijst dat hem wt den hove bevolen off gecreven is enige boeten der up te setten, so wijsen die voirsc. heemrade also Wernbout als een scout dat gebod gedaen heefft bij hem selven op een boete van tien pont, so sel Wernbout voirsc. selve in tien ponden vervallen wesen ten sij dat hij bewijsen mach dat die brieve die wt den hove quamen dat verclaerden dat hij tgebod op tien pont gebieden soude, so soude hij dair oof quijt wesen. Item hier up wort voirt gewijst dat Wernbout dat voirsc. bewijs doen soude binnen xiiii dagen voirden dijckgrave ende vier vanden heemrade.

 

Location, Folio
OAR11, 57v-b-58r
type : Keur	date : 1446-10-04	record : # 224
[118] [119] Item op die selve tijt wort een kuer gemaect bijden dijckgrave ende heerm. voirsc. als dat alle landen goit ende quaet in Rijnlant gelegen gelijc gelden sullen in den dijckrecht in manieren als hierna bescreven stait. Item, also binnen den merken van Rijnlant veel verloren landen sijn bij verdelven van veenen ende anders ende all dage meer worden ende die voirsc. verdolven landen niet waerdich en sijn horen onkost te gelden als sij plegen in sluyzen ende sluystochten ende in anderen ongelden die sij van rechts wegen sculdich sijn te gelden naden dijckrechten ende gewoenten des lants van Rijnlant, ende dair om die voirsc. landen laten leggen voir die voirsc. onkosten twelke int eynde comen soude tot groten affterdeel des anderen landen die also niet verdolven en worden, hier omme dat te voirhueden, so hebn die heemrade dit merkende wel oversien dat ongeval hier namaels wel of comen mochte ende hebn dair omme samentlic mit horen dijckgrave hier op sulke kueren gemaect als hier na gescreven stait, anno xlvi. Item inden eersten dat alle landen binnen den merken van Rijnlant gelegen alle ongelt hoe dat genoemt is gelden sullen mergen mergensgelijck, tsij verdolven lant off anders, inden dijckrecht gelijcken als dat tot hair toe gehantiert is geweest ende in anderen landen die hem mitter dijckrechten behelpen gewoenlic is geweest, ende wairt dat yemant die hem enige lande bewonden hadde off doen bewijnden ende die voirsc. landen wilden laten leggen voir den onkost, so woude men dien onkost mogen verhalen in sijn anderen goede dat hij hadde binnen den voirsc. mercken gelegen. Ende wairt dat hij geen goet en hadde, so soude die dair voir ballinc geleit worden ende ballinc bliven op sijn lijff totter tijt toe dat hi die voirsc. onkost gegouden hadde ende die boeten als dat behoirt van ouder gewoenten ende recht. Ende die also balling wesende ende mitten utersten rechte also verwonnen, so selmen den voirsc. [58r] onkost voirt betalen mogen an den genen die lest besitter vanden voirsc. landen geweest heeft, off an sinen erven dair die ander voir balling geworden is, voirt te mogen verhalen van grade te grade tot inden negenden grade toe.'

 

Location, Folio
OAR11, 58r-a
type : Keur	date : 1446-10-04	record : # 225
[120] Item op die selve tijt worde overdrage bijden voirsc. heemr. dat alle die gene die mitten lande van Rijnlant te Sparendamme wtwateren ende nite met hem en gelden sullen comen ende nemen horen hoeffslach ende laten hem teykenen off men sel horen waterganc stoppen na wtwijsinge der hantvesten die tlant van Rijnlant dair off heefft. Anno xlvi.

 

Location, Folio
OAR11, 58r-b
type : Vonnis	date : 1446-10-04	record : # 226
[022] Item eodem die wort gesloten also lange tijt gesceel geweest heeft tusschen dien van Alphen ende die smaeldorpen als Groensvoerde, Randenborch, Snidelwijck ende tvri ambocht van Boschcoep wie die Goutsluyse tot Alphen mit recht sculdich wair te maken ende also men in der wairheit niet en heefft konnen bevijnden na enigen hantvesten, kueren off rechten wie die mit recht sculdich is te maken, so ist dat die selve sluyze in desen jaer gemaect is geweest bij genoech vanden heemr. bij die van Alphen ende dorpen voirsc. ende hebn daer om den cost geleden morgen morgengelijck, ende want zeder die tijt dat die voirsc. sluyze gemaect is geweest die voirsc. heemraden vernomen ende verstaen hebn dat na rechte die smaeldorpen voirsc. zekere verbant inden voirsc. sluyze hebn te maken, te weten an die noortzijde naest der sluyze iiii stijlen ende an die zuutzijde naest der sluyze oec vier stijlen mit dat stemplis, ende dat die van Alphen toebehoirt te maken die scotduer ende dat scotduer gebijnt ende dat ander plaet werck an beiden zijden behoirt toe te maken die gene die die Goude ka sculdich sijn te maken. Ende dat vierkant vander sluyze sel bliven ten laste vanden gene die tweewarver laitste die gemaect hebn, ten sij dat yemant mit beteren rechte hem dair off vrien mach ende een sculdiger wijsen mit rechte.

 

Location, Folio
OAR11, 58r-c
type : Keur	date : 1447-02-28	record : # 227
[076] Petri ad cathedram anno xlvii Item waren vergadert tot Sparendamme heer Willam van Alcmaide, Jan vander Boechorst, Boudijn van Zweten ende IJsbrant van Scoten. Item so is gekuert bijden dijckgrave ende hiemraet voirsc. so wie dat dienres enige quade woirde gave om hoirs dienst wille off dat dair an cleefft, die sal verbueren tien pont.

 

Location, Folio
OAR11, 58r-d-58v
type : Vonnis	date : 1447-05-02	record : # 228
[037] Item op die mey scouwe waren vergadert tot Hairlem Poelgeest, Alcmaide, Boechorst, Zweten, Scoten ende Symon Vrederic Item also die dijcgrave Willam Kuysker van Boschuizen toespraect hem, aen seggen dat hij binnen den merken van Sparendamme heeft doen visschen mit staende touwe dat hij dair an verbuert soude hebn na wtwijsinge der hantveste, [58v] dats te weten die hoechste boete. Dair Willam Kuzer voirsc. weder op antwoirde seggende dat hij vri wesen sal vander aenspraeck bij tween punten, in den eersten so hij dat selve niet bevisschet en heefft ende een ander die vischerie over gegeven heefft die te bevisschen na ouden costumen gelijc die rentemeester van Noortholland die pleecht te verhueren, seit voirt dat hij oec niet gedaecht en soude wesen als recht is mits dat sij niet gedachte en is van des hoves bode mer vanden heemr. bode. Dese voirsc. saken doirgesien ende wel overwegen alle tghenc dat voir den heemr. van Rijnlant gecomen is, so wijsen die voirsc. heemr. also sij warachtelic bevonden hebn dat Willam Kuser voirsc. die voirn. visscherie selve heeft doen bevisschen mit sijn selffs korven ende reescip ende die visch hem gelevert is en na horen rechten hair bode wel dagen mach, so sel die voirsc. Willam Kuser inden boeten vervallen wesen na wtwijsinge der hantveste, behoudeliken dat sij overdragen sijn mitten dijckgrave dat hij dat genedeliken beteren sall.

 

Location, Folio
OAR11, 58v-a
type : Keur	date : 1447-05-02	record : # 229
[018] Item also voirtijts gekuert is dat nyemant turff graven en sall binnen merken op i roeden na der meer anders dan op Bennebroeck dat soude wesen op xxv roeden op die boete van x lb., ende so veel gebroken dair inne gevallen ende men niet en laet om die boeten grotelic boven die kuer te delve, so hebn die dijckgrave ende heemr. van Rijnlant die voirsc. kueren verclaert dat so wie voirt an boven iiii dachvelde delve op elken morgen an een gelegen binnen den voirsc. merken dat die van elker tien dachvelde datter boven gedolven waren verbueren sullen x lb. Anno xlvii.

 

Location, Folio
OAR11, 58v-b-59r
type : Vonnis	date : 1447-06-27	record : # 230
[019] Item op die Does scouwe waren vergadert tot Leiden alle die heemr. Een vonnisse. Item also Jan Boem als procurateer vandes comenduers wegen van sinte Jan dingplechtich geworden is tegen den heemr. vanden Hogen veen, seggende in hoirre dingtalen dat die vanden Hogen veen den voirsc. comenduer ende sijn goeds huus scade gedaen hebn an zekeren lande leggende inden ambochte van Hazerswoude twelc dat sij offgevaeren, offgetreden ende off gedolven souden hebn boven enich eygendom dat sij dair an hebn mochten ende datmen den voirsc. omme daer dat sculdich wair te beteren bijden hgenheemr. mit meer woirden als sij hem in horen dingtalen vermaten, etc. dair op dat die voirsc. heemr. vanden Hogen veen antwoirden seggende dat sij der voirsc. heren lant niet offgevaren en hebn dan is die vaert gewyet dat is van hoir selffs gesciet wan dat lant an beiden zijden hem toe behoren soude, ende die kade den wal an die een zijde dat den Baerl heet tusschen der heren lant van sinte Jan ende hoir waterscip hem toebehoren soude ende dat rustelic ende vredelic gebrwct souden hebn ende hor banwerk dair op gemaect meer dan xlvii jair lang en bescouwet vanden scout van Hazerswoude als hoir antwoird dat sijt lange verclairde, etc., dair off dat partyen gegaen sijn aen een kenninge vanden hogen heemr., hier op hebn die heemr. voirsc. hem beraden ende getuuch dair off gehoirt ende die wel doirsien ende voirt alle besceit dat voir partyen voir hem ge- [59r] comen is, ende wijsen ende verclaren voir recht alle zaken wel overgewegen ende die kueren die sij vanden voirsc. Baerle vijnden bescreven dat die vanden Hogen veen den eygendom toebehoirt vander kade den Baerle heet iiii voeten breet ende twe voeten hoge wt den water. Ende die also sculdich sijn te houden buten des polres coste dair die omme gelegen is, dats te verstaen dat die aerde dairmen die voirsc. kade mede maken sall die vanden Hogen veen mit hem sullen doen brengen off ist dat die genomen wort omtrent der kade wt der heren lant van sinte Jan off anders, dat sullen die vanden Hogen veen altijt gelden totter hoge, heemr. gesceidenheit, ende geven dair om die vander Hogenveen die kenninge gewonnen ende den heren van sinte Jan verloren.

 

Location, Folio
OAR11, 59r-a
type : Consent	date : 1447-06-27	record : # 231
[057] Item op die tijt wort geconsenteert die van Benthuzen dat sij voirt an scouwen souden mit vijff heemr in alre manieren als sij te voren plagen mit seven hiemr.

 

Location, Folio
OAR11, 59r-b
type : Consent	date : 1447-06-27	record : # 232
[058] Item op die selve tijt wort geconsenteert dat die van Soetermeer voirt an scouwen sullen in alre manieren als die van Soeterwoude doen.

 

Location, Folio
OAR11, 59r-c
type : Consent	date : 1447-06-27	record : # 233
[059] Item op die selve tijt wort geconsenteert dien van Alphen den lagen dijck doirgaens te scouwen mit eenre souwe alst hem nutte dunct.

 

Location, Folio
OAR11, 59r-d
type : Consent	date : 1447-06-27	record : # 234
[060] Item op die selve tijt wort geconsenteert dien van Sassenhem den dijck te verhoeffslagen die neffen der muelen an die oostzijde ter meren wairt opstrecket.

 

Location, Folio
OAR11, 59r-e
type : Keur	date : 1447-06-27	record : # 235
[030] Item wat beest men vint upten Rijndijck die sal die scout of bode of hiemr. elcx inden zijnen scutten ende van elc eygen nemen x sc. Ende des gelijcx zullen scutten alle onse dienres ende des bailius boden elc in sijnen bedrive. Anno xlvii.

 

Location, Folio
OAR11, 59r-f
type : Scheiding	date : 1429-05-15	record : # 236
[004] Item in aldusdanigen voirwairden, zo zijn gesceyden die hiemr. an die een zijde ende Gerijt van Bosschuysens erfnamen an die ander zijde dair hij hair rekeninge mede voldoen also Gerijt van Bosschuysen rentemeester geweest heeft vanden voirsc. hiemr. Inden eersten zullen Gerijts erfnamen voirs. wtreyken ende betalen vijff ende veertich, een gouden croon ende een wilh. scilt gerekent voir den nobel, xv beyers gulden ende xliii oude botdragers, te betalen die een helft tsinte Jacops dage naestcomende ende die ander helft tsinte Martijns dage naestcomende. Ende wair dat sij niet en betailden tot den voirnoemden dagen elc sijn andeel te weten Gerijts wijf van Bosschuysen die een helfte dair Willem van [59v] Alcmade als een voicht van Gerijts weedwij voirs. die hiemr voir in die hant geset iii-1/2 morgen lants gelegen tot Alphen gelegen bijden blochuyse te houden tot enen vryen eygen horen vrieen wille mede te doen ende des gelijcx heeft Tielman voir die tweedeel van sessen den hiemr. in die hant geset iii morgen lants gelegen an die iii-1/2 morgens te verstaen in allen voirwairden voirsc. Ende Jan vander Geest lovede te voldaen van enen sestendeel mit scepene brieve binnen der stede van Leyden. Ende dit was anno xxxix in die heilige van pijnxster.

 

Location, Folio
OAR11, 59v-a
type : Keur	date : 1447-00-00	record : # 237
Item so en sel men den wech bij Floertgen an Zoetermeere meer niet op doen tot ghenen tijden op des hiemrader kuer.

 

Location, Folio
OAR11, 59v-b
type : Consent	date : 1421-1434	record : # 238
[025] Item Pieter Dever consenteert een brugge te leggen doer den wech voir sijn boomgairt ende to houden datse die scout mitten hiemr. prijset, durende tot onsen wederseggen.

 

Location, Folio
OAR11, 59v-c
type : Keur	date : 1421-1434	record : # 239
[031] Item soe wat banwerck tot Alphen blijft leggen ende nyement en bekent, dat salmen horen mit zeven die naist eygen banwerck gelegen inden zelve banne [in another hand: 'anno xlvii.']

 

Location, Folio
OAR11, 59v-d
type : Consent	date : 1421-1434	record : # 240
[026] Item geconsenteert die van Waddijnxveen te nemen die naeste airde tot minster scade haren heerwech mede te maken vande bruggen ter kerken toe, durende tot onsen weder seggen.

 

Location, Folio
OAR11, 59v-e
type : Keur	date : 1447-00-00	record : # 241
[060] Item gecuert alle die wercweer maken opten Schinckel dijk dat sij dair op scutten sullen elc tstuc op ii sc. Anno xlvii.

 

Location, Folio
OAR11, 59v-f
type : Consent	date : 1447-00-00	record : # 242
[027] Item geconsenteert Gelbairt Pieters z. ii bruggen to leggen doir elken wech, een om aldair doer te varen, ende dit sal geduren tot onsen weder seggen.

 

Location, Folio
OAR11, 59v-g
type : Scheiding	date : 1447-00-00	record : # 243
[016] Item so sellen Vrancken kinderen van Zanen kindern bliven inden eygendom vanden lande geheten den Droen, ende wes airde dair wt geslegen is zeer die tijt dat sij inden eygendom geweest hebben van dat Willems weduwij van Zanen dat overgaff, so sullen sij dat aertgelt zelve ontfaen of dijck recht plegen, ende wes wt den lande geslagen is zeer dat Vranck van Zanen voirvluchtich was tot dat zijt nu weder an tasten, dat sal staen tot goetdencken des raets also dat der zuen an roert.

 

Go to Folio's ...
13	20	30	40	50	60	70

 

Author	Publication	Home
William H. TeBrake Maine, USA, June 2006	Rijnland OAR11, OAR12, OAR13	www.oudleiden.nl

 

Hoogheemraadschap Rijnland OAR 11, 12, 13 : 1253 - 1564
	View: Register OAR 11 Pages 40 - 49

 

Go to Folio's ...
13	20	30	40	50	60	70

 

Location, Folio
OAR11, 40r-a
type : Consent	date : 1440-04-01	record : # 140
Item soe sullen die van Zegwairt ende Zoetermeer den sloot gebrucken ter tijt toe dat die voirs. kade twe speet hoge is.

 

Location, Folio
OAR11, 40r-b
type : Keur	date : 1440-06-28	record : # 141
Anno xl tot sinte Jans scouwe. Item den omme dijck van Voirscoten te aerden aldair Reyner die pael stack ende dat gat sullen die van Voirscoten eens dicht maken ende voirt meer selt maken die den sloot sijn is.

 

Location, Folio
OAR11, 40r-c
type : Consent	date : 1440-06-28	record : # 142
[010] Item geconsenteert die van Coudekerck op die oude koer vanden sloten van vijftich roeden, dat sullen die scout ende heemr. aldair ordinieren hondert roeden of meer soe dat nutte wesen sal bij horen eede ende tot sulken tijden alse nutte is, durende tot onsen wederseggen.

 

Location, Folio
OAR11, 40r-d
type : Keur	date : 1440-06-28	record : # 143
Item so sel den Hogen waertsen dijck bliven leggen soe hi van outs gelegen heeft ten sij dat die meerre meijn vanden ghenen die dair in gelant sijn dien hoefslach begeren.

 

Location, Folio
OAR11, 40r-e
type : Scheiding	date : 1440-08-31	record : # 144
[008] Anno xl opten lesten dach van augusto. Item so hebben die heemr. van Rijnlant als heer Gerijt van Poelgeest, ridder, Jan vanden Boechorst, Willem van Alkemade, Florijs Paedzen ende IJsbrant van Scoten mit horen dijcgrave opten dijck voir Aemsterdam die poorters van Aemsterdam, also sij clagende waren op die van Sloten als van aertgelt gesceyden, ende die poorters van Aemsterdam toe geseit dat die van Sloten hun geven souden van elke roede van horen lande dat sij wt geslagen is enen ouden boddragher to betalen binnen xiiii dagen.

 

Location, Folio
OAR11, 40r-f
type : Consent	date : 1440-10-04	record : # 145
[011] Anno xl tot Bamisse. Item die heemr. hebben consenteert die van Leyderdorp dat sij hoir kadijc sullen verhueren bij drie of vier manne die sij samentlijck dair toe kiesen ende die sullen den dijck doen maken also hij hun nutte dunct wesen, ende dien onkost sullen sij eens des jairs rekenen op den genen die dair onder bescutt sijn bijden scout, heemr. ende buer. Dit sel geduren tot onsen wederseggen.

 

Location, Folio
OAR11, 40r-g
type : Keur	date : 1440-10-04	record : # 146
[016] Item so sijn die heemr. overdragen dat die stoelinge in Sparenwoude sel bliven van wairden ter tijt dat die buten gelant sijn ende in beclachte geweest hebben mit rechte voir ons dat vorder vervolgen ende rechts der of plegen voir ons ende nyemant anders. Dese heemr. waren Poelgeest, Boechorst, Alcmade, Zwieten, Paedze ende Scoten.

 

Location, Folio
OAR11, 40v-a
type : Consent	date : 1441-06-27	record : # 147
Anno xli sinte Johan. Item Dirc van Zwieten sel visschen dien Noort Ade tot goetduncken den heemr. ende die Zwiet niet visschen tot genen tijden.

 

Location, Folio
OAR11, 40v-b
type : Keur	date : 1441-06-28	record : # 148
[004] Item die heemr. mit horen dijcgrave hebben hair hooftscouwen geleyt des dijnxdage na meyen dach, des dijnxdage na sinte Johans dach Baptist, des dijnxdage na sinte Baven dach ende des dijnxdage na sinte Pieters dach.

 

Location, Folio
OAR11, 40v-c
type : Keur	date : 1441-06-28	record : # 149
Item so hebben die heemr. belieft alsulke stoelinge ende hoefslach als die van Zoetermeer nu zeer meye gehoefslacht hebben.

 

Location, Folio
OAR11, 40v-d
type : Consent	date : 1441-06-28	record : # 150
[012] Item Bosch Jans z. consenteert wt sijn lant in Zoeterwoude te delven drie dage des jairs dair voir in handen geset dat quade lant an te verhalen inden selven ambocht xiiii hont lants gelegen op ten Vliet an Bolgher wout.

 

Location, Folio
OAR11, 40v-e
type : Scheiding	date : 1441-06-28	record : # 151
[000] [000] [024] Item soe hebben die heemr. gedadinct tusschen heer Claes van Sparenwoude ende heer Jan Allerts z. Soe sel heer Claes hebben x scilde sjairs sijn leven lanc, daer is borghe voir Aelbrecht Allerts z.. Ende storve heer Jan, so soude die x scilde quijt wesen ende die kerken goeden souden dan vrij an die kerke comen gelijc men dat bebrieven sal mit mijns heren brieve van Bourgonen [Philip the Good] ende der stede van Hairlem. Ende storve heer Claes, so soude heer Jan quite wesen van die x scilde ende van een ygelijc voirt an.

 

Location, Folio
OAR11, 40v-f
type : Keur	date : 1441-09-12	record : # 152
[056] Anno xli des dijnxdage na nativitas marie opten dijck, heemr. Poelgeest, Alcmade, Zwieten, Paedze ende Scoten cuerden: Item die Spaern scoon te maken bij dat rosen proyeel gelijc gepaelt was an te vaen voir Bamisse ende te volmaken voir omnium sanctorum of die stede en soudense hijm niet bewinden. Ende die burgermeesters waren Pieter Gerijts z. ende Simon van Noortich die oude deken ende Jan vander Laen deken iegenwoirdich.

 

Location, Folio
OAR11, 40v-g
type : Beveling	date : 1441-09-12	record : # 153
[009] Item is den rentemeester van Rynsburch geseit dat hij den lagen wech bij Noortich doe maken als gewoenlic is of die dijcgrave mitten heemr. sullen doen maken tenden xiiii dagen.

 

Location, Folio
OAR11, 40v-h-41r
type : Keur	date : 1441-10-03	record : # 154
[057] Anno xli op sinte Victoors dach. Item alle die heemr. Item soe wort op die tijt overdragen vanden sceepe an die Grote sluse die die ambochten hadden doen maken dair en sullen sij niet weder of hebben. Ende wat si gecost hebben weder te leggen so si op gebroken waren, dair en sullen die dorpen niet of gelden. Ende wat dair voirt meer an buert te maken, dat sullen die dorpen maken die een helft [41r] ende die van Sparendam die ander helft. Ende wair enich van beyden partyen die als dan geen cost dair an leggen en wouden, die soude staen te recht voir ons ende vanden voirs. overdracht ongehouden wesen.

 

Location, Folio
OAR11, 41r-a
type : Vonnis	date : 1442-05-01	record : # 155
[032] Anno xlii meye die heemr. Poelgeest, Boechorst, Alcmade, Zwieten ende Scoten. Item die heemr. gewijst dat Simon Heynric z. mit sinen gesellen sullen him ofdijcken of mit die van Valkenburch te gelden of mit recht te weten [waren?], Claes Claes z. is willich op geset tot dat die onwillige verwonnen sijn.

 

Location, Folio
OAR11, 41r-b
type : Consent	date : 1442-06-26	record : # 156
Anno xlii sinte Johans scouwe bijden holeix heemr. Item die van Alphen oorlof gegeven den ouden Kercsloot op te doen ende een brugge mit twe wacht doren dair in te maken bij prijs vanden heemr., durende tot onsen wederseggen.

 

Location, Folio
OAR11, 41r-c
type : Consent	date : 1442-06-26	record : # 157
Item Bartout van Assendelf is gebleven onder heemr. te ende ter naester scouwe tot Hairlem of hij mach aldair recht nemen of hi wil.

 

Location, Folio
OAR11, 41r-d-41v
type : Keur	date : 1442-10-02	record : # 158
[115] Anno xlii te Bamisse heemr. bij hem woirt doe gekoert die van Koudekerck een waterganck doir ofwegen in die A ende dien cost dair of selmen gelden als hier na gescr. staet. Item van die nyewe vaert ende kaadijck tot Koudekerck so die koer in hout datmen dien cost gelden sal bijden heemr., dair of is die koer vanden heemr. datmen dien oncost gelden sal gelijc hier na gescreven staet. Dats te weten, vanden cost vander nyewer kade beyde delven ende oncost van delven tot in die A toe ende dat lant te betalen sullen gelden dat hele lant van Coudekerck, wtgesceyden den Hogen Wairt ende dat lant dat an Outschoern buten gekadet is dat sel dair quijt of wesen. Item soe sullen dese voirs. die dese nyuewe kade gelden sullen weder vercopen die oude kade op Heymants weteringe gelegen ende die sel him te baten comen, ende den Hogen Wairde niet, mer die buten gekadet sijn sullen hoir aendel dair of hebben na grootheit van horen lande. Item den oncost vanden nyewe sluse sullen gelden alle die binnen gekadet sijn ende den Hogen Wairde sel die sluse mede gelden morgen morgen gelijc overmits dat alle sluse ende bruggen vanden helen ambochten alle tijt ghemact sijn ende die Dwers weteringe te maken sel ghelden die eygen, ende den huyrman niet. Ende want den ouden afterdijck veel te lage is, die sal die huyrman hogen buten des lants cost, elc tenden sinen lande in manyeren als die heemr dat koeren sullen [41v] als him dat nutte dunct wesen tot eenre tijt als die heemr. hoer eerste koer op leggen sullen.

 

Location, Folio
OAR11, 41v-a
type : Scheiding	date : 1443-02-24	record : # 159
[003] Anno xliii op sinte Pieters scouwe heemr. Poelgeest, Boechorst, Paedzen ende Scoten. Item soe wij heer Claes van Sparenwoude ende heer Jan Allert zoon gesceyden hadden anno xli tot Leyden op sinte Johans scouwe gelijc voer inden boeke gescreven staet, dair wij nu onse verclaringe of gedaen hebben in manieren hier na gescreven. Inden eersten soe is heer Claes to ghevonden die kerck laen mit also veel oeter dijcx als die laen breet is ende voirt x phs. scilde sjairs also lange als heer Claes levet die heer Jan wtregken sel dair Aelbrecht Allert z. voir loven sal mitter stede brieve van Hairlem geliken in dat voir gesceyt gescreven stait. Ende wair dat heer Jan oflivich worde voir heer Claes, soe soude heer Jans erven ende Aelbrecht voirseit qwijt wesen vanden voirs. x schilden. Ende dese voirs. x schilde sel heer Jan ende Aelbrecht voirs. alle jair betalen tot sinte Odulphus dage of binnen achte dagen dair na onbegrepen alle argelist wtgesceyden. Ende heer Claes sal heer Jan weder geven enen stede brief van Hairlem dat hi voirt an ongemoeyt sal wesen, dats te weten van al dat heer Claes heer Jan eyschende mach wesen roerende der kerken lande van Sparenwoude ende al dat dair an cleven mach. Item soe heer Jan enen brief heeft van onsen genadigen heer van Bourgon. [Philip the Good] roerende onse eerst gesceyt, soe sel hi weder over geven alsulken brieve als hi van ons heemr. hevet roerende vanden kerken lande van Sparenwoude die him mit dijck recht toe gewijst waren, te weten dat ons genadichs heren brieve inhouden wair dat heer Claes oflivich worde voir heer Jan dat heer Jan dan die kerke besitten sal na wtwisinge der brieven, ende wair dat heer Jan geen presentacy van onsen genadigen heer ende vercrege dat god verbieden moet, so souden sij dan gehouden wesen heren Jan ter stont sinen dijcbrieve weder te leveren in allen scijn ende in alre machten als sij waren eer wij onse eerst gesceit dair of wt spraken, op sinte Johans scouwe anno xli, ende dese voirs. dijckbrief selmen ter stont leggen onder den commenduer van sinte Johan tot Hairlem. Ende tot wat tijden dat heer Jan versekert is of oflivich worde, so sullen wij heemr. die nu sijn of na ons wesen sullen die dijcbrieve weder na ons nemen ende die cancelleren ende te niete maken als dat behoren sal. [In another hand: 'Desen brief is gecanceleert.']

 

Location, Folio
OAR11, 41v-b
type : Keur	date : 1443-03-13	record : # 160
[156] [012] Anno xliii tot Lisse des dages na Gregorij heemr. Poelgeest, Alcmade, Boechorst, Paeds ende Scoten. Item so sullen die van Zoeterwoude ende Voirscoten dat gat in Stompwijc toe slaen binnen deser nyewer weke naestcomende ende men sel bieden dater nyemant doer en vaer op die boete van x lb.

 

Location, Folio
OAR11, 42r-a
type : Consent	date : 1443-03-13	record : # 161
[086] [107] Anno xliii tot Lisse des dages na Gregorij heemr. Poelgeest, Alcmade, Boechorst, Paeds ende Scoten. Item so die van Stompwijc waterscup begeren biden ommedijck dairt nutte is ten sij dat Boudwijn van Zweten bewijsen conde dat hij dair bij bescadicht wair, so souden die heemr. anders hem dair in voirsien ende dat bewijs sal hij doen voir paeschen naest comende of het sal gemaect worden gelijc voirs. is, durende tot onsen wederseggen.

 

Location, Folio
OAR11, 42r-b
type : Consent	date : 1443-03-13	record : # 162
[087] [024] Anno xliii tot Lisse des dages na Gregorij heemr. Poelgeest, Alcmade, Boechorst, Paeds ende Scoten. Item so sal die metinge die is ende men doen sal tot Hasertswoude bliven ende van wairde wesen ende dat bescreven in drien boeken, dair die heemraet dat een of hebben sullen ende die stede van Leyden dat andere ende dat ambocht dat derde. Des sullen si niet meer mit ons noch in an den ongelde buten haren ambocht gelden dan sij tot hair to gedaen hebben, durende tot onsen wederseggen. Ende so wes dair meer morgen sijn dat sel gelden gelijc alle ander hoir lant hem te baten te comen binnen horen ambocht van horen oncost. Ende si sullen alle jair hair rekeninge brengen den heemraet van allen cost als penninc gelt, slusen, plaetwerc, dijc, dam, watergange ende wege gelijc men ander wege doet.

 

Location, Folio
OAR11, 42r-c
type : Scheiding	date : 1443-03-13	record : # 163
[011] Anno xliii tot Lisse des dages na Gregorij heemr. Poelgeest, Alcmade, Boechorst, Paeds ende Scoten. Item die van Woirden wort geantwort vanden heemraet van Rijnlant als van sulc morgengelt als enige scouten ontfingen ende niet te rekeninge en brochten dat si die scouten onder him niet hengen en soude, mer tot Hazertswoude was dat lant gemeten ende dair was overmaet boven dat sij inden ouden boeken gestaen hadden ende die overmaet quam den dorp binnen horen ambocht te baten ende niemant anders. Ende voirt wisten si mogelijc wel wat haer hantvesten in hielden ende hoe si him dair na rechten souden.

 

Location, Folio
OAR11, 42r-d
type : Besteding	date : 1443-05-19	record : # 164
[003] Anno xliii, xix dage in meye, heemr. Poelgeest, Alcmade, Boechorst, Zwieten, Paeds ende Scoten. Item soe wilmen besteden Alcmader sluse mit hoir gesellen een nuwe doerbint ende doeren gelijc dat oude scampelioen, ende dair toe twe nuwe stilen, ende noch een damme te maken, ende desen damme te houden die dair is soe datmen die sluse op ofen mach ende dat bint setten op enen drogen dichten boom ende dien damme weder op te winnen ende boven dicht te maken aldair die damme gelegen hebben, ende die vergaderinge te decken mit een dwers plancke. Ende mn sal besteden bij ponden, xv stuvers voir dat lb. of payment hoirre wairde, ende het sal gemaect wesen binnen vier weken ende men sel betalen op die Bamisse scouwe. Besteet Claes Heynrics z. om xxix lb.

 

Location, Folio
OAR11, 42r-e
type : Besteding	date : 1443-05-19	record : # 165
[004] Anno xliii, xix dage in meye, heemr. Poelgeest, Alcmade, Boechorst, Zwieten, Paeds ende Scoten. Item Aelsmer sluse salmen twe nyewe doeren an maken binnen vier weken bij ponden xv nye placken voirt lb. te betalen tot Bamisse scouwe. Besteet Noortgen om x lb.

 

Location, Folio
OAR11, 42v-a
type : Besteding	date : 1443-05-19	record : # 166
[005] Anno xliii, xix dage in meye, heemr. Poelgeest, Alcmade, Boechorst, Zwieten, Paeds ende Scoten. Item die heemr. willen besteden die sluse van Hairlem te verplancken na dat oude scampelioen als sij geweest heeft een plancke onder water ende sel gemaect wesen mit plancken, ijser ende aerdwerck voir sinte Jacops dach naest comende te betalen bij ponden xv nyewe placken voir dat pont, ende men sel betalen op die Bamisse souwe mit voir wairden dat die in die sluse horen die voir koer sullen hebben of sise selve maken willen ende dair een wete of te doen den genen diese an nemen binnen acht dagen, ende soe wie die sluse aen nemet te maken sel die oude plancken hebben. Claes Dirc z. aen genomen om xcvii lb.

 

Location, Folio
OAR11, 42v-b
type : Besteding	date : 1443-05-19	record : # 167
[006] Anno xliii, xix dage in meye, heemr. Poelgeest, Alcmade, Boechorst, Zwieten, Paeds ende Scoten. Item soe selmen die grote sluse maken nader koer, dats te weten te dammen binnen die sluse mit twe dammen ende een nyewe doerbindt ende een bindt dair op, ende noch achte nyewe binden meer oft noot is ende plancken dair na volgende gelijc dat oude hout geweest heeft, ende dit sel gemaect wesen voir sinte Berteelmees dach naest comende. Dat hebben den ambochten selve doen maken.

 

Location, Folio
OAR11, 42v-c
type : Besteding	date : 1443-05-19	record : # 168
[007] [008] Anno xliii, xix dage in meye, heemr. Poelgeest, Alcmade, Boechorst, Zwieten, Paeds ende Scoten. Item te aerden op Sparendamme vander straet of den waghenwech breet dat sel maken, elx voir sijn doer, ende die aerde sel men halen inden Droen ende betalen naden koer, ende het sel gemaect wesen voir sinte Johans dach op die boete dat derdendeel van x lb., ende men sal die huse wegen straet hoge.

 

Location, Folio
OAR11, 42v-d
type : Besteding	date : 1443-05-19	record : # 169
[008] Anno xliii, xix dage in meye, heemr. Poelgeest, Alcmade, Boechorst, Zwieten, Paeds ende Scoten. Item soe wil die heemr vandes landts wegen besteden den Kulc te aerden dat den lande toe behoort, te weten een roede breet bij ponden xv nyewe placken voirt lb. te betalen te Bamisse scouwe, te maken binnen een maent. Ende alle die plaetwerc van outs dat Spaernlant hadden, die sullen hair aendeel nemen op die selve zijde als van outs lach ende beginnen an die Grote sluse after werts streckende, ende die aerde selmen halen ter naester aerde ter minster scade, ende die sel dat lant selve betalen.

 

Location, Folio
OAR11, 42v-e
type : Keur	date : 1443-05-19	record : # 170
[151] Anno xliii, xix dage in meye, heemr. Poelgeest, Alcmade, Boechorst, Zwieten, Paeds ende Scoten. Item tot Zassenhem ende tot Warmond in Voirhouter wateringe, scotdoeren te maken voir Lamberti. Dat sel doen Noortich, Noortigherhout ende Voirhout.

 

Location, Folio
OAR11, 42v-f
type : Keur	date : 1443-05-19	record : # 171
[152] Anno xliii, xix dage in meye, heemr. Poelgeest, Alcmade, Boechorst, Zwieten, Paeds ende Scoten. Item een scouwe sloot an die Zwet an Voirhouter zijde van viii voet.

 

Location, Folio
OAR11, 43r-a
type : Keur	date : 1443-06-29	record : # 172
[136] Sinte Johans scouwe anno xliii. Item soe hebben die heemr. ende dijcgrave gekoert dat die scout van Alcmade mit sijn heemr. hair scouwen in die kercke bieden sullen achte dage te voren, ende op dien dach scouwen elx eygen op twe sc. die ongemaect sijn, ende die selmen openbaer besteden te maken om den minsten cost te maken binnen viii dagen. Ende dair sel die scout mit sijn heemr. hair scouwe op leggen opten viii dach ende dat weder bescouwen opter geenre cost die sijn werc op die voir scouwe ongemaect was. Ende die eerste scouwe dien cost selmen doen op die boeten ende, sijn die boeten niet alsoe groot als dien cost, so sal die cost voirt dat ambocht betalen bij goetduncken vanden heemr., durende tot onsen wederseggen.

 

Location, Folio
OAR11, 43r-b
type : Keur	date : 1443-06-29	record : # 173
[148] Sinte Johans scouwe anno xliii. Item in deser manieren [refering to the manner in which Alkemade carried out its schouw] sullen scouwen die van heren Jacops wout, Leydemuden, Reynsaterwoude ende Vriesecoop ende alle ander die des begeren.

 

Location, Folio
OAR11, 43r-c-43v
type : Besteding	date : 1443-05-19	record : # 174
[009] Anno xliii negentien dage in meye. Item in aldustanighe voirwairden ende manieren, soe willen die heemr. van Rijnlant besteden een nyewe sluse te maken geheten die Hoghe sluse, toebehorende die vander Aer ende vander Scoot, Riedewijck ende Nyewerkerck mit horen mede pleghers. Item eerst soe sellen dair in wesen xlii gebinden enen over dat anderde gecarbeelt. Item dat doir gebint mit die twee vloeghel binden voets kant vier kant. Item die gordinge die sellen wesen tien dwmen breet ende vijf dick. Item die balcken die sellen wesen tien ende een halven dwm. Item die stilen die sellen wesen tien dwmen dick. Item die quespen sullen wesen viii ende een half dwm dick. Item dat cloosterhout sel wesen xii dwmen breet ende v- 1/2 dick. Item die sluse sel wesen xii ende 1/2 wijt. Item die hoecht sel wesen x voet. Item die stilen ende dat raemt daer die doer of gemaect, die sellen breet wesen x dwmen ende v dick. Item die plancken dair si mede ghestopt sullen wesen i-1/2 dwm dyck. Item alle dit werck sel wesen leydsche voet ende die voet xii dwm. Item die scoren beneden an die sluse dier selre wesen iii, die een sel legghen midden tegens die doer stijl geleghert op die quespen, die ander twee an die zijden streckende an dat doerbint ende geleghert an die stijlen, ende die plancken boven ende besijden [43v] ende alle houtwerck na dat scampelioen, ende alle houtwerck sal wesen van goeden canthout [ganchout?] ende deventers hout wercbaer sonder spint of rootolm. Ende soe wie dese sluse anneemt te maken, die sel borge setten voir die sluse dair den heemr. ende den lande die die sluse toe behoirt an ghenoecht, ende dese sluse selmen leveren te vollen ghemaect tot sinte Lambrechts dage van hout, van aerde, van yser als hair toe behoirt. Item so wil die heemr. dese sluse besteden bi ponden xv nyewe stuvers [pl.?] voir i pont of payment hoirre wairde, ende die dage van betalinge sullen wesen een derdendeel binnen vi weken ende dat andere derdendeel binnen vi weken dair na ende dat derde derdendeel tot die Bamis scouwe als die sluse op ghelevert is te vollen prise. Item so sullen die ghene die die sluse an nemen den heemr. geven voir horen ende horen dieneren ritsoen als van outs gewoenlic is, dats te weten xii nobel ende een nobel te wijncoep. Item worde die sluse niet gemaect totten voirnoemden dage, dat woude die heemr. corrigieren tot hoirsselfs goetduncken. Item voirt sel dese sluse gemaect wesen van hout, yser ende aerde als een goede sluse toebihoirt na ouden costumen. Item dese sluse heeft an genomen te maken Claes Dircx z. tymmerman ende Dirc Florijs z. van Leyden om v c lxxxv lb. Item die heemr. die dese sluse besteden waren Poelgeest, Alcmade, Boechorst, Paeds ende Scoten.

 

Location, Folio
OAR11, 43v-a-48r
type : Vonnis	date : 1443-10-01	record : # 175
[033] Item omtrent Bamisse anno xliii. Soe hebben Hughe Albout ende Claes van Boschusen op dese tijt burgermeysteren van Hairlem ende van Leyden beclaecht die hoge heemrade van Rijnland voir den heer van Lalaing gouvenuer ende anders die rade mijn genadichs heren als Gerijt van Poelheest, Gerijt van Zijl, Willem van Alcmade, ridderen, Jan vander Boechorst, Boudijn van Zweten, Florijs Paedze ende Ijsbrant van Scoten, knapen ende hoge heemraden van Rijnlant up dese tijt inder manieren hier na volgende. Item clage der burgermeystern voirs. 'Item vermoegende edele heer van Lalaing gouvenuer ende ghij vrome ende wijse heren vanden hogen rade mijns liefs genadichs heren van Bourgondien gestelt tsijnre lande van Hollant, Zeelant ende Vrieslant, want die steden van Hairlem ende Leyden zeekere privilegien ende [44r] hantvesten hebben na verwijsinge enige copyen die sij u lieve heren overgeven, wair om lieve heren sij uwer eerbaerheit bidden als sij cormoedelicste mogen dat hun hoir privilegien ende hantvesten gehouden worden dat hun tot hoir toe niet en heeft mogen bueren. Voirt lieve heren vanden rade als vanden penninck gelde, sluysen, verlaten, morgengelde, ander ongelt ende ommeslach dat setten sij in handen mijns genadichs heren wes sijnre genaden dair in belieft dair sijn sij in te vreden, behoudelic dat sij hoire hantvesten gebrucken mogen. Voirt so menen sij als vanden verlate dat lest werf besteedt wert ende grote Reyner an nam datmen bevinden sal dat enige vanden heemrade half dat hout gecoft ende dat loon dair off te halven betaelt hebben, ende wes dair of gesciet is dat selmen toten ondersoeck van minen here van Lalaing.' Antwoirde der heemrade van Rijnlant op dese voirscr. clachte. 'Antwoirde der hoger heemrade van Rijnlant up sulke cedule als hun gelevert is bijden here van Lalaing van weghen der steden van Hairlem ende van Leyden inhoudende eerst aldus, want die steden van Hairlem ende van Leyden zeekere privilgien ende hantvesten hebben na verwisinge enighe copyen die sij overgeven, so bidden sij dat hem hair privilegien ende hantvesten gehouden worden dat hem tot hair toe niet en heeft mogen bueren, wair up die heemr. als dienres ende bewairres des gemeens lants also verre alst horen dienst angaet ende up corectie vanden edelen ende gemenen ingeseten hoirre heemraedscip verantwoirden dat die privilegien ende hantvesten die die steden van Hairlem ende van Leyden seggen hebben alst scijnt bijder voirscr. copye, in dien dat sij die hebben van geenre wairde en is ende na allen rechts doot, te niete ende van onwairden, want sij niet doghentlijck vercregen en sijn angesien dat dat is yegen den eet die die heemr. doen mooten, die in eenen punt inhout dat sij die lage mogen doen sullen gelijck den hogen, den armen gelijck den riken ende dair om en [44v] sijn die buergermeysters niet vorder dair in gerekent dan lantgenoten. Ende aldus en heeft die grave niet gegevene doe hij hem die hantveste gaff dat van wairden is gemerct, dat si out sijn omtrent xlvii jair, ende nye sint dat sij gegeven sijn noch bij dies graven tijden diese selve gegeven mach hebben noch bij geens anders graven tijden van Hollant sint dier tijt wesende tot desen dage toe gepossesseert off gebruyct hebben geweest, ende gedragen hem dies anden rechte. Ende al wairt dat sij van wairden waren als sij niet en sijn, so en sijn die heemr. dair van sij begeven die gehouden te hebben dat niet sculdich noch machtich te doen bi redene hier na verclairt. Die eerst is dese, die copye vanden hantveste voirscr. hout dat niet in rekeninge te doen ten sij dat die heemraders mit anderen brieven bewijsen mogen dat des billicken niet wesen en sall, so onderwijsen die hiemraders voirs. als boven dair up dat sint der tijt dat Sparendam eerst gedijct was ende die hiemraden eerst geset ende gecordineert hebben geweest dat gemeen landt dair onder gelegen goede privielgien ende hantvesten heeft van grave Florijs van Hollant beginnende tot nu toe, dair up hair voirsaten voir ende sij bij hoirren tijt die dijckaedze ende hiemraetscip ende all dat dair an cleeft geregiert ende bewairt hebben, dair sij toe geedt ende gesworen sijn ende die hantvesten ende rechten en houden nergens in eniger punte dat die heemraden rekeninge doen sullen voir yemande ende dair bij en sijn sij doch niet sculdich enige rekeninge bijden steden van Hairlem ende van Leyden te doen. Die andere redenen is dese, want die hiemraders geen ontfangers noch omme setters en sijn van enigen morgengelde dat ergent in enigen ambochten geset off gegadert wort van wat stucken dattet oick sijn van dijcken, sluysen, spuyen, huelen off wateringen dan hair penninck gelt alleen, ende dat dat doen die ambochts bewairres in allen ambochten die bijden gemeenten ende niet bijden hiemraders geset ende gekoren worde, ende sij oick van genen wercken niet wt en geven, so en mogen sij geen rekeninge doen van enich morgengelt off ommesettinge noch oich sculdich en sijn te doen, mar is wail een gewoente, want die hiemraden den lande verbonden sijn mit eede dat sij om dat lant ende lantgenoten te besorgen als enige ambochte enige wercken hebben doen maken dair sij morgengelt om setten moeten, dat sij die settinge plegen te oversien ende wair voir dat gelt gegadert sal worden, om offer yet onredelicx inden ambochts bewairres rekeninge wair dat te corrigieren dair an dat sij billick geven ondanck mer danck verdienen. Ende men sal oick niet vinden dat die ambochts bewairres den hiemraden ergent yet rekenen gegven dan hair pennincgelt voirs. Ende om vorder te onderwijsen, soe ist een gewoente in allen ambochten als die ambochts bewairres jair rekeninge doen sullen dat sij dat te voren openbaerlic doen kondigen xiiii of viii dagen te voren in allen kercken dairs noot is up dat die lantgenoten dair onder gelant die hair rekeninge willen horen dair bij comen mogen. [45r] Upten ander punt dat die voirscr. steden van Hairlem ende van Leyden scriven als vanden penninckgelde, sluysen, verlaten, morgengelt, ander ongelt ende ommeslach dat setten sij in mijns genadichs heren handen wes sijnre genade dair in belieft dair sijn sij in te vrede. Dair up is der heemr. antwoirde dattet penninckgelt sint Sparendam eerst gedijct was altoos gewoenlic is geweest te geven ende dat alle die heemr. die voir geweest sijn ende nu sijn dat gehadt hebben voir horen coste ende arbeit so dat niemant die contrarie bewijsen en sall, ende dair om die nu sijn dat oick sijn sculdich te hebben ende te ontfangen, ende dat die voirs. steden te breden sijn mit dat mijn genadige heer dair in belieft, dat hebben sij goet te lijden want sij als lichaem vanden steden geen seggen dair in en hebben vorder dan hoir poorters die lant hebben als andere lantgenoten. Ende als vanden sluysen, verlaten, morgengelde ende ommeslach hebben die heemrade genoich verantwoirdt int voorste artikel dat sij hem dair off niet en onderwinden van ontfaen noch van wtgeven ende dat sij gewijst hebben an wien dat dat coomt. Item up dat derde punt dat aldus begint 'so menen sij als vanden verlate dat lest besteedt was' etc., so verantwoirden dair op die hiemraders dat hun vreemde dunct van burgermeysters van steden dat sij upten hiemr. clagen bij mene ende dat sij dat niet verhouden en hebben totter tijt toe dat sij hoir clage van dien punte vast setten ende oick bij namen niet en noemen enich vanden hiemraders die sij yet an seggen willen, ende want dit verlaet hoiren kueren an roert, so en sij sij niet sculdich dair up te verantwoirden noch van horen vonnissen, want die graeflicheyt dat horen eedt bevolen heeft, ende want datter yemant yegens dede, die soude verbueren die hoichste buete die sij wijsen mogen na wtwijsinge der hantveste, ende wantter een out verlaet was dat hebben sij wt gekuert ende een nye dair voir ende dat besteedt als sij sculdich sijn te doen van horen diensts wegen. Item repliek der burgermeystern upter heemr. antwoirde. Up tgeent [form of hetgeen] dat die hiemraders verantwoirden dat die hantvesten die die steden seggen te hebben van geenre wairde en is want sij niet dogenclic vercregen en sijn ende dat sij tot deser dage toe niet gepossesseert noch gebruyct hebben geweest ende datmen in [45v] genen hantvesten noch rechten vinden en sal dat sij voir yemant sculdich sijn rekeninge te doen want sij ontfangers noch omme setters en sijn ende oick van genen wercken niet wt en geven, etc., hier up verantwoirden die steden dat die hantveste van wairde is ende wesen sal wantse hertoge Aelbrecht grave van Hollant zaligher gedachten bij sinen hogen wijsen ende mit voirsienicheit verleent ende gegeven heeft gelijken dat wtscrift vanden selver hantveste hier na bescreven volgende dat wtwijst upt punt dat die hantveste niet doghentlic vercregen en is, etc., twelke die steden verdunct nader groter voirsienigheit wijsheit diemen inden hiemraden seit te wesen dat sij mit sulken redenen den steden betalen willen, want onse genadige heer die voirs. hantveste ende andere confirmeert heeft om die te gebruken so dat die steden an sijnre genaden begeren ende oitmoedeliken bidden dat onse genadige heer dat punt voir den steden verantwoirden wil, so den steden dunct datter sijnre genaden ende heerlicheden meer an cleeft dan hun selven. Ende also die hiemraders over geven dat die hantveste niet gepossesseert en is, etc., dairup verantwoirden die steden dat sij anders niet en wete danse gepossesseert ende gebruyct heeft geweest is, mer heeftse niet gebruyct geweest dats overmits dat die landen in groten twijdracht ende perikel geweest ende gestaen hebben, mer nu die landen ende steden eens ende in goedn vreden sijn dair onse heer god in gelooft ende in geeert sij, so ist dat die steden voirs. nu meer vervolchs hebben van hoiren poorteren dan sij up anderen tijden gehadt hebben diet hem luden clagelic te kennen hebben gegeven hoe die hiemraders mit hem luden omme gegaen hebben. Ende al ist dat die hiemraders scriven dat sij ontfangers noch ommesetters en sijn ende oick niet wt en geven, sij sijn doch dat ende all, ende men van genen saken niet doen en mach noch ende doet ten sij wt hem ende bij hem. Item up tgeent dat die hyemraders verantwoirden als vanden penninck gelde dat sij dat altijt gehadt hebben ende dat dat lichaem vanden steden geen seggen dair meer in en hebben dan hair poorteren die lant hebben ende anderen lantgenoten, etc., hier up verantwoirden die steden want sij horen poorteren ende ommesaten verbonden sijn mit eede of men hun ongelijck doen woude dat sijse dair inne sculdich sijn te verantwoirden ende te verdadinge ende of die hiemraders hoir penninck gelt hoger setten ende nemen wouden dan sij van rechts wegen sculdich waren te doen dat sij dat bijden lichaem vanden steden mogelijc of laten souden na inhout der hantveste, mer niet min die steden setten dat tot kenissen van minen heer van Lalaing inden name van mine genadigen heer ende oick na wtwisinge hoire eygenre hantvesten willen sij die voirt brengen dair men wail in bevinden sal wat sij nemen sullen. [46r] Item up tgeent dat die heemraders verantwoirden dat hun vreemde dunct vanden burgermeesters vanden steden up den hiemr. te clagen bij meenen ende want sij niemant bij namen en noemen vanden hiemraders die sij yet an seggen will, hier up verantwoirden die steden dat dat bijden ondersoeck wes dair of is wel bevonden sal worden. Hertoge Aelbrechts hantvest gegeven inden jare m ccc xcvi op sinte Lambrechts dach pr-----, domino de Gommengijss, domino Brusonis [Brustijns?] de Herwijnde et domino Johanne de Renesse consulibus Welhelmus archideaconis Gerbrandi de Couster prepositus Monten. Hannon. ''Wij hebben gegeven ons stede van Hairlem als dat onse heemr. van Rijnlant die nu sijn of namaels wesen sullen geen morgengelt gaderen noch setten en sullen ten sij bij een of twee van onsen rade die wij dair toe voegen sullen ende bij onsen steden van Hairlem ende van Leyden, ende dair sullen onse hiemraders voirscr. goede rekeninge ende bewijsinge off doen eer sij enige morgengelt gaderen off setten mogen ten sij dat die selve heemraders mit anderen brieven bewijsen mogen dat des billicx niet wesen en sal.''' Duplike der heemrade van Rijnlant upter der steden replike voirscreven. 'Up tegeenc dat die heer van Lalaing den heemraden van Rijnlant over gegeven heeft in eenre cedule hem gelevert bij Huge Albout ende Claes van Boschusen up dese tijt burgermeesteren van Hairlem ende van Leyden in vorme van replike upter antwoirde vanden hiemraden overgegeven up een ansprake up hem gedaen bij Huge ende Claes voirn., so duplicieren die hiemraden voirs. inden manieren hier na volgende mit pretestacien dat sij onderwijsinge doen up correctie vanden edelen baermoedzen ridderen, knapen ende lantgenoten inder heemraedscip van Rijnlant geseten den welken die hantvesten vander dijckaedse ende vander heemraedscip toe behoren dair die hiemraden anders niet dan mijns genadichs heren ende des lants dienres of en sijn gelijck sij dat oick in hoir eerste antwoirde geroert hebben. Ende eerst also die replike vanden steden altoos behouden dies dat voirscreven staet inhout drie artikelen: eerst dat die hantveste van wairden is om dat hertoge Aelbrecht zaliger gedachten die gegeven heeft bij [46v] voirsienicheit van sinen rade ende mijn genadige heer geconfirmeert, etc., dair up dupliceiren die heemrade als sij eerst veranwairt hebben dat dat punte van die hantveste van onwairden is om reden in hoire antwoirde verclairt, met tegenstande dat se hertoge Aelbrecht gegeven heeft up zeker condicien dair in begrepen. Dat ander artikel is dat die steden replicieren up dat die hiemraders geantwoirt hebben dat die hantveste niet duechdelic vercregen en is, etc., dat dat den steden verdunct nader groter voirsieniger wijsheit diemen inden heemrade seit te wesen, etc., dair up duplcieren die hiemraders dat sij niet wijser en sijn dan hem god verleent heeft ende dair om en komen [konnen?] sij den steden mit gheen beter reden betalen dan hair wijsheit wt geven kan ende dat die steden smadelijc sciren [scrijven?] upter heemrader wijsheit dies en sijn Huge noch Claes te beter niet noch die hiemraders te arger mer ten derss [derff?] den steden niet vreemde duncken dat die hiemraders meynen dat dit punte vanden hantveste van onwairden is, want hem en twivelt niet als die sake voir minen genadigen geer coemt die welke die interpretacie vanden hantveste toebehoirt ende niemant anders, dat punte vanden hantveste en sal van onwairden gewijst werden al ist dat mijn genadige heere der stede hantvesten geconfirmieert heeft, dats te verstaen hantvesten die van wairden sijn mer die van onwairden sijn en konnen overmits geen confirmacie van wairde worden, want een confirmacie geen nye recht en geeft vorder dan een hantveste selve vermach, welke saken minen genadigen heer niet an en gaen vorder dan rechten te wesen tusschen partyen, ende die hantveste en is niet duechdelic vercregen bij redene want die heemraders diemen dair bij lasten wil mit rekeninge te doen ende geen rekeninge sculdich en sijn te doen om dat sij en ontfangen noch wt en geven dair niet in gehoirt noch over geroepen en sijn geweest alst blijct ende driecht [draecht?] oick tegen horen eedt die sij minen genadigen heer tot des lants behoeff gedaen hebben, oick en sijn die baermodzen ridderen ende knapen noch lantgenoten inder heemraedscip van Rijnlant geseten niet gehoirt noch geroepen geweest mit verwerven vander voirsc. hantveste buten den welken men mit rechte gheen hantvesten der hiemraidscip angaende geven en mach. Dat derde artikel is dat die steden verantwoirden up dat die hiemrade verantwoirt hebben dat die hantveste niet gepossesseert en is, etc., dair die steden up replicieren dat sij anders niet en weten dan sij gepossessiert is geweest, etc., dair up duplicieren die hiemrade dat die [47r] steden hair possessie anders sijn sculdich te bewijsen dan mit sulken reden te seggen dat sij anders niet en weten dan sij gepossessert is, so moeten hair possessie bewijsen sullen sij hem dair mede beholpen ende dat die steden voirt scriven heeft sij niet gepossesseert geweest dats overmits die twijdracht vanden lande, etc., dair up duplicieren die hiemraders datter nye so grote eendracht noch so grote twijdracht inden lande geweest en is die hiemraedscipe en heeft geregiert geweest naden hantvesten vanden lande ende bijden hiemraders dier geweest sijn so dat die reden luttel dient voirt te setten up die possessie vande hantveste. Ende dat die steden scriven dat hair poorters hem clagentlyc te kennen gegeven hebben hoe die hiemr. mit hem luden om gegaen hebben, dair up duplicieren die hiemraders wes sij gedaen hebben mitten poorteren vanden steden omme te gaen dat sij dair off mit lichte comen willen ende begeren dat Huge Albout ende Claes van Boschusen seggen ende openen willen die clage die hoir poorteren upten hiemr. voir hem gedaen hebben up dat die hiemr. die verantwoirden mogen, ende up dat sij oick niet dencken en dorven dat Huge ende Claes tgeent dat sij over geven dat hoir poorters upten hiemr. geclaecht hebben dat wt hem selven doen. Ende dair die steden voirt scriven al ist dat die hiemraders scriven dat sij ontfangers noch omme setters en sijn ende oick niet wt en geven, sij sijn dat een ende all ende men van genen saken niet doen en mach noch en doet ten sij wt him ende bij him, dair up duplicieren die hiemrade dattet wair is dat sij dair off in haer eerste antwoirde over gegeven hebben ende dat die steden up hem die contrarie niet bewijsen en sullen ende dat die saken bij hem gescien ende dat sij dair toe sien om des lants oirbair is wel mogelijc, want sij mit eeden tot des lants behoef verbonden sijn, ende die steden en sullen niet bewijsen mitter wairheit dat die hiemr. yet nyes gedaen of begonnen hebben dan him van horen voirsaten van ouden rechten ende gewoenten an gecomen is, hoe wel sij die kerwe [verwe?] voir him nemen dat tgeent dat sij soeken wt clachten van horen poorteren coemt. Ende willen die steden of hair poorteren yet clagen upten hiemraders gedaen te hebben in contrarie van horen eede ende tegen dat inhouden van horen hantvesten ende koeren, dair aff willen sij te rechte staen ende hem verantwoirden dair sij van rechts wegen sculdich sijn te verantwoirden.' Item up tgeent dat die steden replicieren up die antwoirde vanden hiemraders ruerende vanden penninck gelde, etc., [in the bottom margin is added at this point: 'ende dat sij horen poorteren ende ommesaten verbonden sijn mit eede of men him ongelijck doen woude, etc.,'] duplicieren die hiemr. gelijck sij eerst verantwoirdt hebben, dat sij hoir penninck gelt ontfaen gelijck als hoir voirsaten ende sij tot hair toe gedaen hebben [47v] des nyemant die contrarie mitter wairheit dair off bewijsen sal ende sij ontfangen up dese tijt min dan hoir voirsaten gedaen hebben alsinen dat mit ouden boeken van lxx jaren wel bewijsen mach ende houden dair toe alle jair om oirbair ende profijt slants ten minsten drie scouwe dage meer dan onse voirsaten voirtijts gedaen hebben dair sij in genen priviligien toe verbonden en sijn. Ende voir so si screven dat sij horen poorteren ende ommesaten verbonden sijn mit eede, so duplicieren die hiemrade dat wel wair mach wesen dat die burgermeesters sculdich sijn hoir poorteren voir onrecht te verantwoirden, mer dat sij mit eede horen ommesaten verbonden sijn des vervreemt den heemr., want sij dat niet meer gehoirt en hebben aengesien dat sij inden ommesaten gheen seggen en hebben noch in genen saken der hiemraedscip angaende dan also verre alst horen poorteren als lantgenoten an gaet, ende die heemrade en hebben oick geen hantvesten vanden penninckgelt dan hoir oude besit ende hair comen dair up die hiemraedscip van Rijnlant van grave Florijs nederwert dat omtrent c ende i jair geleden is geregiert is geweest, ende mijn genadige heer heeft des lants ende heemr. hantvesten van Rijnlant geconfirmeert ende hair rechten, privilegien ende hair comen geloeft ende gesworen te houden als hij van hun luden gehult was. Upt derde artikel dair in die steden replicieren dat dat bijden ondersoeck was dair off is wel bevonden sal worden, etc., dair up duplicieren die hiemrade noch als sij eerst verantwoirt hebben ende so veel vorder datmen geen ondersoeck doen en kan noch en mach partyen en moeten vast setten contrarie punten doch na dien dat Huge ende Claes eerst die hiemrade belasten willen mit menen, ende noch hem dies gedragen an ondersoeck, etc., so duplicieren die hiemrade dair up dat geen van hem luden pairt noch deel gehadt hebben in die bestadinge vanden verlate tot Sparendamme gemaect noch an genen werken bij hem van des lants wegen bestaet sint sij hiemrade geweest sijn, ende die hiemr. willen wedden ende verpenen up een pene van duysent rijders, halve tot mijns genadichs heren behoeff ende halve totter geenre behoeff die inden rechten bevonden sall worden dat Huge Albout ende Claes van Boschusen mitter wairheit niet betugen noch proeven ende sullen tgeent dair sij bij meenen die heemraden mede belasten willen. [48r] Ende also die hiemrade tot anderen tijden in tegenwoirdicheit vanden regent ende rade toe gesproken sijn geweest wt anbrengen vanden steden voirs., dat sij up dat lant in Rijnlant morgengelt omme geslagen hebben up sommige morgen v groten ende vi groten ende up sommigen vii groten, ende want die steden dair off in horen scriften niet en roeren, so dunct den hiemrade dat sij dair den heemr. grotelijck an misdaen hebben sulke saken over hem an te brengen sonder redene die die hiemrade nye gedaen en hebben noch oict sculdich en sijn te doen ende men die contrarie mit horen kueren wel bewijsen sall, ende die hiemrade willen dat oick verpenen up een pene van dusent rijders, halff tot mijns genadichs heren behoeff ende halff totter geenre behoeff die inden rechten bevonden sall worden dat die steden dat mitten wairheit upten hiemrade niet proeven noch bewijsen en sullen. Ende die hiemr. geven voirt den heer van Lalaing ende anders den heren vanden rade hier up te kennen so wie den hiemrade mit onrechte beclaecht dat die verburen elcx die hoechste buete die die hiemrade wisen mogen ende dair toe sculdich sijn minen genadigen here beteringe te doen bij minen genadigen heer ende sinen rade, ende dne hiemr. dair off en boven van horen koste die sij doen sullen om dier sake wille gelijck dat voir dese tijt wael [waer?] gewijst is bij minen genadige heer in sijnre presencien [puntien?] inden saken die die stede van Aemsterdamme tegen den heemrade wtstaende hadde, dair die hiemrade minen genadigen heer also verre alst hem an gaet laten begaen in tijden ende in wijlen ende dat den heemr. angaet als van horen koste dair aff begeren sij rechte an u heren ten eynde vanden gedinge.

 

Location, Folio
OAR11, 49r-a
type : Vonnis	date : 1431-09-05	record : # 176
[014] Wij Gillijs van Cralingen van Voirscoten, Gerijt van Poelgeest van Hoichmade, Gerijt vanden Zijl heer van Purmereynde, ridderen, Boudijn van Zwieten trezorier van Hollant, Jan vander Boechorst heer van Noortigherhout, Florijs Paedze, Meynairt Claes z., knapen, hoge hiemraden van Rijnlant, doen condt allen luden dat wij van des gemeens lands wegen van Rijlant mit Jan Wouters z. ende Clais sinen zoon overdragen sijn dat sij angenomen hebben voir hem ende voir heren erven te maken ende te houden die hoge breede vanden Zeedijck, gelegen bij Costverloren neffen Jan Wouters zoons ende Clais sijn zoons zaet ter Halver weteringe toe die nu Costverloren hiet, erflic ende eygenlic up dat voirs. lant durende tot ewigen dagen. Ende hier voir hebben wij hoge hiemr. voirgen. van des gemeene lants wegen voirs. quijt gesconden ende gegeven quijtscelden ende geven voir ons ende voir onse nacomelingen Jan Wouters zoon ende Clais sinen zoon voirs. ende horen nacomelingen tot enen vryen eygen die cadijck tot Costverloren binnendijck ende butendijck also groot ende also cleyn als hij up Jan Wouters zoons ende Clais sins zoons zaten voirs. gelegen is ter Halver weteringe toe, ende sij den lande van Rijnlant voirs. toebehoren plach. Ende hebben hem vorder geloeft ende geloven niet te dijcken wt die voirs. zaten in geenre wijs bij staenden dijck. In kennisse der wairheit hebben wij hoge hyemraedt voirgen. onse zegelen tot enen getuge an desen brief gehangen, int jair ons heren dusent vierhondert ene ende dertich upten vijften dach in septembri.

 

Location, Folio
OAR11, 49r-b.
type : Vonnis	date : 1431-09-05	record : # 177
[015] Ic Aernt Vechterszoon doe condt allen luden dat ic an ghenomen heb vanden gemeenen lande van Rijnlandt voir mi ende voor minen erven eygelijc ende ervelijc tot ewigen dagen die hoge brede vanden Zeedijck bij Aemstelredam geheten Costverloren also groot ende also cleey als hi gelegen is op mijn zaet nu ter tijt is gelegen an Costverloren streckende den voirs. dijcke zwtoostwairt ter Halver weteringe toe, dair si mi voir gegeven hebben den cadijck tot Costverloren gelijc mijn breive dair of inhouden. In kennisse der wairhede so hebbe ic desen brief bezegelt mit minen zegel, int jair ons heren dusent vierhondert een ende dertich upten vijften dach in septembri.

 

Location, Folio
OAR11, 49r-c-49v
type : Vonnis	date : 1443-07-25	record : # 178
[017] Wij Gerijt van Poelgeest heer van Hoichmade, Willem van Alcmade ende Gerijt van Zijl, ridderen, Jan vander Boechorst, Boudijn van Zweten, Florijs Paedze ende YJsbrant van Scoten, knapen, hoge hiemr. van Rijnlant, doen condt allen luden dat gecomen is Aernt Vechters z. [49v] inden jair van een ende dertich [1431] lestleden voirden hogen hiemraet van Rijnlant doe ter tijt wesende ende heeft aengenomen vandes gemeens lands wegen van Rijnlant voir hem ende sinen erven eygentlyc ende erflic die hoge breede vanden Zeedijck bij Aemstelredamme geheten Costverloren also groot ende cleyn als hij gelegen is op sijn zate doe ter tijt gelgen in Costverloren streckende den voirs. dijck zwtoostwairt ter Halver wateringe toe, dair sij him voir gegonnet hebben ende gegeven vandes lands wegen van Rijnland den cadijck tot Costverloren gelijc sijn brieve dair off inhouden, des so is gecomen inden jare van twee ende vertich [1442] Vechter Airents zoon die in desen rechten bestorven is van sinen vader voir ons heemr. nu ter tijt wesende ende heeft op gedragen ende overgegeven all last, profijt, recht ende toe seggen dat hij hadde vanden Zeedijck bij Costverloren ende cadijck als boven geroert is tot behoeff Reyner Reyners z. ende sinen erven eygentlic ende erfflic dat hij dien Zeedijck bij Costverloren boven bepaelt houden sal mit sulken prouffite als Airnt Vechters zoon ende Vechters Airnts zoon dair off gehadt hebben, ende die breive die dair of sijn dat wtwijsen tot der Halver weteringe toe, dats te verstaen ter Halver sluyse toe dair die laiste sluyse gelegen heeft van Costverloren, ende dat hij noch sinen erven dit niet vervreemden noch vercopen en sullen buten den heemr. voirs. Ende want ons hoge heemr. voirs. kundich is ende dese overgifte bij onsen consente ende wille vandes lands wegen van Rijnlant gesciet sijn, so hebben wij in kennessen ende getugenesse der wairheit onse zegelen an desen brieff gehangen, ende deser brieve sijn twee alleens sprekende, dair wij den enen voir ons in den gemeenen lande van Rijnlant of hebben ende den anderen gelevert Reyner voirsc. voir hem ende sine erven. Gegeven des dijnxdages na sinte Jacobs dach apostel int jair ons heren duysent vierhondert drie ende veertich.

 

Location, Folio
OAR11, 49v-b-50r
type : Vonnis	date : 1444-02-24	record : # 179
[028] [047] Petri ad cathedram xliiii anno xliiii. Item so hebben op dese scouwe geweest heer Gerijt van Poelgeest, heer Willem van Alcmade, Jan vander Boechorst, Boudijn van Zwieten, Florijs Paedze ende IJsbrant van Scoten. Item inden eersten hebben die voirs. heemr. in yegenwoirdicheit die dijcgrave bevolen allen ambocht bewairres van Rijnlant [50r] dat elc hoir penninc gelt den heemr. toe behorende omslaen ende in gaderen also dat rede wair, twisken dit ende meyen dage naestcomende, des doe die ambocht bewarers dingeden anden dijcgrave ofter yemant wair die onwillich wair sijn pennincgelt te betalen hoe si dat voirt souden in gecrigen, also dat die dijcgrave des vonnes vragede, des him gewijst wort dat die dijcgrave dat sculdich waer voir den onwilligen wt te leggen ende naden ouden rechten ende costumen dat weder in winnen, twee scatte an gelde of vier scatte an pande, des die dijcgrave vorder vonnes vragede of hi sijn gelt wt leyde binnen wat dage hi dat weder in sinnen soude, des him die gewijst wort binnen viertien dage.

 

Go to Folio's ...
13	20	30	40	50	60	70

 

Author	Publication	Home
William H. TeBrake Maine, USA, June 2006	Rijnland OAR11, OAR12, OAR13	www.oudleiden.nl

 

Hoogheemraadschap Rijnland OAR 11, 12, 13 : 1253 - 1564
	View: Register OAR 11 Pages 30 - 39

 

Go to Folio's ...
13	20	30	40	50	60	70

 

Location, Folio
OAR11, 30r-a
type : Consent	date : 1438-11-15	record : # 059
[004] Item consenteert die van Oestgeest een quakelbrugge over die Maern ende is gesc. anno xxxviii opten xv den dach in novembrij tot Leyden, durende tot onsen wederseggen.

 

Location, Folio
OAR11, 30r-b
type : Keur	date : 1437-00-00	record : # 060
[001] Hoemen eenen nuewen heemr. eeden sal. Item dat zweer di dat ghi sult heemr. wesen van Rijnlant ende recht wijsen twsschen den heer ende den ondersaten ende twsken tweer man tael den armen geliken den riken [added in bottom margin: 'handvesten ende privilegien'] des lants van Rijnlant te houden na alle u vermogen, den lagen acker geliken den hogen, den quaden acker gelijck den goede na uwer rechter fijf sinnen ende enen ygeliken daer in doen geliken u selven ende als een goet heemr. sculdich is te doen ende dat niet te laten om liefde noch om leede om myede noch om vreest noch om gheenreleyde sake, alsoe moet u nu god helpen ende all heyligen. Gedaen anno domini xiiii c xxxvii.

 

Location, Folio
OAR11, 30r-c
type : Keur	date : 1400-00-00	record : # 061
[002] Item soe sijn die heemr. overdragen tot wat tijden dat gebuert dat enich vanden heemr. oflivich wort, so sullen die ander van sinen mede gesellen die der te live bliven dertich zielmissen doen doenvoir hoir mede gesel die dair gestorven is tot lictenisse sinre pijnen, ende dien oncost sel die rentm. wtleggen ende dat weder te rekeninge bringen, gedaen anno domini xiiii c.

 

Location, Folio
OAR11, 30v-a
type : Keur	date : 1438-11-15	record : # 062
[005] Item upten xv den dach in novembri anno xxxviii so wort overdragen mit heren Gillis van Cralinge, her Gherijt van Poelgeest, Jan vanden Boechorst, Boudijn van Zwieten ende Floris Paedsen soen dat sij up dese tijt ende voirt an hoir costen doen sullen van horen hyemraetscip inder manieren hierna gesc. Dats te weten dat elc man sijn coste doen sal voir him selven ende dair toe mit tween knechten. Ende elc man sal gaen in sijn herberge dair hem sal genuegen, mer als sij comenn op hoir maelstat, so sullen sij sammentlic tsamen eten in een herberge of in dat wijn huys dair hem sal genuegen. Ende bidden sij dan samentlic enige gasten, dat sullen sij samentlic betalen ende dat sal dan een van hunluden wtleggen ende weder innemen als sij samentlic mit een sullen rekenen. Ende hier op sal een yegelic weder bueren dat sevende deel vanden pennic gelde. Ende die slusen vischerien sal die clerc bueren ende doen dair rekeninge of alle jaren. Ende ter elix maelstede die die hyemraet houden sullen salmen elcken hyemraet teykenen die opten voirs. maelstat comen sullen bijden clerc ende die sal dan tot elke rekeninge diemen alle meye houden sal die overleveren up dat men weten mach wat een yegelic hebben sal die tot den maelsteden gecomen is. Ende die rentmr. sal hebben alle jaer sijn wedden als gewoenlic is meer dan die ander hyemraden plegen te hebben.

 

Location, Folio
OAR11, 30v-b
type : Verklaring	date : 1438-ca	record : # 063
Item so wort rentmeester een meyendage anno xxxii Florijs Paeds, Simon Vrederic in sijn stede. Item anno xxxiii her Gillijs van Cralinge, her Willem van Alcmaden in sijn stede. Item anno xxxiiii Jan vanden Boechorst, Jan van Nortich in sijn stede. Item anno xxxv Boudijn van Zwieten, Jan van Poelgeest in sijn stede. Item anno xxxvi Meynert Claes z., Ysbrant van Scoten in sijn stede. Item anno xxxvii her Gerijt van Zijl, Boudijn van Zwieten in sijn stede. Item anno xxxviii heer Gerijt van Poelgeest.

 

Location, Folio
OAR11, 31r-a
type : Rechtsdag	date : 1434-05-00	record : # 064
[000] Anno xxiiii te meye. Item so eyshede heer Claes van Sparenwoude ende seyde dat heer Jan meer lants brukede vander kerken dan hem toe beherde daer Meynert [Claes z.] een ondersoeck up dede met den clerck als her na gesc. staet. Item dese na gescreven tugeden dat die kerclaen geen dijc en heeft: Willem Jans z. Ysbout Dirc Liclaes z. Jan Simons z. Claes Isbrants z. Pieter Jorden Vranc Dircx z. Dat war op die Lede. Daer of tugeden Jonge Dirc ende Claes Dircx z. dat heer Jan die dijcleger ende aertgelt betaelt heeft ende hij hem verdijct is. Dat hout anden dam Claes van Haefdijx kinder tugeden dat dat lant in die nuwe inlage niet en hoerde, mar die dijc wort gekoert te breden ende dat dede heer Jan. Dat half mat in Claes Aelwijns z. weer Lambert Hilbrants z. tugede dat heer Jan hadde doen diken ende alle oncost betaelt. Dat half mat in Jan Oeden lant Claes Claes z. dat Mourijn hiete Jan Oeden den dijc maken ende dat lant daer voir bruken ende des gelijx tugede Taemes, ende hij halp heer Jan ende Jan Oeden z. tot genoege. Dat hout in vrouken camp Dirc Claes z. tugede dat Jan heeft doen diken ende all oncost betaelt. Dat lant int oude weer heer Jan gedijct ende alle oncost betaelt. Dat half mat biden dijc Heynric Jans z. Florijs Jans z hebben den dijc gemaect ende sluysgelt ende ongelt betaelt ende heer Jan ende Heyrnic Rijsheden elx dat aertgelt.

 

Location, Folio
OAR11, 31v-a
type : Vonnis	date : 1438-ca	record : # 065
[005] Item soe sullen Vrancken kinderen van Zanen bliven inden eygendom vanden lande geheten den Droen, ende wes aerde der wt gesleghen is seer die tijt dat sij inden eygendom geweest hebben van dat Willems weduwe van Zanen dat over gaf, sy sullen sijt selve ontfaen ende daer of dijcrecht plegen alst behoirt, ende dair voir zeer dat Vranck van Zanen lant vluchtich was tot dat sijt an tasten als voirs. is, soe sel dat aertgelt staen tot goetduncken vanden raed alsoet dair zoen an roert.

 

Location, Folio
OAR11, 31v-b
type : Vonnis	date : 1416-01-09	record : # 066
[006] Wij Jan vanden Woude heer van Warmond, Gherijt van Zijl, ridderen, Jan vander Woude, Jan vanden Boechorst, Florijs van Tol, Vranck van Zanen, ende Symon vanden Scuer, knapen, doen condt allen luden dat wij vercoft hebben tot enen vryen eygen Lambrecht Lamberchts z. twee stucke lants bijden Hoope sonder maet also groet ende also cleyn alst dair gelegen is inden ban van Sparenwoude buten den tIJdijck ende geheten die Droenen, twisken Claes Airnts zs. erfnamen an die een zijde, die stoelen van Sparenwouder dijck an die ander zijde, al om streckende an die tYe, ende noch een stuck lants geheten dat wester hogher lant also groet ende also cleyn alst dair gelgehen is inden ban van Velzen, twsken den behinen lant van Hairlem ende capellen lant van Sparendam an die een zijde, Allijn Gruierts z. an dander zijde, al om streckende an die tYe. Ende verlyen ons al voldaen ende wel betaelt den lesten penninc mitten eersten ende hebbent him gheloeft te waren alsinen vrij lant sculdich is te waren een ygelijck inden banne dairt gelegen is. In oirkonde desen brieve bezegelt mit onsen zegelen in jair ons heren duysent vierhondert ende vijftien des dijnxdachs naden heyligen dertyen dach.

 

Location, Folio
OAR11, 31v-c-32r
type : Vonnis	date : 1421-01-08	record : # 067
[007] Baertout Heynricx z. scout van Sparenwoude doe condt allen luden dat voir mi quam Lambrecht Lambrechts z. ende gheliede dat hi over gegeven ende qwijt gesconden heeft Pieter van Zanen clerck alsulc lant als hi gecoft hadde jegens die hoghe wel geboren hyemrade van Rijnlant dat gelegen is buten dijcks ende geheten is die Noort gelegen inden ban van Velzen. Ende ghelyede him Lambrecht voirs. hier of al voldaen ende wel betaelt, den lesten penninc mitten eersten, ende gheloofde dat te waren in alre manieren als die voirseyde heemraders brief die Lambrecht dair of hadde inhout. Hier [32r] waren bij ende over als tuge ende buer Allert Ysbrants z. ende IJsbrant Claes Hermans z. In kennisse der waerheit, soe heb ic Bertout scout voirs. desen brief bezegelt mit minen zegel int jair ons heren duysent vierhondert ende twintich naden loop des hoofs van Hollant, des woensdages naden heyligen dertyenen dach [i.e., 1421].

 

Location, Folio
OAR11, 32r-a
type : Vonnis	date : 1426-09-26	record : # 068
[008] Phillips, etc. [Philip the Good, Duke of Burgundy] ontbieden ende bevelen u allen onsen goeden luden ende ondersaten gheseten binnen den dorpen van Sparenwoude ende Sparendam dat ghij wtreyct ende betaelt Vrancken kinder van Zanen sulc aertgelt als ghij him sculdich sijt ende ghij nu in uwen ghemen oirbaer wt horen lande hem of ghedolven hebt sonder langher vertreck off merring dair of te maken, ende wairt dat ghij des niet en dedet, soe wouden wij den selven kinderen rechts dair of gonnen op enen ygeliken die in ghebreke dair of is ende mit onsen heemraders dat wt doen panden als dair toe behoert sonder des yemande te verdragen in eniger wijs. In oirkonde desen brieve ende onse signet hier up gedruct. Gegeven upten xxvi sten dach van septembri in jair ons heren dusent vierhondern ses ende twintich.

 

Location, Folio
OAR11, 32r-b
type : Vonnis	date : 1437-00-00	record : # 069
[009] Anno xxxvii Der heemrader vonnes: Aldus wijsen wij alsoe Pieter van Zanen sprect mit sinen brieven in welken hij bewijst dat hij den voirsc. Droen gecoft heeft ende wij gheen brieve of anders enich betoon in contrarie gesien hebben dairmen die voirs. breive mede deden sal dat Pieter van Zanen sculdich is sijn aertghelt te hebben dat hem gebrect vanden tijt datten Droen eerst sijn wert van des him dair of onbetaelt is totter heemraden goet duncken, ten wair ofmen mitten hof van Hollant mochte bewijsen dat Pieter van Zanen voirvluchtich off balling slants van Hollant geweest had voir den date mijns genadichs heren brief van Bourgongne hier voir gescreven.

 

Location, Folio
OAR11, 32r-c-32v
type : Vonnis	date : 1437-00-00	record : # 070
[010] Anno xxxvii --------ij' Noch een vonnes der heemr.: Item also den wtersten dach huden was twsken Florijs van Sparenwoude an die een zijde ende Vrancken kinder van Zanen op die ander zijde om der dingtael wille die sij onderlinge hadden van aertgeld vanden Droen, in welker dinctael Florijs voir him nam dat mijn heer van Beyeren den Droen Willem van [32v] Zanen gegeven had, alsoe Vranc van Zanen mit wijf ende mit kinderen voirvluchtich was, ende dat hij Willem van Zanen dair of vernoecht had, soe seyde Florijs bij die reden dat hi hem niet sculdich en waer te gheven, dair Vrancken kinder weder op antwoirden ende spraken op hair brieve die Pieter van Zanen dair of heeft geliken hier voir gescreven staet.

 

Location, Folio
OAR11, 32v-a
type : Vonnis	date : 1437-06-21	record : # 071
[011] Up dat vonnes voir gewijst twsken Pieter van Zanen ende Florijs van Sparenwoude dair up hebben die rade mijns gendaichs heren gescreven anden hyemraet gelijc hier na gescreven stait: 'Lieve getruwe ende geminde also ghij voir dese tijt een vonnes gewijst hebt dat Pieter van Zanen sculdich is sijn aertgelt te hebben dat hem ghebrect vanden tijt datten Droen eerst sijn wort, van des hem dair of onbetaelt is tot uwen goetduncken, ten wair ofmen mit onsen hove van Hollant mochte bewijsen dat Pieter van Zanen voirvluchtich of baling onser lande van Hollant geweest hadde voir date van onsen brieve die Pieter voirn. van ons heeft, ende die selve Pieter hier om an geschille staet mit Florijs van Sparenwoude, soe is dese sake gecomen voir onsen getryuwen rade gestelt ten saken van onsen lande van Hollant die beyde pertyen hier up gehoirt hebben ende oick sulke tugen als sij him van beyden zijden elcx vermaten ende en konnen niet bevinden naden tuge die sij gehoirt hebben dat Pieter voirn. ye balling of voirvluchtich onsen lande van Hollant geweest is, ontbieden hier om ende bevelen mit aernst dat ghij dese sake voirt termineert ende dair in doet bij rechte of bij ghenoege als dar behoirt van redenen wegen gedaen te wesen dat en laet in geenrewijs onse heren god ijs mit u. Gesc. den een ende twintichsten dach in junio.'

 

Location, Folio
OAR11, 32v-b
type : Vonnis	date : 1438-07-01	record : # 072
[012] [In left margin: 'Anno xxxviii te Does scouwe'] Dat wterste vonnes van deser sake. Item up dat voir gewijsde vonnes twsken Florijs van Sparenwoude ende Pieter van Zanen, soe wijsen wij voirt aldus na inhout der brieve die mijn genadige heer dair of gescreven heeft, dat Pieter van Zanen hebben sal van elke roede aerde een lelyde plack. Des sal die hiemr. aldair senden ende den wale doen meten in hairre beyden yegenwoirdicheit also verre als sij dair comen op een vrijdach naestcomende ende wes Florijs voirn. buert te gelden sal hij betalen nu te Bamisse naest comende. Die heemraden van deser sake Gillis van Cralinge, Gerijt van Poelgeest, Gerijt van Zijl, ridderen, Jan vanden Boechorst, Boudijn van Zweten, Florijs Paedzen ende ['Meynert Claes zoon' is crossed out] Ysbrand van Scoten.

 

Location, Folio
OAR11, 33r-a
type : Vonnis	date : 1415-01-09	record : # 073
[013] Item Jan vanden Woude heer van Warmonde, Gherijt van Zijl, ridderen, Jan van Woude, Florijs van Tol, Jan vanden Boechorst, Vranck van Zanen ende Simon vanden Scuer, knapen, doen condt allen luden dat wij sculdich sijn Witte Jacob Buzen zoen often houder van desen breive bij sinen wille hondert twee ende vertich pont tien scelling hollants payments die wij him gelooft hebben ende geloven wel te betalen tot meye dage naestcomende, ende waert sake dat wij des niet en deden soe hebben wij vorder ghelooft ende geloven bij onsen truwen eeren ende zeekerheden ende in rechter eedscat in te comen tot vermenen Witte Jacops z. of den houder sbriefs binnen Hairlem in Heynric Aernts zoens hws ende dair in te leysten ende tydige maeltijden te houden na goeder luden zeede elc mit ons selves live ende wt der voirseyden stede ende leystinge niet te sceyden in geenrewijs voir die tijt dat wij Witte Jocops z. of den houder sbriefs voirs. vol ende al betaelt hebben die somme gelts voirs., den lesten penning mitten eersten, ende den waert vernoecht van sinen cost. In oirkonde desen brieve bezegelt mit onsen zegelen int jair ons heren dusent vierhondert ende vijftien, des dijnxdage naden heyligen dertienen dach.

 

Location, Folio
OAR11, 33r-b
type : Vonnis	date : 1415-01-09	record : # 074
[014] Wij Jan vanden Woude heer van Warmonde, Gherijt van Zijl, ridderen, Florijs van Tol, Jan vanden Woude, Jan vanden Boechorst, Vranck van Zanen ende Simon vanden Scuer, knapen, doen condt allen luden dat wij sculdich sijn Robbrecht Claes z. of den houder van desen brieve bij sinen wille hondert twe ende tseventich pont vijf scelling ende ses penning Hollants payments die wy hem gelooft hebben ende geloven wael te betalen op den pinxster dach naest comende, ende waert saeck dat wij des niet ende deden, soe hebben wij voirder gelooft ende geloven bij onsen truwe eeren ende zekerheden ende in rechter eedscat in te comen tot vermanen Robbrecht Claes zoons of den houder sbreifs binnen Hairlem in Heynric Airnt zoons hwys ende dair in te leysten ende tydige maeltide te houden na goeder luden zeede elc mit ons selves love ende wt der voirs. stede ende leystinge niet te sceyden in geenrewijs voir die tijt dat wij Robbrecht Claes z. of den houder sbriefs voirs. vol ende al betaelt hebben die summe gelts voirs., den lesten penning mitten eersten ende den wairt vernoecht van sijnen cost. In oirkonde desen breive bezegelt mit onse zegelen int jair ons heren dusent vierhondert ende vijftien des dinxdage naden heyligen dertienen dach.

 

Location, Folio
OAR11, 33v-a
type : Vonnis	date : 1419-10-02	record : # 075
[013a] Wij Gillis van Cralinge ende Gherijt vander Zijl, ridderen, Gherijt van Poelgeest, Florijs van Tol, Jan vanden Boechorst, Vranck van Zanen ende Claes van Ruven, knapen, hoge hyemr. van Rijnlant doen condt allen luden dat wij van des lands wegen van Rijnlant gelyen sculdich te wesen Willem Dobbe z. of den houder van desen breive hondert goeden gouden engelschen noblen of payment hoirre wairde die hij ons tot des lants behoef van Rijnlant onder gedaen heeft om tien engelsche nobel sjairs te renten die wij hem of houder sbriefs samentlijc ende elc voir al geloeft hebben ende geloven volcomelike ende wel te betalen ende comer vrij te leveren binnen der staet van Utrecht inden wisselen, alle jair op sinte Baven dach of binnen achte daghen dair na onbegrepen, ter tijt toe dat wij Willem off houder sbreifs dese hondert engelsche noblen weder betalen ende hem dair toe gheven also veel renten als wij hem op die tijt naden beloep vanden jair sculdich sullen wesen. Ende wairt sake dat wij Willem of houder des breifs dese renten alle jair upten termijn voirs. niet en betaelden ende wij des van Willem of houder sbriefs vermaent worden mit Willems of houder sbriefs openen breiven, soe hebben wij eedscat in te comen leysten binnen die stat van Utrecht elcx van ons mit drien paerden ende mit tween knechten in Waelkijns herbergh dair hij nu ter tijt in woent aldair te leggen ende te leysten na goeder luden zeede ende niet van daar te sceyden voir der tijt dat wij Willem of houder sbriefs dese voirs. renten vol ende al betaelt sullen hebben, den lesten penning mitten eersten, ende den waert vernoicht van sinen cost. Ende tot wat tijt dat wijt Willem of houder sbriefs een halve jair te voren seggen of doen seggen of dat hijt ons also lange te voren seit of doet seggen, soe sullen wij dese hondert noblen voirs. volcomelijc ende al weder betalen ende dair toe alsoe veel renten als wij hem op dien termijn naden beloep vanden jair sculdich sullen wesen, ende dair mede soe sullen wij desen breiff mogen lessenen. Ende wairt dat wij des niet en deden als wij des van Willem of houder sbreifs vermaent waren gelijc voirs. is, soe hebben wij vorder gelooft ende geloven bij onsen truwen eeren ende zekerheden in rechter eedscat in te comen leysten binnen der stat ende inden selver herberge voirs. elcx van ons mit drien paerden ende mit tween knechten ende dair te leysten als voirs. is ende niet van dair te sceyden voir dat tijt dat wij dit voirs. hooftgelt mitten renten vol ende al betaelt sullen hebben, den lesten penning mitten eersten, ende den wairt vernoicht van sinen cost sonder enige weer hier op te doen mit enigen rechte geestelijc of wairlijc ende alle dingen sonder argelist. In oirkonde des briefs bezegelt mit onse zegelen hier an gehangen int jair ons heren dusent vierhondert ende negentien smanendages na sinte Baven dach.

 

Location, Folio
OAR11, 34r-a
type : Besteding	date : 1434-00-00	record : # 076
[002] [014] Anno xxxiiii Item in aldusdanighen manieren soe wil die hyemr. van Rijnlant besteden die Goude sluys te maken, inden eersten selmense steken inden ouden boom die dair leyt ende mit also veel stilen ende balcken als dair van outs in gelegen hebben mit boechstilen [borchstilen, borchscilen] ende die decplanken drie dwm dicke ende die cledinge twe dwm dicke ende binnen gecleet mit drien plancken an elke zijde voir dat scoten [stoten] ende mit gordinge als dair toebehoirt mit die scotdoer mit horen toebihoren. Ende die stilen sullen wesen als sij van outs geweest hebben ende des gelijcx die doer, ende men wilse besteden bij Philips scilde ende die dage van betalinge sullen wesen een derden deel binnen een maent ende dat ander derdendeel binnen ses weken dair na ende dat derde derdendeel als die brugge op gemaict is. Ende men sel die brugge maken ende op leveren twsschen hier ende Bamisse naest comende, ende men selse aerden ende wangen na ouden costumen als si lest was. Ende soe wiese an neemt te maken, die selse breuggen mit horden ende mit boeme dat men dair mit wagen over varen mach ende mit scepen onder varen binnen vertyen dagen. Item dese sluyse is besteet om tweehondert ende xxxviii scilden.

 

Location, Folio
OAR11, 34r-b
type : Keur	date : 1421-05-25	record : # 077
[009] Item soe heeft die dijcgrave ende hyemr. van Rijnlant gekoert in tiden voirleden dat nyemant delven ende soude binnen de mercken hij en soude poeten elst na inhout der koere op die tijt geleyt, soe sijn sij vorder overdraghen ende gekoert, soe wie dat gedolven heeft inden voirleden jair anno xx ende niet gepoot en heeft, die sal comen ende verborghen sijn poterye te poten na dat hij gedolven heeft ende dat salmen poten binnen den ambocht aldair sij delven op lant dat niet ontgront en is, ende dese borchtoicht sullen nemen twee vanden heemr. beteykent mit des clercks hant. Ende dat sal wesen op drie saterdage ende die eerste saterdach sel wesen over achte dagen ende die ander saterdage dair na volgende. Ende vort soe en sel nyemant delven bynnen die merken voirsc. hij en poten gelijc die koer inhout eer hij voirt meer delvet op boete van iii lb. ende nochtan soude die potery voirtgaen ende die boeten verbueren also dicke als sij bekoert werden, ende dat en wilmen nyemant verdragen. Ende so wie delvet, die sal al sijn lant in scrifte geven den hyemr. dat hi binnen die merken hevet om dat een lant dat ander in waerden te houden om sluysen, dijcken, wege ende wateringen to houden ende te maken, ende wes an dat quade lant gebraec, dat wouden sij an dat goede houden sonder verdrach. Ende men sal poten op elke roede sess elst of meer ende die wasbaer houden, ende dit en wilmen nyemant verdraghen ten sij bij die meeste deel van die hyemr. Gedaen anno domini xiiii cxxi.

 

Location, Folio
OAR11, 34r-c
type : Keur	date : 1421-05-25	record : # 078
[010] Item soe sellen alle ambocht bewarers condigen een sonendage naest comende, elke in sinen kerke inden venen, dat nyemant turf en delve after vrydage naest comende hi en comme een saterdage bijden heemr. tot Leyden ende bewijst wair hij gepotet heeft. Ende wie dat niet en doet ende after die tijt dolve, die soude verbueren x pont. Anno xxi.

 

Location, Folio
OAR11, 34v-a
type : Keur	date : 1421-05-25	record : # 079
[024] Item alle sluysen in den Rijndijck dairmen turff doir voirt, die sullen doir varen als die sluysen wtgaen ende niet als si in gaen, op een boete van x lb. Ende waren dair enige venen die dair niet mede en genuechden, die sullen een spoeye maken mit kadijcken also hoech datter nyemant mede bescadicht en wort. Anno xxi.

 

Location, Folio
OAR11, 34v-b
type : Keur	date : 1421-05-25	record : # 080
[025] Item soe en sel nyemant overvaert noch wagenpat houden inden dijck dat lager wesen sal dan tweedeel dijcs hoge ende dair also veel aerde bij dat hij ter stont dat vol setten mach gelijc ander dijck tot wat tijden die beeste wten grase sijn. Ende dese aerde sel opten dijck wesen tot sinte Bertelmees dage op een boete van x lb. also dick als sij bevonden ende betuucht werden totter heemr. besceydenheit. Ende dair en sel nyemant wagenpat houden hi en sal oerlof hebben vanden heemr. ende in horen boeken geteykent. Anno xxi.

 

Location, Folio
OAR11, 34v-c
type : Keur	date : 1421-05-25	record : # 081
[101] Item soe en sel nyemant wagenpat houden over anders dijck ten sij bijder geenre wille die den dijck hoir is of hij sel den dijck nemen op sinen scade ende dat geteykent inden heemr. boeck. Anno xxi.

 

Location, Folio
OAR11, 34v-d
type : Keur	date : 1421-05-25	record : # 082
[043] Item soe gaven over heer Lodewijck des Bastairt die van Herlem als Ocker Clais z., Ijsbrant Willems z., van Aemsterdam Ruus Jacop z., Avel Pieters z., Jan Bet mitten gemenen buren van Sloten ende van Ostdorp, wat die heemr. koerden vander Hoppen, dat wouden sij helpen sterken mit hoirre macht. Anno xxi.

 

Location, Folio
OAR11, 34v-e
type : Keur	date : 1421-05-25	record : # 083
[044] Item soe hebben die heemr. bevolen ende bevelen die seven scepen van Sparenwoude dat sij die zijl bij Goert Jan Florijs z. maken voir pijnxster op een boete van x lb., ende voirt alle wateringe te koeren te maken bijder selver boete, anno xxi.

 

Location, Folio
OAR11, 34v-f
type : Keur	date : 1421-05-25	record : # 084
[045] Item soe hebbe die heemr. mit horen dijcgrave gekoert die Hoppen gelegen in Sloten in Ostdorp in alre manieren hier na gescreven, anno xxi. Item soe selmen dese Hoppen buten platen gelijck die heemr. dat wijsen of doen wijsen ter goeder scaep, ende dat sullen maken Wiggert Teten z., Pieter Willem z., Claes Jan Aems z., Claes Tomis z., Jan Aelbrecht z., Pieter Coster, ende dese plaet sel gesteken wesen voir sinte Jan. Ende viel dair enich gebreck in, dat wouden die heemr. corrigieren tot horen goet duncken, anno xxi.

 

Location, Folio
OAR11, 35r-a
type : Keur	date : 1421-05-25	record : # 085
[046] Item soe selmen dat plaet werck binnen vollen mit aerde ter goeder scaep ten myenen werck, te weten die van Sloten ende Ostdorp sullen comen ten myenen werck, van elke tien made een man ende elke drie man een wagen mit twee paerden. Ende die sullen te wercke comen mitter sonnen, elx op een boete van x sc. alsmen hem dat weten laet, anno xxi.

 

Location, Folio
OAR11, 35r-b
type : Keur	date : 1421-05-25	record : # 086
[047] Item soe selmen aerde nemen die reetste ende nutste sonder weder seggen van yemant. Ende deder yemant yegen, die woude die heemr. corrigieren na horen goetduncken.

 

Location, Folio
OAR11, 35r-c
type : Keur	date : 1421-05-25	record : # 087
[048] Item soe selmen die aerde gelden totter waerde bij goet duncken den heemr., ende niet na ouden keuren. Anno xxi.

 

Location, Folio
OAR11, 35r-d
type : Keur	date : 1421-05-25	record : # 088
[049] Item soe selmen desen oncost van platen, van aerde, gelden bijden heemr, dats te weten die die platen hoir sijn sullen dair toe gelden nader heemr. besceydenheit ende goetduncken, anno xxi. Item dese koeren worden gemaect ende geleit opten xxv sten dach in meye, anno xxi.

 

Location, Folio
OAR11, 35r-e
type : Keur	date : 1421-05-25	record : # 089
[102] Item soe sullen die gene die morgengelt gaderen tot Zoeterwoude toespreken alle die gene die op die Scafgaende weren sitten of dat beste eynde bruyken voir dat heel morgengelt ende die sullen voirt wijsen die mit hem gelant sijn ende die selmen toespreken. Ende vinde men dair gelt noch pande, soe selmen dat morgengelt vander heelen weer mogen halen an dat beste lant vanden weer sonder wederseggen van yemande. Ende die dan dat beste lant toe behoirt, die sel selve dat morgengelt soeken an dat quade lant soe dat quade vanden goeden vercost is te delven ende te nyete te maken. Anno xxi.

 

Location, Folio
OAR11, 35r-f
type : Keur	date : 1421-05-25	record : # 090
[103] Item soe sel die scout van Zoeterwoude mit sinen heemr. scouwen alle wege ende wateringe elx op sijn tijt doer, sonder op hoer te gaen, elc eygen op een ban van ii sc. Ende een ygelijck sel sijn anganc ende sijn ofganc wijsen op die boete van ii sc. Ende wat werc dat ongemaect is, dat sel die scout besteden om den minsten cost. Ende voirt scouwen ende op alle ongemaecte wercken sal die scout mit sine heemr. sijn souwe weder leggen vander sevenden dach often achten, ende dan sullen sij scouwen op der geenre cost die sijn werck ongemaect was op die eerste scouwe. Ende isser dan nyemant die him des wercs belijt, soe sel die scout dat heren gelijc men an die noort zijde van den Rijn doet, anno xxi.

 

Location, Folio
OAR11, 35v-a
type : Keur	date : 1421-05-25	record : # 091
[079] [000] Item soe wie mitten anderen in een weer leyt ende hair banwerck onversceyden is, dair sel die willige sijn aendeel mogen maken vanden scouzijde in ende een vonnes gheren of hij sijn aendeel gemaect heeft, ende dair mede sel hij sijn scade scutten. Gedaen anno xxi.

 

Location, Folio
OAR11, 35v-b
type : Keur	date : 1440-00-00	record : # 092
[077] Item die heemr. gekoert dat een ijgelijck ambochts bewaerre sijn rekeninge brengen sal vanden ambocht den Heemr. van Rijnlant eer sij dair morgengelt omme slaen op die boete van x lb.

 

Location, Folio
OAR11, 35v-c
type : Keur	date : 1435-00-00	record : # 093
[104] Item soe hebben die heemr. mit horen dijcgrave gekoert ende bevolen die scout van Alphen mit sinen heemr. dair hij die wege mede bescouwet dat sij hair wege scouwen sullen mit twee scouwen doir gelijc sij inden watergang doen op sulke boeten als sij hair wege legen te scouwen, duerende tot onsen wederseggen. Anno xxxv.

 

Location, Folio
OAR11, 35v-d
type : Keur	date : 1435-00-00	record : # 094
[026] Divisio aploren anno xxxv. Item soe koerden die heemr. mit haren dijcgrave dat nyemant henp noch vlas reten en sullen inden Rijn of in enige wijken die tusschen den Rijndijck ende den wech an die zwtzijde leggen op een boete van x lb. also dicke als sij dair of betuget wairde. Anno xxxv.

 

Location, Folio
OAR11, 35v-e
type : Keur	date : 1435-00-00	record : # 095
[027] Item op die koeren van dat henp reten inden Rijn ende wijken, soe hebben die heemr. dat verclaert dat een ijgelijck sel mogen reten in sijn wter dicken ende wijken behoudelijck dat sij die wijken ende sloten inden wter dijck of damen sullen dat sij dat vule water inden Rijn niet en laten lopen tot geenre tijt op die boete voirs., anno xxxv.

 

Location, Folio
OAR11, 35v-f
type : Beveling	date : 1435-11-28	record : # 096
Item soe is die heemr. overdragen des manendage na Catherina dach, eerst van de gebreeck vanden scouten van Hasertswoude ende van Benthuysen als vanden wateringe bi Dyewair Stiengens ende vanden brugge inden Rijndijck dat alle die gene die dair sculdich sijn in te gelden hair gebreke betalen sullen den scouten voirs. binnen viertyen dagen naest comende ende wair yemant dair in gebryeckijk naden tijt voirs. dat sel die bailiuwe van Rijnlant wtleggen ende betalen der scouten voirs. ende wse vanden onwilligen inhalen na dijckrecht. Item des scouten gebrec van Hasertswoude is iii scilde ghulden, die scout van Benthusen vii gulden.

 

Location, Folio
OAR11, 36r-a
type : Beveling	date : 1436-02-28	record : # 097
[006] [010] Anno xxxvi dijnxdage na grote vastelavont. Item soe is bevolen die scout van Hasertswoude mit sijn heemr, dat hij Boudwijn Steens polre mit den scout van Zoeterwoude scouwen sel na ouden costumen, ende wair dair enich gebreck van onbelijt werck dat hij nyemant en bekende, dat sal die scout mitten heemr. heeren na inhout der hantvesten ende na costumen van Rijnlant.

 

Location, Folio
OAR11, 36r-b
type : Keur	date : 1436-02-28	record : # 098
[150] [011] Item die scout van Lisse mit sijn heemr. sullen scouwen die Oude beeck dair die Oude veen in plach te wateren vanden wildernisse tot in die meer, ende dair sullen sij in hoefslaghen den Zuutbroeck van Agghenvoirde totten oest eynde van Jacops croft vander Speck geheten die Lage wech aldair binnen gelegen, duerende tot onsen wederseggen.

 

Location, Folio
OAR11, 36r-c
type : Consent	date : 1436-02-28	record : # 099
[005] Item geconsenteert dat alle die mit die van Lisse wateren binnen haren ban dat sij mit hem gelden sullen morgen morgens gelijck al sijn sij wter wildernisse gecomen.

 

Location, Folio
OAR11, 36r-d
type : Keur	date : 1436-10-01	record : # 100
[028] Item soe koerden die heemr. tot Bamis dat een ijgelijck die gate of wagenpade hadden inden Rijndijck dat hij die dicht souden maken binnen viertien dagen of also veel aerde dair bij brengen dair mense mede dicht maken mocht of te doen, wair op die boete van x lb. Ende alle sluysen inden Rijndijck dicht te maken op die boete voirs. Anno xxxvi.

 

Location, Folio
OAR11, 36r-e
type : Consent	date : 1436-03-04	record : # 101
[006] Item geconsenteert alle die gelant sijn in Zoetermeer, tusschen den Groenen wech ende der Zijdwijn, dat sij dair vrij delven sullen, behoudelic dat si alle banwercken ende morgengelt verborgen sullen binnen den ambocht an Groenen erve bij den clerck ende ambochtbewaerres datter goet voir is ende goet houden tot prijs des heemr. Ende men sel dair twee boeken of maken vanden borchtocht, dat ambocht een ende die heemr een, duerende tot onser wederseggen, ende gesciede Reminiscere anno xxxvi.

 

Location, Folio
OAR11, 36r-f
type : Keur	date : 1436-00-00	record : # 102
[011] Item soe en sel nyemant turff graven binnen vijftich roeden vanden meeren gelegen binnen merken, op een boete van x lb., sonder op Bennebroeck dat sal wesen op xxv roeden. Anno xxxvi.

 

Location, Folio
OAR11, 36r-g
type : Keur	date : 1436-00-00	record : # 103
[012] Item soe en sel nyemant turf graven opten hogen oort op een boete van x lb.

 

Location, Folio
OAR11, 36r-h
type : Keur	date : 1436-00-00	record : # 104
[013] [014] Item soe en sel nymant turf graven after Heemstede in Heemstederbroeck op een boet van x lb. Item soe en sel nyemant turf graven vanden nuwe wech bij Bennebroek tot Lys to op een boete van x lb. dan van elke morgen vier dachvelts mid sluypsloten sonder zwetten of oposen. Anno xxxvi.

 

Location, Folio
OAR11, 36v-a
type : Keur	date : 1436-02-28	record : # 105
[015] Item soe wat poorteren van Hairlem geveent sijn tot Aelsmer, die sullen delven mogen aldair van elke morgen iiii dachvelt ende nyemant meer dan xxxii dachvelt, op een boet van x lb., duerende tot onsen wederseggen.

 

Location, Folio
OAR11, 36v-b
type : Keur	date : 1436-00-00	record : # 106
[135] Item die heemr. van Rijnlant hebben gekoert ende bevolen den dijckgrave van Rijnlant dat hij die sluyse ende watergang bij Dyewe Stiengens toe slae ende palen, ter tijt toe dat sij alle onkost tot desen dage toe betaelt hebben ende alle kaden ende watergang volmaict hebben gelijc behoirt ende van outs geweest heeft, ende dair tenden gebetert die overhoricheit die tot hair toe gesciet is.

 

Location, Folio
OAR11, 36v-c
type : Keur	date : 1437-03-12	record : # 107
[105] Anno xxxvii. Item die heemr. hebben gekoert op sinte Gregorijs dach dat alle die gaet ende overvaert hebben doir Stompwiker wech dat si hoir vairten ende sloten after an die meeren dicht sullen maken voir paesch dach naest comende opter heemr. koer. Ende wair yement die dit weder op dede, dat wouden sij corrigieren na haers selves goetduncken, ende dit sel gedueren tot onsen wederseggen.

 

Location, Folio
OAR11, 36v-d
type : Keur	date : 1437-06-29	record : # 108
[050] Item die heemr. koerde tot Petri anno eodem dat nyemant meren en soude an die platen of intangen tot Sparendam, binnen noch buten, op die boete van x sc.

 

Location, Folio
OAR11, 36v-e
type : Keur	date : 1437-06-29	record : # 109
[051] Item soe wie eerst an die sluysen of voir komen, die sullen eerst in varen op die boete van x sc. sonder venten goet.

 

Location, Folio
OAR11, 36v-f
type : Keur	date : 1437-06-29	record : # 110
[052] Item soe en sel nyement op die sluysen staen ende trecken sijn scep in mit touwen of mit haken, op die boete van x sc.

 

Location, Folio
OAR11, 36v-g
type : Keur	date : 1437-06-29	record : # 111
[053] Item so sel een ygelijc sijn mast in voeren op ses voet, op die boete van x sc., eer hij in die sluyse vaert van binnen of van buten.

 

Location, Folio
OAR11, 36v-h
type : Vonnis	date : 1437-05-07	record : # 112
[016] [000] Anno xxxvii tot meye. Item Clais Jan Wouters z. sal hebben ende houden den kadijc op sijn lant gelegen bij Costverloren tot eygen ende ewigen dagen, ende dair voir sal hij weder hebben ende houden voir him ende sijn erven den dijck tot Costverloren, te weten vanden zwtoost eynde in ant enden van sinen dijck totter Halver wateringe toe, dats te verstaen aldair die leste sluse van Costverloren lach ende op gebroken wort, ende aldair brieven of geven ende nemen als dat behoirt. Hier waren bij burghermeesteren van Aemsterdam Ruus Jacops z., Auwel Pieters z. ende Jan Bet, ende sijn oude voirwairden salmen verclaren bij Auwel ende Reyner [Reynerszoon].

 

Location, Folio
OAR11, 37r-a
type : Consent	date : 1437-05-07	record : # 113
[007] Item consenteert die van Zoetermeer dat sij scouwen sullen ende een watergang maken viii voete wijt boven den Groenen wech streckende vander Clootstael westwart an die wetering, ende elx sal dat banwerc maken tenden sijn lande, ende die scout mit sijn heemr. sullen dese watergang scouwen alst noot is, op sulken boeten als sij hair ander banwerc scouwen. Dit sal gedueren tot onsen wederseggen.

 

Location, Folio
OAR11, 37r-b
type : Scheiding	date : 1437-06-25	record : # 114
[012] [023] Anno xxxvii op sinte Jans scouwe. Item soe sijn die heemr. ende dijckgrave overdragen van sulken ghescheel als onderlinge hadde Gerijt van Heemstede an die een zijde als een heer van Benthusen ende Willem Bort an die ander zijde roerende van eenre vaert vanden Hogen veen dair hertoge Aelbrechts hantvest of is. Eerst in houden op dat punt dat aldus spreect 'ende dese waterscup sullen maken all die gelant sijn inden veen voirseit ende in die Benthorn morgen morgen gelijc ende men selse bescouwen ende hoefslagen mitten rechten ende dagelix heemr. van Benthusen,' etc., dat dat punt in volcomenre wairde is ende bliven sal gelijc die hantvesten wtwijsen ende begrijpen. Ende want die hantvest begrijpt in den andere punt dat sommige luden gelant mitten ende streckende tot Waensveen wairt geen cost an desen waterscup leggen en wouden noch geen waterscup en begeren, die en sullen in desen voirseyde watergang niet comen ten sij dat sij voldaen hebben den genen die voir hem gelant sijn ende den voircost wt geleit hebben, etc., soe seggen die dijckgrave ende hemr. hier of wair yemant die dair gebreclijck in waer ende sijn gelt niet betaelt en hadde of betalen en woude also die heemr. dat voir rechte sullen wijsen die onwillige en sel niet dan wateren inden watergang ten sij dat hij voldaen heeft vanden oncost als voirs. is. Ende dair voir mach die gene die gebreck hebben die onwillige of dammen of mit recht toe spreken voir den heemr., behoudelic den heemr. alsulc toe seggen als sij op die voirs. veenen mogen hebben. Ende hier op sal Willem Bort binnen viertiendage over geven die gebrecken die hij hier an heeft in handen des heemr. ende ter naester maelstat die die heemr. tot Leyden houden sullen sullen sij dan dair off wijsen dat recht is.

 

Location, Folio
OAR11, 37v-a
type : Scheiding	date : 1410-00-00	record : # 115
[013] [106] Anno xxxvii xxii dage in augusto tot Leyden. Item op die tijt is overdragen die heemr. mit horen dijckgrave dat Trude Baven ende Jan van Leyden mit haren medegesellen, vander brugge ende vaert die sij in haren lande hebben leggende buten der Zijl poort bij Leyden, dat sij die brugge ende vaert gebruken sullen als sij tot hoir toe gedaen hebben ende hem in voirtijden vanden heemr. consenteert is. Ende of dat sake wair dat him yement vor der recht dair in vermaet, die sullen dat mit rechte vervolgen eer sij hem enige verfaer of overvaert dair in bewinden sullen te doen in eniger wijs ten sij bij haren wille. Ende dede dair yement boven, dat soude staen tot des heemr. correctie. Dit sal geduren tot onse wederseggen.

 

Location, Folio
OAR11, 37v-b
type : Keur	date : 1437-09-03	record : # 116
[054] Anno xxxvii des dijnxdage voir nativitas tot Aemsterdam. Item soe koerde die heemr. Ghijsbrecht Jan z. dat hij sijn dijck maken sel wt den Halmer dair hij op gedijct is, ende voir die roedt geven een witten penninc, ende des gelijcx selmen Ghijsbrecht sijn aerde ende een gyelijc weder betalen. Dit sel geduren tot onsen wederseggen of dat yemant mit recht weert.

 

Location, Folio
OAR11, 37v-c
type : Keur	date : 1437-09-16	record : # 117
[106] Item so hebben die heemr. mit horen dijckgrave gekoert een waterscup in die Aer ende sel beginnen an die Aer op dat oostende streckende an die Oude Aer weteringe ende voirtin die meeren, ende dese waterganc sullen gebruken die vanden Scoot ende die vanden Corter Aer, ende die gelijc hoofslagen ende maken morgen morgen gelijc na ouden costumen bijden scout ende heemr. vanden Aer. Ende die scout ende heemr. sullen dese waterganc scouwen op een boete van ii sc. tot alre tijt als sij noot is te scouwen, ende dit sel gedueren tot onsen wederseggen, ende gesciede anno xxxvii op sinte Lambrechts avont tot Leyden.

 

Location, Folio
OAR11, 37v-d
type : Keur	date : 1437-12-20	record : # 118
[107] Item soe sijn die heemr. mit der dijckgrave overdragen dat die van Hasertswoude wech ende weteringe doir scouwen sullen sonder op hoor te gaen. Ende wes werc sij ongemaect vinden ten eerste dage, dat sullen sij besteden openbair om den mijnsten cost ende dair den saeck weldighen sijn koer of geven of hij dat werc selve maken wil of dat die bestedinge voirt gaen sel. Ende wes werc sij ongemaect vinden, dair sal die scout mitten heemr. sijn scouwe weder op leggen opten achtsten dach ende dan sullen si scouwen op der geenre cost die sijn werc ongemaect was veel of luttel. Des sel die cost wesen die scout iiii sc. ende die heemr. iisc. Dit is gescieden anno xxxvii op sinte Thomas avont ende sel geduren tot des heemr. wederseggen.

 

Location, Folio
OAR11, 38r-a
type : Keur	date : 1437-09-24	record : # 119
[108] Anno xxxvii die djnxdage na sinte Matheeus dach. Item op die tijt die van Oestgeest gekoert dat sij alle dat heel ambocht mit malcander gelden sullen tsij slusen, bruggen, hoelen, wegen ende als dat si behoeven in wat polre dat eerst of lest gebuert, duerende tot onsen wederseggen. Ende den scout selmen geven xl sc., die bode x sc.

 

Location, Folio
OAR11, 38r-b
type : Keur	date : 1437-09-24	record : # 120
Item op die tijt heeft die stede van Leyden als Gerijt van Oestgeest, Jan Heerman ende Willem Bort gedadinct voir hoir poorteren als vanden brucken vanden poeten. Eerst sullen sij over leveren een woensdage over acht dagen all die in horen dadinge sullen wesen, ende die sullen geven elx xx sc. te betalen op ten dertienen avont. Ende soe wie sij niet over en leveren als willige, die sullen staen op hoir recht als dat behoirt.

 

Location, Folio
OAR11, 38r-c
type : Brief	date : 1437-10-01	record : # 121
Anno xxxvii op die Bamisse scouwe tot Sparendam. Item op die tijt soe gaf Pieter Jacop z., Jan Andries z. enen brief totten onderpande van xl sc. siairs ter tijt dat hij hem sijn lant vrijt of dair die wairde voir gheft bij goede luden, ende wair den brief niet goet genoich so soude Jan Andries z. den brief weder over geven ende dan horen wtersten dach teghen malcander hebben ten naesten recht dage.

 

Location, Folio
OAR11, 38r-d
type : Consent	date : 1437-12-20	record : # 122
[008] Anno xxxvii op sinte Thomas avont. Item soe hebben die heemr. consenteert op die tijt dat die van Boskoep, Middelburch ende Randenborch hair wercwisinge tot Sparendam ende op die Does weteringe doen sullen mit een ambochts bewairre, sonder verboren voir him drien.

 

Location, Folio
OAR11, 38r-e
type : Keur	date : 1437-12-20	record : # 123
[109] Item soe sal een ambochts bewairre van Boskoop bewaren alle wercwair vanden ambocht ende oncost ende dat te rekeninge bringen sonder die gemeen rekeninge van die waterscuppen mit die van Alfen.

 

Location, Folio
OAR11, 38r-f
type : Keur	date : 1437-12-20	record : # 124
[110] Item soe sullen die heemr. van Boskoop, Middelborch ende Randenborch scouwen ter eerster scouwe doir, sonder op hoir te varen, ende die scout sel hebben van elke scouwe iiii sc. ende elc heemr. ii sc. Ende of sij banwerc vinden, dat sullen sij besteden om den minsten cost openbair, ende dair hair scouwe weder op leggen op den achtienden dach, ende dan sullen sij scouwen op der geenre cost die sij voer bescouwet hebben ende nit op des ambochts cost. Ende des gelijcx sullen elcx scouwen in den sinen, durende tot onsen wederseggen.

 

Location, Folio
OAR11, 38v-a
type : Vonnis	date : 1438-02-25	record : # 125
Item een kenninge vanden heemr. op sinte Pieters scouwe anno xxxviii. Item die kenninge tusken den dijcgrave ende die van Alphen, soe geven wij die kenninge dien dijcgrave ghewonnen ende die van Alphen verloren na wtwijsingen onsen koeren, ten wair dat die van Alphen ons bewijsen mochte dat wij him des verdragen hadden op die Does scouwe lestleden ende dat gewijs brengen also besceydeliken dat die heemr. dunct hair besceit goet wesen, ende dat besceit sullen sij brengen in hande des heemr. binnen xiiii dage of ten sal him niet te baten comen.

 

Location, Folio
OAR11, 38v-b
type : Keur	date : 1438-02-25	record : # 126
[029] Item soe hebben die heemr. mit horen dijcgrave bevolen ende bevelen dat een ygelijc sijn scutinge, weerstal ende staende tou wt den Rijn halen over al binnen xiiii dagen ende niet weder en setten inden voirs. Rijn. Ende dede dair yemant boven, dair wouden wij mit rechte mede voirt buren als dat behoirt sonder yemant des te verdragen.

 

Location, Folio
OAR11, 38v-c
type : Beveling	date : 1438-02-25	record : # 127
[007] Anno xxxviii Petri. Item die heemr. ende dijcgrave sijn overdragen ende hebben bevolen ende bevelen den scout van Voirscoten ende die gemeen buer dat sij ambochts bewarers kiesen als costumelic is binnen xiiii dagen ende dair tenden binnen xiiii dagen dat morgen gelt omme setten als costumelijc is, te weten tot sulker sommen toe als die cedel wt wijst die die heemr. dair of corrigiert hebben ende weder over gegeven hebben ende niet vorder. Ende geviel dair enich gebreck in, dair wouden sij op voirt varen als dat behoirde ende voirt ambochts bewarers setten ende dat morgen gelt omme slaen na horen goetduncken ende gewoenten.

 

Location, Folio
OAR11, 38v-d
type : Beveling	date : 1438-05-06	record : # 128
[001] Anno xxxviii op die meye scouwe. Item die heemr. ende dijcgrave hebben bevolen den scout van Aelsmer dat hij scouwen sel den wech van des Burchgraven veen streckende wt an die rijsdrecht tot sulken tijden vanden jair alst nutte is. Ende wair yemant die dair gaet of doirvairt in houden willen, die soude dair een brugge over liggen tot des scouten ende heemr. prijse. Dit sel geduren tot onsen wederseggen, tghesciede tot Sparendam op die meye dach.

 

Location, Folio
OAR11, 38v-e
type : Beveling	date : 1438-05-06	record : # 129
[002] Item die heemr. hebben bevolen ende bevelen den scout vanden Venp, Jan Willems z., dat hi die wege scouwe aldair binnen des maent van meye ende voirt tot allen tijden als costumelic is. Ende geviel dair gebrec in, dat wouden sij corrigieren als dat behoirde.

 

Location, Folio
OAR11, 39r-a
type : Keur	date : 1438-05-06	record : # 130
[080] [000]Item die heemr. mit horen dijcgrave hebben gekuert datmen alle sloten die gelegen sijn an enige watergange sloten ende scoon maken sal alle jairs eens vijftich roeden lanc vanden watergangen opwarts, ende men salse maken alle jair binnen der maent van meye. Ende wair yement die des niet en dede, soe hebben sij bevolen den scout elx inden sinen dat hij dan die sloten begaen sel mit twe sijn heemr. of mit twe bueren ende bestedense gelijc ende in alsulke manieren dat sij binnen acht dage gemaict sijn. Ende die scout sel hebben voir sinen ganc ii sc. ende die heemr. of buer elx vi d. Anno xxxviii.

 

Location, Folio
OAR11, 39r-b
type : Consent	date : 1438-06-24	record : # 131
[009] Anno xxxviii Does scouwe. Item consenteert die vanden Scoot dat sij mit vijf heemr. scouwen sullen in vollen scouwe.

 

Location, Folio
OAR11, 39r-c
type : Keur	date : 1438-06-24	record : # 132
[055] Item soe selmeen draeybomen setten opten dijck ende bescutten den dijck datter nyement mit waghens langes en vaer, ten sij mit hoeye, dijkaerde off suvel. Item die van Sparenwoude sullen setten een draeyboom bi dat eerste huus onder den dijck. Item die van Oestdorp sullen setten enen draeyboom bij Allert Lubbrants z. Item die van Sloterdijck sullen setten enen draeyboem bij Claes Jan Bette z. Ende dese sullen gemaict wesen binnen xiiii dagen op der heemr. koer. Anno xxxviii.

 

Location, Folio
OAR11, 39r-d
type : Beveling	date : 1439-06-24	record : # 133
Anno xxxix op die Does scouwe. Item geboden in allen kercken dat nyemant scuttinge noch vischtouwe te setten in gene wateringe na wtwijsinge der hantvesten ende koeren opten Rijn geleyt.

 

Location, Folio
OAR11, 39r-e
type : Keur	date : 1439-07-06	record : # 134
[111] Anno xxxix des sonendage na Martijn. Item soe hebben die heemr. gekoert enen waterganc tot Catwijck opten Oernnesse. Eerst een greppel ende scouwe sloot die sel beghinnen an Gerijt Boeyen weyde streckende an die horn an Symon Brunincs hofstede, ende die sel maken elx tenden sijn lant. Item noch een greppel die sel beghinnen an dat westende an die dwn tusschen der kerken lant ende der susteren lant van Leyden streckende anden wech ende doir den wech mit een hoel tusschen heer Dirc Aems z. lant ende Jan Wouters z. lant streckende tot inden Sant sloot. Ende dese greppelen sullen maken alle die boven den wech gelant sijn ende dair mede gebaet sijn, ende die sel die scout mit sinen heemr. aldair hoefslagen als dat behoirt also wijt alst hen nutte dunct bij horen eede.

 

Location, Folio
OAR11, 39v-a
type : Keur	date : 1439-07-06	record : # 135
[112] Item soe selmen den Santsloot scouwen als men van outs plach mit een hoele doer den wech, ende alle die dair an gelegen sijn sullen desen sloot maken, elx half ende halff, ende men sel dese greppelen mitten wech in Oernnesse ende den Sant sloot scouwen twewarf des jairs als den scout mitten heemr. nutte dunct op enen dach, op die boete van xii d.

 

Location, Folio
OAR11, 39v-b
type : Keur	date : 1439-07-06	record : # 136
[113] Item soe wes lant men yemant of gravet tot desen voirscr. greppelen selmen betalen totter heemr. prijs van Catwijc, ende dit sal geduren tot onsen wederseggen.

 

Location, Folio
OAR11, 39v-c
type : Beveling	date : 1440-03-23	record : # 137
Anno xl des woensdage voir pasen inden Hage. Item soe selmen den Hogen veen panden van alsulken oncost als dat lant lest gehadt heeft ende keren sij pande, soe selmen dair op voirt varen inden vart.

 

Location, Folio
OAR11, 39v-d
type : Keur	date : 1440-03-23	record : # 138
[003] Item soe sijn die heemr op den selven dach overdragen so wat vier heemr. mit horen dijcgrave koeren ende overdragen, dat sel van waerden wesen gelijc of sij alle te samen waren, ende mense sel tot allen tijden als sij vergaderen teykenen ende scriven int boeck soe wat heemr. tot der maelstat comen, anno xl.

 

Location, Folio
OAR11, 39v-e
type : Keur	date : 1440-04-01	record : # 139
[114] Anno xl des vrijdage voir biloken paesken. Item so sijn die heemr als heer Gerijt van Poelgeest, Jan vanden Boechorst, Boudijn van Zwieten ende Florijs Paedzen overdragen den kadijck te maken tusschen Zoeterwoude an die een zijde ende die meer van Zoetermeer an die ander zijde. Te weten, dat een ygelijc sijn kade maken sal tenden sijn lande aldair sij van outs gelegen heeft. Ende aldair die kade verloren is in die meer, dair salmen die kade leggen te lande wart in xxv roeden vanden oever. Ende dese kade sel beginnen ende eynden als sij van outs plach te legghen, ende dese kade sel een spit hoge wesen boven die Groenswoirde gemaict voir meyen dach op die boete van x sc. elx eygen. Item noch een spit dair op te hogen binnen der maent van meye op die boete dat derdendeel van x lb. Item soe sel dese kade volmaect wesen te sinte Lourijs dage op die boete van x lb. Item of die genen docht die dese voirs. kade maken sullen dat si dair in veronrecht waren, dat sullen sij den heemr. an brengen als die voirs. kade gemaect is. Ende dunct den heemr. dan redelic wesen, so sullen sij vorder hulpe hebben van Zoeterwoude ende Voirscoten bijden heemr.

 

Go to Folio's ...
13	20	30	40	50	60	70

 

Author	Publication	Home
William H. TeBrake Maine, USA, June 2006	Rijnland OAR11, OAR12, OAR13	www.oudleiden.nl

 

Hoogheemraadschap Rijnland OAR 11, 12, 13 : 1253 - 1564
	View: Register OAR 11 Pages 20 - 29

 

Go to Folio's ...
13	20	30	40	50	60	70

 

Location, Folio
OAR11, 20r-a
type : Keur	date : 1424-12-09	record : # 035
[022] Anno xxiiii tsaterdages post conceptio Marie: Coirden die dijckgrave ende hiemr. dat die Rijndijc boven gebreet sel wesen al langes een roede voet ende beneden ii voete also upgaende ter goederscaep. Ende boven selmen een voet hoger dan dat hoechste ende dat beste nu is ende een ygelic sel sijn gaete stoppen die hij gemaect heeft. Ende dit sel gemaect wesen voir kersavont naest comende ende men sel een dijnsdages naest comende inden werk wesen opt Rijndijck. Ende dit sel wesen up een boeten van x lb.. Ende die damme die voir die slusen leggen selmen een voet hoger maken dan die dueren vander sluysen sien.

 

Location, Folio
OAR11, 20r-b-20v
type : Keur	date : 1425-06-24	record : # 036
[023] Anno domini xxv op sinte Jans dach nativitas. [20v] Coirden die dijckgrave mitten hogen hiemr. dat die Rijndijck twee roede voete vanden wallen leggen sel. Ende sel beneden breet wesen ix voet ende boven vi roede voete. Ende sel hoge wten water wesen vii voete. Ende dese rijndijck sel gemaeckt wesen voir onser liever vrouwen dach assumptio ende selmen scouwen des anderen dages dair na.

 

Location, Folio
OAR11, 20v-a
type : Consent	date : 1425-ca	record : # 037
[001] Item concenteert die hoge hiemraden mitten dijckgrave dat die neder hiemraden van Oestgeest scouwen sellen van Oestgeester kerck tot Saelmons berc toe ende den hogen dijck opten Rijnwech sellen sij coirren also groit ende also breet als hem orbairliken duyncken sel tot des lants orbair up alsullic boete als custumelic is. Voirt so sellen sij van Oestgeester kerck zijdwert tot des burchgrave conijns campe toe vanden ouden hovecooren ence scouwen mogen voir een waterkeer in allen manieren als voirs. is. Ende dit sel duyeren ter der hiemr. wederseggen to. Ende des gelijx is hem concenteert dat sij dair palingh up coren mogen voir dat rijden off xij willen.

 

Location, Folio
OAR11, 20v-b-21r
type : Keur	date : 1425-06-24	record : # 038
[155] Item vander inlage die in Sparenwoude ban leyt selmen van elken roede van aertgelde geven een ouden tuyn. Item van van Hofambochter wech buyten ende binnen voirt ten oestende toe vanden nuwen dijck selmen geven van elker roede een nuwen tuyn. Item van aertgelde van allen walen van desen jair. Ende van allen aender werck dat geslagen is en men slaen sel binnen desen jair totter dijckaedzen behoef binnen off buten streckende vanden ban van Sparenwoude tot Osdorp toe selmen geven van elker roede een oudt buttgen Item van palin toe also verre als dier hiemrade scouwe gaet selmen geven van allen aerdwerk dat geslagen is ende men slaen binnen des jair totter dijkaedsen behoef binnen off buten van elker roede een ouden tuyn, wtgeset dat inde wael gebroken is selmen geven [21r] een out buttgen te betalen tot sinte Martijns misse. Item so selmen nemen die naeste aerde ter minster scaede ter meeste oirbaer sonder yements weder zeggen.

 

Location, Folio
OAR11, 21r-a
type : Keur	date : 1425-00-00	record : # 039
[040] Item so coirt die hiemraet dat die van Hofambocht dien wech datmen up vairt van Heynric Baerts z. dijck butens dijcks anden nuwen dijck also breet maken zellen dat men mit enen wagen rijden mach op ende neder mit goeden last, ende dat een eynde also hoge als den wtern cant vanden nuwen dijck, ende sel gemaect wesen voir sinte Jans dach te midsomer up een derendeel van x lb. Gedaen anno domini xiiii c xxv.

 

Location, Folio
OAR11, 21r-b
type : Keur	date : 1425-00-00	record : # 040
[041] Otte van Reymerzwaele bailiu ende dijckgrave van Rijnlant, Gillijs van Cralinge ridder, Jacob vanden Woude heer van Wermond, Gerijt van Buschusen ende Heynric Harmans z. knapen ende hoge hiemr. van Rijnlant doen kont alle luyden dat wij om des besten willen overdragen sijn tot wat tijden dat die dijckgrave ende dit hiemr. van Rijnlant die nu sien off naemaels wesen sullen enige sluysen wyten put willen hebben ende vermaectk tot Sparendam toe behorende den lande van Woirden. So sal die dijckgrave ende hiemr. van Rijnlant voirs. een wete dair off doen twe hiemr. vanden lande van Woirden achte dage dair te voren dat die dijckgrave ende hiemr. voris. die sluyse bestaden sullen eer zij dair scade bij liden. Gedaen anno domini xiiii c xxv.

 

Location, Folio
OAR11, 21r-c-21v
type : Vonnis	date : 1399-08-30	record : # 041
[001] Aelbrecht biden genaden goeds paelensgrave opten Rijn hertoge in Beyeren doen kond allen luyden dat wij om voirsoecs wille van onsen lieven ende getruwen den heer van Egmondt ende Yselsteyn heren Jan die Bastert van Baloys ende zommighe anderen van onsen vrienden geboden ende bevolen hebben onsen wel geboren hiemr. van Rijnlant dat sij om gemeen oirbair gewijst ende gekoiren hebben dat die wilde veen die gelegen is after Haeserswoude ende onsen ambocht vanden Berthorn wateren zullen in die [21v] wateringe van Benthuysen doir onsen ambocht van Hasertswoude tot inden Rijn. Ende dese waterscip zullen maken alle die gene die gelant sien inden ambocht voirs. ende in de Berthorn morgen morgens gelijc. Ende men salse bescouwen ende hoefslagen mitten rechten ende dagelixen hiemr van Benthuysen. Ende so wat koiren dese voirs. hiemr. hier up koiren zullen het sie van brugge te maken, van spooyen, van slusen off van enich ander dingen dat oirbair in brengen mach dat sel gehouden werden sonder enich weder spreken. Ende is dat sake dat sij yemant dair overherich in vinden, die sal voldoen dair off alsmen van slusen, van wateringen plach te doen ende aldair custumelic is. Ende en deden sij des niet,so en sal die rechter voirs. gelt wyt leggen ende weder vanden onwilligen up bueren twe scat an gelde ende vier scat an pand. Ende dat sal die rechter voirs. machtich wesen te panden mitten hiemraet an hoir goet off anden veen off in die Berthorn dier gelijc off an zullic goet als vanden lande coemt binnen der waterscip voirs. Voirt want inden veen voirs. mitten eynde tot Waddinxveen wart strekende alrehande luyde gelant sijn die geen waterscip en begeren noch geenen cost dair aen geleyt hebben, die luyden en zullen in desen voirs. waterganc niet comen ten sij dat sij dair off voldoen hebben den genen die voir hem gelant sijn ende den voircost wyt geleyt hebben. Voirt zullen alle die gene die gelant sijn inden ambocht van Benthusen dese wateringe ende waterscip mede gebruycken het sij met opvaren ende wtvaren gelijc den gene die houden ende maken zullen zonder weder seggen van yemant. Ende tot wat tijden dese gene die besitters sijn off werden zullen van desen veen voirsc. dese wateringe niet langer bruycken en willen, so mogen sij vanden banwerck voirs. ontslagen wesen. Ende so zullen die buyeren van Benthusen die weder an nemen ende vreliken gebruycken ende houden all dinc sonder argelijst. In kennisse des brieve bezegelt mit onsen zegelen. Gegeven inden Hage des saterdages na sinte Jans dach decollatio int jair ons heren dusent driehondert ende negenentnegentich.

 

Location, Folio
OAR11, 22r-a-22v
type : Vonnis	date : 1430-01-13	record : # 042
[002] Wij Gillijs van Cralinge ende van Voirscoten, Gerijt van Poelgeest heer van Hoechmade, Gerijt van Zijl heer van Purmerende ridderen, Boudijn van Zwyeten trezerier van Holland, Jan vanden Boechorst van Nortich heer van Noirtigerhout, Meynert Claes z. ende Florijs Paedze hoge hyemraden van Rijnlant doen kond ende kenlic allen luyden dat in tijden voirleden bij rade ende goet duncken ende concente der goeder setde van Harlem ende des gemenen lands van Rijnlant gecomen sien upten dijck tot Sparendamme heer Gillijs van Cralinge ridder voirs., Adriaen van Raephorst, Jacob vanden Woude, Harper van Freest, Willem van Zaenden, Gerijt van Buschusen ende Heynric Hermans z. hoge hiemraderen van Rijnlant up die tijd aldair in eenre inlage bij ongeval van water der kercken dijck van Sparenwoude zeer gebroken ende verplaecht was also dat sij samentliken bij rade ende goduncken der goede stede van Harlem ende den gemenen lande van Rijnlant voirs. om zonderlingelast ende noots will, die den gemenen lande van Rijnlant voirs. dair an gelegen was, deden bieden ende kundigen off dair ymant wair die der voirgen. kerken dijck om der voirs. kerken wille om een redelic loon [in left margin of OAR12 is added 'woude'] an nemen te maken ende tot sijn volmacten dijcke weder upbrengen en volmaken woude. Desser nyement en quam die dat an nemen off hem onderwinden wouden, also dat sij doe om des groten lasts wille dien sij bekenden datter den gemenen lande van Rijnlant voirs. aen gelegen was zeer dair mede belast ende begangen waren hoe dat sij den selve dijck voirtbrengen ende volmaken soude, des heer Jan Allerts z. priester, uptietijt vicecureyt tot Sparenwoude voirs., aensach ende merchede dat sij dair zeer mede begangen waren merckte aensach oic die groten last mede des dijcks ende grote vrese des gemenen lande van Rijnland voirs. ende van Sparenwoude, ende namden selven dijck mitt sinen vrienden ende magen an weder te maken ende voirt te brengen tot sinen volmaecten dijck vijftien roeden ende een voet lang. Aldair die voirgen. hiemraden up die tijt waren him van elker roede gelooft ende toe geseyt hebben seven nobele, ende doe heer Jan voirs. den voirgen. dijck met sinen magen ende vrienden aldus an ghenomen [22v] ende oic verborght hadde te volmaken die roede om zeven nobele voirs., doe namen die voirgen. hiemraderen hoir beraet ende hoir bezuec noch xiiii dage lang ende ondersochten dair en binnen heymelic ende openbair off sij yemant hadden mogen vinden die hem dien voirgen. kerken dijck hadde willen onderwinden off dat sien mijn hadde mogen besteden te volmaken. Ende want sij nyement en vernamen noch en vonden, soe moste heer Jan voirgen. mit sinen magen ende vrienden der voirs. dijck dijken ende ten vollen dijck volmaken elke roede om zeven nobele voirs. die wij bekennen dat him noch alinge ende al gebrecken na inhout der heemraderen beloften voirs., ende mede na inhout der zevenen gelijcken dat punte vander dijckaedzen inder zelver zevenen begrepen inhout dat een ygelic sijn wtleyden gelt weder eenscat hebben ende ontfangen sel. Voirt so bekennen wij mit des selve brieve dat heren Jan voirgen. noch inder selver dijckaedzen aen alrehanden stucken ende oncosten die hier voir niet geruert en sien veel gelts wt geleyt ende scaden gehat heeft die wij houden tot onser verclaring. Ende overmidts dat der kerken lant van Sparenwoude voirs. dijchout ende dijcksrecht plegen moste, ende mede om dat wij inder wairheyt wel vernomen ende verstaen hebben dat alle dese voirs. punten bijden hogen hiemraderen voirgen. mitten dijckgrave ende bij concente, raet ende goetduncken der goeder stede van Harlem ende des gemenen lands van Rijnland voirs. mitten dijckrecht gansseliken ende volcomeliken gesciet sijn, so hebben wij hogen hiemraderes voirs. samelic mit onsen dijckgrave ende bij raded ende concente der goedere stede van Harlem ende den gemenen lande van Rijnlant voirs. heren Jan Aelaerts z. priester voirgen. mit volcomen dijckrecht in hande geset alle der kerken dijclande voirs. te besitten ende te gebruken ter tijt toe duyerende dat hij van siner wtgeleyde gelde dat hem gelooft was ende mede na inhout der zuenen voirs. wel voldaen ende betaelt is, den lesten penning mitten errsten. In oirkonde desen brieve bezegelt mit onsen zegelen hier an gehangen. Gegeven des vridages na sinte Lucien dach int jair ons heren dusent vierhondert ende dertich.

 

Location, Folio
OAR11, 23r-a-25v
type : Vonnis	date : 1433-00-00	record : # 043
[003] Item so gebuerde tot eenre tijt dat die stede van Harlem horen gewairden bode alse Florijs Bol seynden tot Leyden bider hiemr. van Rijnlant die den hiemr. te kennen gaff, hoe die van Aemsterdam den ommedijck van Rijnlant doer hadden gesteken ende hair sacwollen doirgevoirt, ende dat sij die palen die die hiemr. in die waterscap hadden doen steken up hadden gehaelt, ende enen overslach hadden gemaect over den ommedijck, ende begeerde vander stede wegen van Harlem voirs. so sij mede dair onder beduufden dat hem die hiemr. voirs. dat onrecht woude aff nemen ende berechten bijden eede die sij den lande van Rijnlant gedaen hebben. Deden sij des niet sij wouden des over hem belclagen dair sijt sculdic waren te clagen. Dit aldus die hiemr. voirsc. horende, senden sij ter stont horen gezworen clerck ende bode upten ommedijck ende palinge voirs. ende vonden dat sij den ommedijck doir gedaen hadden ende weder to gedaen ende helt doe ter tijt een voet waters, ende veel sacwollen dair doergevoert ende die palen up getogen, des doe die clerck ende bode voirs. voirt togen tot Aemsterdam van des hiemr. wegen anden gerechte van Amsterdam om te weten vander stede van Amsterdam off dat bij hare bevele gesciet wair. Des doe die clerck ende bode enen dach besceyden wort des anderen dages voir middage upter stede huus so sij begeert hadden mitter stede te spreken vanden voirs. saken. Ende des quamen die clerck ende bode upter stede huus voir tgerecht ende vroescap die dair op die tijt saten ende seyden dat sij dair gesent waren om van hem te weten off sij bevolen hadden den ommedijck duer te steken ende voirt dair duer te voeren hoir velle ende die palen op te trecken. Des worden die clerc ende bode off hieten gaen sij wouden hem beraden, ende doe riepen sise weder up ende dair sat Jan Heynnen z. mitten gerecht ende mitter vroescap ende hilt horen alre woirden ende seyde, 'Den dam heeft onse stede selve aldair doen maken, wair om en souden wij die niet op doen ende toe doen alst ons genoecht om onse goede aldair doer te voeren, mar van die palen op te halen, dat is buuten ons gesciet.' Doe andwoirde die clerck ende seyde 'So wil ic die hiemr. seggen van uwen wegen dat dat duerstecken ende duervairt bij concent van uwer stede geschiet is.' Ende dair andwoirde Jan Heynen z. weder aldus: 'Uptien dam [23v] duer te stecken ende die duervairt, dat hadden sij horen poirters geoerloft ende dat stonden sij hem, mer van die palen up te halen, dat wair buyten haren wegen ende sij en bewonden hem des niet die dijcgrave ende hiemr. sochtent ende rechten an den genen die dat ghedaen hadden.' Die dijcgrave aldus verhoorende is gecomen mit recht bijden hogen hiemr. ende heeft hier off een recht an geleit upten vier burgermeesters als voechden der stede van Amsterdam hem aenseggende mit dingtalen mit drien aen spraken, dat sij voir hem zelven ende voir horen mede poorteren ende seyde in sijn eerste aenspraeck dat sij den ommedijck duergesteken hadden ende dat vreemde water in gelaten hadden ende duervaert gemaect hadden buten oirloff vanden voirs. hiemr. ende zeyden dat sij dair an verbuert hadden elx eygen die hoechste boeten off also veel as die hyemr. wijsden dat recht wair, ende des boot hij hem der hiemrad. kenninge. Ende die ander aenspraeck was die de dijcgrave dede voir den hiemr. dat sij een overslach maecten aldair upten voirsc. ommedijck doir die waterscap van Rijnlant buuten oirlof ende concent vanden hiemr. ende zeyde dat sij dair an verboirt hadden sij ende hair mede poirteren elcx eygen die hoechste boeten off wes die hiemr. wijsden dat recht wair ende des boot hij hem die hiemr. kenningen. Ende die derde aenspraeck die de dijckgrave voirs. dede was aldus dat sij ende hoir mede poirten die palen up getogen hadden die de hiemr. hadden doen steken in des lands waterscap buuten oirloff ende concent vanden hiemr. ende zeyde dat sij dair an verbuert hadden voir hem ende voir horen mede poerteren van elke eygen die hoichste boete off wes die hiemraet dair of wijsden dat recht wair ende des boot hij hem die hiemraden kenningen. Dair op dien tijt quamen die burgermeesters van Aemsterdam ten vrienden dage mit Ruuys Jacob z., dair Ruuys up die tijt geerde of hij verandwoirden mochte voir die burgermeesters van Aemsterdam sonder begrijp van boeten, dair him off gewijst wort dat hijt wel doen mocht also verre alst hem die burgermeesters stonden die up die tijt ja zeyden. Ende dair andwoirde hij van der stede wegen dat sij dair niet sculdich en waren te andwoirde te staen ende des ontsculdich waren na wt [24r] wysinge deser na gescreven cedul, ende dair up gingen sij ander hiemrade kenningen gelijc hem die dijckgrave boot. Dit is der poirtmeesteren andwoird van Aemsterdam tegens den dijcgrave des hogen hyemr. van Rijnlant ende seggen dat sij des alingen onsculdich sijn van alle der aentichte die hem die dijcgrave betyet in sijnre aensprake bij reden, want sij horen poirteren niet gehieten noch geoirloft en hebben die slusen up te doen twater wten Ye in te laten lopen dat oick niet gesciet en is noch vanden poirteren geconsenteert, ende en hebben oick niet gehieten den dam anden Heiligen wech doir te steken noch enich palen dair up te halen om enich goet dair duer to voeren of over den voirs. dam te slepen, mer dair is van outs een overtocht geweest, als den goeden steden van Delft, Leyden ende menich goet coepman wel weten, ende off dair enich goede meer over getogen waren buten concent der poirtmeesteren voirs. dair hadde hem die noot toe ghedrongen, want die stede van Harlem ons liefs genadich heren ende vrouwen stroom den poirteren van Aemsterdam voir Sloten, hoe wel die voirs. dam dair eertijts geleyt is bij oirlof ende concent des hogen hiemr. ende oic becosticht vanden poirters van Aemsterdam. Oyc so en is die voirsc. dam geen ommedijck ende die hemrade en hebben dair sluse, dijck, dam, lant noch wateren, ende die voirs. dam is dair doen leggen om dat twater der poirteren lant van Aemsterdam niet belopen en soude, ende die dam dair des dijckgrave aenspraeck off ruert is buuten des dijckgrave ende hogen hiemr. bedrive gelegen dair die dijckgrave mitten hogen hiemr. geen bewijn en hebben noch nye en hadden ende oick nye gezien noch gehoirt en is bij mants leven off bij lants leger noch bij onsen ouderen tijden dair men off weet te seggen, dat yeenich poirter van Amsterdam aldus aen getaest oft gemoeyt wort van enich dijcgrave voirs. of hiemr., ende willen des hair onsculde doen als recht is, ende seggen dat sij mit recht tot haren onsculde comen zullen also sij staen up enen vrien bodem ende onverwilcoirt, ende die dijcgrave voirsc. scepen noch scepen tuuch op hem en heeft ende zeggen dat hem die dijcgrave mit recht niet sculdich en is te verwinnen of mit enich [24v] tuge over te gaen dan mit scepen tuych. Ende also dese voirs. dam der voirgen. stede poirteren van Aemsterdam toe behoirt ende oyck niet gelegen en is binnen den mercken of scouwen van Sparendam, so seggen die voirsc. poirtmeestern dat sij dair off voirden dijckgrave voirs. mogelic tot genen recht staen en zullen, want die dijcgrave noch hiemr. geen bewint sculdich en sien te hebben noch nye en hadden. Voirt seggen die poirtmeesteren noch hier en boven dat sij noch hoir poirteren voirden dijcgrave noch voirden hyemr. niet sculdich en sien te recht te staen bij deser reden, want die stede Amsterdam goede hantvesten vander grafelicheyt van Hollant heeft die hem van onsen geduchten here van Boirgonen ende van onser genadige vrouwen van Hollant geconfirmeert sijn, welke hantvesten begrijpen: Eerst in enen punt datmen genen poirter van Amsterdam noch sijn goet bezetten en mach voir scade off voir scoude onverwilcoirt binnenden Masen wtgenomen in vrien steden, ende so wair der poirteren goet gelegen is, dat en sel nergent ongelt geven dan binnen Amsterdam dan dijc, dam, wech, wateringe ende sluusgelt of dier gelijc. Ende des plechtmen enen ygeliken poirter een weet te doen te comen off te zenden inden ban dair sijn goet gelegen is, ende dair plech die stede ende die andere hoir mede poirteren vrij ende onbecommert of te wesen. Item noch een ander hantveste houdende in enen punte datmen genen poirter van Aemsterdam en sal noch en mach besetten, becommeren noch aenspreken nergent inder grafelicheyt lande bynoorden der Mase van enich broecken dan binnen der stede van Amsterdam ende die bruecken binnen der stede van Aemsterdam te berechten ende dair te eynden na vonnisse der scepenen. Ten wair datmen bevonde vechtenderhant off mit diefliken goede drivende off dragene, off dat hij brueckede in enigen vanden drien steden gelijc die poirtmeesters voirs. dat wel bewijsen mogen. Ende is dat sake dat die dijcgrave ende hoge hiemr. voirs. hem vermeeten ouder hantvesten te hebben, so seggen die poirtmeesters dat dat der stede mit recht niet tegens dragen en mach want die broeken ende boeten onser genadigen here van Borgonen ende onser [25r] genadigen vrouwen van Hollant aen gaen ende onse genadige here ende vrouwe voirn. noch mogende sijn hantvesten te geven den genen die sijts gunnen vander horen ende sij oyck also mogende sijn ende also goet recht hebben binnen der stede van Aemsterdam als dair buten ende also die grafelicheyt der stede mit goeder hanvesten over gegeven heeft aldair te berechten datter mogelijc nyement verder in te zeggen en heeft. Voirt so seggen die poirtmeesters dat sij also goet recht hebben vander stede wegen te antwoirden voir horen poirteren als een wairs man van enen doerp die voir die gemeen buyr antwoirt ende die voir staet up eenre boet ende zeggen al wairt sake datter boeten verbuert waren dat sij voir horen poirteren andwoirden mogen ende die voirstaen met gesamender hant up een boet also wel als een wairsman van sinen buyren doen mach ende andwoirden dair mede behoudelic der stede van Aemsterdam hoir hanvesten. Item hier up antwoirde die dijcgrave ende zeyde dat alle dese voirs. punten ende antwoirden van die van Aemsterdam hem an sinen recht niet dienen en souden want die hiemraders hantvesten ouder sijn dan die hantvesten van Aemsterdam ende dat den voirn. dam ende ommedijck ende waterganc gelegen is indie waterscap van Rijnlant ende dat sijt sculdich sijn te beteren na wtwijsinge der hantvesten ende vonnesse des hiemr. 'Item so alle rechtdage ende steden dair of ten vtersten dage gecomen sijn ende wij hiemr. van Rijnlant vermaent sijn vanden dijckgrave van mijns genadichs heren wegen die kenningen te uten so sij ten utersten dage gecomen sijn als voirs. is, so hebben wij die kenningen gewtet ende wt spreken in alre manieren hier na gesc. Eerst so die dijckgrave van mijns heren wegen die van Aemsterdam toe sprect dat sij den ommedijck mit craft doir gesteken hebben, ende Jan Heynen z. in yegenwoirdicheyt sommegen van gerecht ende vroescap vpter stede huus van Amsterdam van hore stede wege geseyt ende geliet heeft voir onsen gezworen clerck ende gezworen bode die wij dair om aldair gesent hadden dat dat voirs. doirstecken bij horen concent gesciet is ende die van Aemsterdam [25v] die doirvairt zelve voir ons gelijt hebben, so geven wij dair om den dijcgrave die keninge gewonnen ende die van Aemsterdam verloren. Ende also dit mit craft gesciet is, so zullen sij na des dijckgraven aenspraeck dair voir geven voir hem ende voir horen poirteren een hoge boete. Ende also die dam na hoir selfs verlyen duergesteken is bij horen goetduncken, so zullen zij dair voir geven voir die gene die dat gedaen hebben ses die hoechste boeten. Ende voir all die gene die tot kennesse der hiemr. hoir goet gevoirt hebben doen voeren duerden ommedijck voirs., dair zullen die voirs. stede voir geven voir elken man x lb. Item die ander aensprake die die dijkgrave doet vanden overslaen wijsen wij want die burgermeester van Aemsterdam voir ons geseyt heeft dat hij sijn sacken dair over geslagen heeft, so geven wij den dijcgrave die kenningen gewonnen ende die van Aemsterdam verloren, ende dat die burgermeester dair an verbuert heeft x lb. ende desgelijc alle die gene die tot kennisse der hiemraden dair over geslagen hebben die zullen ellix geven x lb. Item die derde aensprake die den dijckgrave doet up die van Aemsterdam is dat sij die palen die staken inden waterganc geheten Costverloren mit craft wtgetogen zouden hebben buten oirlof vanden hiemr. ende want die dijcgrave dat niet bij gebracht en heeft als hij hem vermeten heeft, soe geven wij den dijcgrave die kenning verloren ende die van Aemsterdam gewonnen in manieren hier na gesc., dat is te weten soe wie ter kennisse vander hiemr. dair in betuucht wort, die sel dair voir geven also alst mit cracht gesciet is elx die hoechste boeten.'

 

Location, Folio
OAR11, 25v-a
type : Keur	date : 1424-05-01	record : # 044
[097] Anno xiiii c xxiiii upten meyen dach coirden die dijckgrave mitten hiemr. tot hoeren weder zeggen dat die Rijpweteringe tende dat inden ambocht vanden Woude strecket tot heren Jacobs aen toe also wijt wesen sel aengaens als dat ander ende dat strect in ambocht van Alkemade.

 

Location, Folio
OAR11, 26r-a-26v
type : Vonnis	date : 1363-08-04	record : # 045
[004] Aelbrecht bijder goids genaden palensgrave upten Rijn, hertoge in Beyern, ruwairt van Henegouwen, van Holland, van Zelant, etc., doe kond allen luden dat wij by onsen rade gemeenlic van Hollant ende biden gemenen hiemr. van Rijnlant overdragen sijn een voirwaerde ende een ewichs gesceit mit onsen goeden luden van onsen lande van Woirden die gelant sijn inden waterganc van Sparendam ende dair wt te wateren plegen in manieren ende voirwairden hier na gescr. Inden eersten, alle die gene die up die zuutzijde gelant sijn ende nu ter tijt wateren in die Ysele, die zullen geven vander morgen x vlaemsche groten, ende dair mede sullen zij vrij ende quijt wesen ende ewelijc gesceyden van allen rechte dat sij in Sparendam plagen te hebben, ende van onrade dat dair in roerende is ende sij en sullen nu voirt nemmermeer inden Rijn wateren tot den waterganc van Sparendam wt. Voirt alle die gene die up die zuutzijde voirsc. gelegen sijn ende nu ter tijt genen waterganc in die Ysele en hebben, die sullen geven vander morgen v vlaemsche grot, ende die sullen bliven in allen rechte dair die noirtside in bliven sel. Voirt alle die gene die an die noirtside gelegen sijn sullen geven v vlaemsche grote ende dair mede sullen sij gebetert hebben ale versumenes ende brocken die sij tot desen dage toe gehadt hebben roerende van Sparendam, ende nu voirt sullen sij maken ende houden twee slusen in Sparendam met den goede luden vanden Gestichte die mede tot Sparendam wt wateren sullen ende alle waterganc ende werc bewaren ende houden als sij van outs plagen te doen, wtgeseit dat sij mer twe slusen houden en sullen als voirsc. is, ende dit voirsc. salmen betalen die een helft tot onser vrouwen dage naest comende assumptio ende die ander helft tot Lambert misse daer naest comende, of binnen iii weken na elke dage voirsc. onbegrepen. Ende om dat wij willen dat dit stade ende vaste bliven ende ewelijc onverbroken, so hebben wij desen brief open bezegelt mit onsen zegel, ende hebben mede bevolen onsen welgeboren hiemr. van Rijnlant want sij over alle dese voirsc. voirwaerden geweest hebben van des lants wegen van Rijnlant dat sij desen brief mede bezegelen. Ende wij Reyner Dever ridder, Heinric van Alcmade Ysbrants z., Florijs van Alfen, Ysbrant vander Scuyer, Willem van Lewen, Diddeboy van Catwijck, [26v] ende Boudijn Jans z. knapen, hiemr. van Rijnlant, want wij over alle dese voirsc. saken geweest hebben, so hebben wij desen brief mede besegelt bij behieten ons liefs heren hertogen Aelbrecht mit onsen segelen. Gegeven inden Hage des vridage na ad vincula Petri int jair ons heren m ccc lxiii.

 

Location, Folio
OAR11, 26v-a-27r
type : Vonnis	date : 1431-09-05	record : # 046
Wij Gijlis van Cralinge heer van Voirscoten, Gerijt van Poelgheest heer van Hoechmade, Gerijt vanden Zijl heer van Purmereynde, ridderen, Boudijn van Zwieten trezorier van Holland, Jan vanden Boichorst heer van Noirticherhout, Florijs Paedzen, Meynert Claes z., knapen, hogen hyemraden van Rijnlant, doen condt allen luyden dat wij van des gemeens lants wegen van Rijnlant overdragen sijn mit Aernt Vechters z. dat hij aen genomen heeft voir hem ende voir sinen erven te maken ende te houden die hoge brede vanden zeedijck gelegen bij Costverloren gelegen neffens Aernt Vechters z. saet nu ter tijt is ter Halver weteringe to die nu Costverloren hyet erflick ende ewelijck op dat voirs. lant, duerende tot ewigen dagen toe. Ende hier voir hebben wij hoge hyemraet voirgen. van des gemeens lants wegen voirs. quijtgestonden ende gegevent quijt stelden ende geven voir ons ende voir onse nacomelingen Aernt Vechters z. voirs. ende sinen nacomelingen tot even vrien eygen alle die cade ende wateringe mit alle horen toebehoren streckende wt den Ye tot Sloterbrugge toe ende voirt die oude kade ende wateringe streckende vander Nuwer meer tot an die Nuwe weteringe to, also als die dair gelegen ende gegroyt is also groyt ende also cleyn als dat den lande van Rijnlant toe behoren plach off nu ter tijt toe behoirt te vercopen, te versetten ende sinen vryen wille dair mede te doen, behoudelick dat Jan Wouters z. ende Claes sijn soen hebben ende houden sullen [27r] tot enen vryen eygen die cade binnen dijck ende buten dijck up horen lande nu ter tijt gelegen mit half der weteringe dair an gelegen. In kenniss der wairheyt hebben wy hoge hyemr. voirgen. onsen zegelen tot enen getuge an desen breiff gehangen, int jair ons heren dusent vierhondert ende een ende dertich. [Ic Aernt Vechterszoon doe condt allen luden dat ic an ghenomen heb vanden gemeenen lande van Rijnlandt voir mi ende voor minen erven eygelijc ende ervelijc tot ewigen dagen die hoge brede vanden Zeedijck bij Aemstelredam geheten Costverloren also groot ende also cleey als hi gelegen is op mijn zaet nu ter tijt is gelegen an Costverloren streckende den voirs. dijcke zwtoostwairt ter Halver weteringe toe, dair si mi voir gegeven hebben den cadijck tot Costverloren gelijc mijn breive dair of inhouden. In kennisse der wairhede so hebbe ic desen brief bezegelt mit minen zegel, int jair ons heren dusent vierhondert een ende dertich upten vijften dach in septembri.

 

Location, Folio
OAR11, 27r-a
type : Keur	date : 1422-06-24	record : # 047
[042] Int jair van xxii op sinte Jans dach nativitas koirden die hoge hyemr. van Rijnlant mit horen dijcgrave dat die van Tetrode ende van Aelberts berge maken sellen xx roeden inden Nuwen dijck tot Sparenwoude een roede breet ende also hoge als hem die hoge hyemr. wijsen sellen. Ende dit sell gemaect wesen tusken dit ende sinte Maria Maddelenen dach naest comende op die hoechste boet, dat is te verstaen twewerf tseventich lb. herens gelts ende die boete nyement te verdragen een ygelick scuyt sinen stade.

 

Location, Folio
OAR11, 27r-b-27v
type : Keur	date : 1422-00-00	record : # 048
[098] Wij dijcgrave ende hoge hyemrade van Rijnlant doen condt allen luyden dat wij angesien hebben groten last ende armoede slands ende der goeder luyde in Rijnlant geseten onder dijcaidsen in waterschippen die wateren overmids oirloge dat lange gestaen heeft ende inbrekinge van dijcaedsen ende toevall van groiten vreemden water doir goede doirpen in Rijnlant gelegen groitelicke bij bescadicht sijn ende die luyde die dair gegoet ende gelant sien bij verarmt sijn, so dair in lange tijden overmids veel lasten den land angelegen niet toe gesyen noch verhoedinge op gedaen en is ende sonderlinge in desen na gesc. doirpen, als Alphen, Hasertswoude, Boscoep, Sindelwijck, Poelgen ende Groensvoirde, die welke so seer dair bij verderfelijck geworden sien ende bescadicht dat wij dair omme samentlijck overdragen sijn een kuere dair up te leggen na onser bester wete tot oirbair ende nutschip slands ende luyde voirn. Die welke cueren wij in deser manyeren dair op leggen moeten ende willen als dat dese nagesc. personen sullen [27v] wesen een jair lanck neder hyemr.. Te weten, in Alphen Huge Jacop z. ende Willem Jan Huge z. wonende aldair binnen den waterscip. Item in Hasertswoude Hugen Dirck Melijs z. wonende te Hasertswoude ende Jacop Everts z. wonende te Leyden. Item in Boscoep Jan Claes Boudijns z. Item in Snidelwijck, Poelgen ende Groensvoirt Jan Heyn Claes z. ende Jan Jacop z. Die welke neder Hyemr. zullen elc in horen bedrive ordineren, cueren ende bevelen te maken, wateringe ende dijcaidsen ende alle dat den voirs. lande aldair nut ende oirbair wesen sall na inhout der hantvesten die die voirs. dorpen hebben. Dits behoudelick ons den dijcgrave ende hoge hyemr. van Rijnlant ons rechts ende hoire hantvesten ende hoirs. rechts. Ende so dese voirs. hyemr. mitden scout ordineren, cueren ende bevelen sellen, dat sal van wairden wesen in allen scijn off wij dat selve deden. Ende bevelen enen ygeliken dat te houden bider hoichster boet, ende des nyement te verdragen. Dit sel den voirs. jairen dueren tot onsen weder seggen behoudeliken dat sy genen cost doen en sullen sy en sullen dair off goede rekenninge doen biden hogen hiemr. voirs. dair bij wesende die stede van Leyden. Gedaen anno xxii.

 

Location, Folio
OAR11, 27v-a-28r
type : Besteding	date : 1421-1434	record : # 049
[001] Die hoge hiemr. van Rijnlant willen besteden een sluys te maken die leggen sel in Sparendam ende den landt van Woerden toe behoren in alre manyeren als hier na gesc. staet. Item in den eersten sel dese sluse hebben vijftich binden ende elc bint sel dick wesen enen roede voet cants ende dat doerbint sel dick wesen i-1/2 roeden voet mit twe balken ende die voirbinde ter tijwerc dair aen dick volgende tot goeder scaep, want sy dicker wesen sellen dan die afterbinde, ende alle die binde sellen over [28r] dat anderde bint gekerbeelt wesen ende die gordinge sel dick wesen sseven duime ende xii breet ende elc cloester houten sullen dick wesen enen roede voet cants ende die quyspen sellen dick wesen die twe veel van enen voet cants ende die borden sel wesen van goeden deeventeersen plancken ende die sijt plancken sellen dick wesen twe dume van goeder hout ende dat dexel boven sel dick wesen iii dume ende in elken planck op elken stijl twe goede dubbel middel nagelen ende op dat doirbint sullen wesen spikeren die drie een pont wegen ende die tafel wel gespijkert ende gemost. Ende dese voirs. sluyse sel wijt wesen tusken den stijlen drivens waters xi roede voet ende sel hoech wesen tusken den bodem ende dat dexel ix roede voet. Ende alle dese voirs. voeten ende dumen sellen groit wesen na Rijnsker roede ghroet. Item op dese voirs. sluyse staet voir elc vander hiemr. xl sc. Item voir den clerck, xl sc. Item voir der hyemrader knecht tot Sparendam, xx sc. Item elken hymraet voir sijn knechten, x sc. Item Dirck Gijsbrechts z. als der hyemrader bode, x sc

 

Location, Folio
OAR11, 28r-a
type : Consent	date : 1437-06-25	record : # 050
[002] Item so consenteerden die dijcgrave ende hyemr. van Rijnlant Pieter Willem Hasen een vaert te maken doir den wech in Waddinx veen om sijn turf te water te voeren, behoudelicken een brugge te leggen inden wech so dat een ygelick dair over mach, ende die scout ende hymr. prijsen als sij scouwen, ende dit sel gedueren tot onsen weder seggen ende geschiede anno xxxvii op sinte Jans scouwe.

 

Location, Folio
OAR11, 28v-a
type : Rechtsdag	date : 1437-06-25	record : # 051
Anno xxxvii op die Does scouwe. Item Pieter Jacop z. lude voirden hyemraet dat dat lant dat Meus Pieters ende Jan Aendries z. off gepandt was vanden scout van Soeterwoude dat hij dat banwerck sculdich was te maken ende dat hijse sculdich wair te ontheffen ende die scade selve te gelden.

 

Location, Folio
OAR11, 28v-b
type : Consent	date : 1437-06-25	record : # 052
[003] Item op die tijt geconsenteert Claes Stintgen een sluystgen te leggen inden cadijck van Benthuser wateringe met een wachtdoer dat dair nyement bij bescadicht en wort. Dat lovede hij te bewaeren op sijn goet, ende sel gedueren tot onsen wederseggen.

 

Location, Folio
OAR11, 28v-c
type : Beveling	date : 1437-06-25	record : # 053
Item Pieter van Busch is bevolen sijn hant te slaen an sulck lant als hem met recht aen gecomen is van Zoeterwoude als hij seyt ende wedervairt hem anders dan goet dat hij dat den hyemr. te kennen geven woude sij wouden vorderen tot sinen recht.

 

Location, Folio
OAR11, 28v-d
type : Keur	date : 1437-06-25	record : # 054
[099] Anno xxxvii op sinte Jans scouwe. Item so sien die hyemr. overdragen so wye voir sloet inden mercken van Rijnlant, die sel sijn nabuyer die tegen hem sculdich is te sloten een weet doen dat hij na sloet sijn wercx gelijck off beter binnen viii dagen na dat hij hem die weet gedaen heeft op die boet van iii lb. Doet hijs niet, dan sel hijt sinen scout anbrengen ende die sel ter stont met hem gaen mit iii bueyr off mit meer ende besteden die sloten te maken om den minsten cost ende dat die sloot cost te maken dat selve den onwilligen manen bij tugen. Ende betaelt hijt dan niet, so selt die scout wtleggen ende weder inhalen na dijck recht, ende die scout sel hebben voir sinen airbeyt ii sc., ende die bode xii penning.

 

Location, Folio
OAR11, 28v-e
type : Keur	date : 1437-06-24	record : # 055
[100] Item [added above the line: 'die selve tijt'] so sien die hyemr. overdragen dat een ygelick scout mit sinen hyemr. binnen den merken geseten sullen scouwen hair wateringen tot allen tyden als gewoenlick is, behoudelick dat sy die wallen [29r] sullen scoen maken ende baggeren ende op halen die modder mit ladiken off mit houwen ende binnen scoen maken ende dat gras, croes ende vull op halen ende niet te laten driven. Ende wair dat enich scout mit sinen hyemr. hier in slap vielen ende niet en scouden als gewoenlick is ende voirs., dat wouden wij corrigeren aen den scout ende hyemr., elx inden sinen als an den genen die des lants verderfenisse gaern sagen duerende tot onsen weder seggen.

 

Location, Folio
OAR11, 29r-a
type : Rechtsdag	date : 1437-ca	record : # 056
Item want die dijcgrave van Rijnlant enen geheten Pau off Prager gevangen heeft opten meyen dach anno xxxvii op Sparendam overmits brucken die hij gedaen hadde anden sloten ende drayboym tusken Aemsterdam ende Sparendam, dair die dijcgrave ende hyemr. off vervollich sien van sinen vrienden ende sonderlinge van Splinter van Heemskerck, Florijs Claes z. ende Claes Aernts z. op sinte Pieters dach advincula, dair die dijcgrave Pau ende sinen vrienden den koer of gaf off sij Pau verborgen wouden na dijcrecht off dat hij sitten woude gelingen ter tijt dat die hyemr. hem enen dach van recht leyde ende dat recht dair off wijsden off dat hij die broecken dairt off alinge aen den hyemr. bliven woude gelinck oft hem mit recht off gewijst wair, aldair Paau dat geblijf off koer ende lovede dat gewijsen te houden op sijn lijf ende op sijn goet in jegenwoirdicheit des hyemr. ende Splinter van Heemskerck, Jan van Woude, Jacop Kodde, Willem Duker, Claes Bort ende Willem Heffels z., welc geblijf ende seggen die hyemr. wt gesproken hebben in manieren hier na gesc., te weten dat sij Paeu over geseyt hebben die hoechste boet, dat is twewerf tsevntich pont, ende dair off den dijcgrave te geven in ofcortingen ende weder te geven alsulken cost als hij dair om gedaen heeft ende den stochouder sinen cost betaelt. Ende want die hyemraet aen sien sijn armoede ende onderdanicheyt opp des tijt, so hebben sy hem wtsettingen vanden voirs. boeten gedaen, te weten wair dat sake dat hij tot enigen tijden dede tegen den dijcgrave ende hyemr. [29v] in enigen wijs des dijcgraafscip aengeroerende so sokende hij hoir bevallen ende wel verloert sijn lijf ende sijn goet tegen den dijcgtrave ende hyemr. van Rijnlant ende dair voir balinx des lants van Hollant te wesen tot hore vernoeming ende in genen steden noch lande van Hollant veylich te wesen noch betcut te saecken in geenen wijs ter tijt dat hij voldaen heeft van die hoechste boet voirs. ende voirt gebetert all brueken die hij voirt aen gedaen mocht hebben die dijcgraafscip aen roerende bij goetduncken den hyemr.

 

Location, Folio
OAR11, 29v-a
type : Rechtsdag	date : 1437-ca	record : # 057
[030] Die kenninge tusken Zoeterwoude ende Tyelman. Inden eersten want Tielman van Buschusen aen die een sijde ende dat ambocht van Zoeterwoude an die ander sijde een kenninge dingen voir ons als hyemrade van Rijnlant, dair Tielman eyskede die van Zoeterwoude een somme die opten gemenen lande van Rijnlant om gesettet was dair wij off bekennen dat eysken van wairden want een gemeen ommeslach binnen den mercken was, mer want dat voirs. afterstall niet overgelevert en is bij onsen gesworen clercken hant die nu is off voirtijts geweest is als dat behoirt, ende dair toe een goet man van Zoeterwoude tugede bij sinen ede dat hij den voirs. eysken Boschusen naden ommeslach wel voldaen ende betaelt heeft, so geven wij die van Zoeterwoude die kenninge gewonnen ende Tielman verloren.

 

Location, Folio
OAR11, 29v-b
type : Rechtsdag	date : 1437-ca	record : # 058
[031] Item die kenninge van Leyderdorp tusken Tielman aen die een side ende Leiderdorp die ander sij voir ons hiemraden van Rijnlant so kennen wij die gemeen ommesettinge van wairden ende want Jacop Matten z. seyde in onse jegenwoirdicheyt dat Boschusen hem eyskede die voirs. somme ende Jacop gaf dat den gemenen kueren te kennen die dair opp andwoirden, so hij seyde dat sij dair niet off geven en wouden. So kennen wij die ommesettinge van wairden ende geven die van Leyderdorp die kenninge verloren ende Tielman gewonnen, ten wair dat die van Leyderdorp bewijsen mochten dat sij die voirs. somme betaelt hadde ende dat souden sij bewijsen binnen viii dagen off dat bewijs en soude hem niet te baten comen.

 

Go to Folio's ...
13	20	30	40	50	60	70

 

Author	Publication	Home
William H. TeBrake Maine, USA, June 2006	Rijnland OAR11, OAR12, OAR13	www.oudleiden.nl