| [018] Upten xxviii sten dach in februario anno xiiii c lix, so waren vergadert tot Herlem die hiemrade van Rijnlant als here Willem van Alcmade ridder, Jan van Poelgeest, Jan van Noortich ende Ysbrant van Schoten inden name van hem allen om die bestedinge van die sluse van Herlem, van Coudekerc, sBurchgraven veen, here Dircx ambocht van Zuytwijck, Middelburch, Benthuysen ende Valkenburch [i.e. the Haarlemmersluis] ende hebben besteet dese voirs. sluus in manieren ende vorewerden hier na bescreven. Eerst zo sullen in dese voirs. sluus wesen xlii gebinden ende sullen wesen over dat anderde gecaarbeelt ende die carbolen sullen lanc wesen iii voet min iii duem gewrocht geliken die balcken dick behalven dat scotdoerbint. Item dat scotdoerbint mitter scotdoer zel dat voreste bint wesen ende sel gepent wesen in der cloesterhouten ende die balcken ende die dreppel sullen dick ende breet wesen na beloip van die stijlen ende die spongen vande scotdeur sellen gepent wesen in die cloesterhouten mit dubbelde pennen ende boven mit twie yseren bouten dore dat vlogel bint gesloten. Item zo sel dese voirs. sluus wesen vander lancke dat die oude sluus ende niet corter behoudelic dat dat scotdoerbint daer buten staen sel in sulker voege als voirs. is. Item die twie vlogelbinde, dat dorebint mit sijn twie balcken ende een dreppel eende dat genen dat op die slach lack tusschen die balcken gewrocht sel wesen in dat dorebint dese iii punten sullen elcx gewrocht wesen als die bestedinge van die sluus van Alckmade of bescreven is, wtgesondert die balck die boven op die sluus leggen sel om die aerde te scutten sel wesen voets kant. Ende so sullen wesen gewrocht twie scoen schoren an die slach balck gepennet mit hore behoren in manieren gescreven inden voirs. sluus. [118r] Item so selmen leggen after in die sluus an dat derde bint overdwers die sluus vast gemaict mit twie planeren een balck voir dat doerbaren ende zel wesen viii duem viercant. Item die balcken, die stijlen, die quespen, die cloesterhouten, die gordinge, die wijt vander sluuys ende die hoecht, dese voirs. vii punten sullen elcx wesen nader bestedinge vander sluus van Alcmade. Item die ramen daer die doren of wesen sullen, die vijff schorebanden die in die sluus gewrocht wesen sullen ende die xvi slichouten die onder den bodem vander sluus leggen sullen, dese iii punten sullen elcx gewrocht wesen na voirwairde vander voirseider sluus. Item dat slichout dat voir inde tYe leggen, des gelijcx die planck diemen in delven sel an dat slichout onder dat doerbint ende an dat uterste slichout selt geplaet paelt wesen ende van gelijcx so sullen alle na gescreven punten gemaect worden in manieren ende van wairden dat die sluus van Alcmade die bestedinge dair of dat inhout, wtgesondert sulken als hier voirbescreven staen of na gescreven. Item so sel den nuwen vorm vander sluus leggen also laech als die sluus van Alcmade horen vorm leyt ende niet hoger, ende men sel alle die oude bodeme ende alle hout wtwynnen. Item so sullen die sijdel planken dair die sluus mede gecleet sal wesen die sullen wesen vander lancte dat die valt v planken lanc sonder meer ende vergadert over al op die stijlen ende alle in eynden wel dicht geborcht an een. Item die planken daer des voirs. sluus mede gedect sal wesen, die sullen wesen vander lancte dat die vier planken lanc vallen sonder meer behoudelic datmen op dat doerbint geen vergaderinge maken en sel boven, besijden noch beneden inder bodem. Item so heeft hyese dese voirs. sluus angenomen te maken inder manieren ende voirwairden als die sluus van Alcmade die bestedinge daer of dat inhout van hout van yser ende van aerde, behoudelic dat hij meer maken sel sulker punten als hier voirs. sijn, Clais Dircx z. van Scoerl om vii c xix lb., daer borge van zijn Pieter Dircx z. ende Jan Gerijts z. ende hebben geloeft mit gesamender hant ende elcx voir all. |
|
Location, Folio